ସ୍ୱାଧୀନତା ପରେ ସେନା ପ୍ରଥମ ଥର ପାଇଁ ଏଭଳି ନିଷ୍ପତ୍ତି; ‘ଏକ୍ ବର୍ଡର୍… ଏକ୍ କମାଣ୍ଡର’, LAC ହେଉ କି LOC, ହେବ କାର୍ଯ୍ୟାନୁଷ୍ଠାନ
ନୂଆଦିଲ୍ଲୀ: ଭାରତୀୟ ସେନା ନିଜର କମାଣ୍ଡ ଢାଞ୍ଚାରେ ସବୁଠାରୁ ବଡ଼ ପରିବର୍ତ୍ତନ ପାଇଁ ପ୍ରସ୍ତୁତି ଶେଷ କରିଛି। ସମ୍ଭବତଃ ଆଗାମୀ ଦେଢ଼ ବର୍ଷ ମଧ୍ୟରେ ଭାରତୀୟ ସେନାର ଏକୀକରଣ ଓ ଥିଏଟର କମାଣ୍ଡକୁ ନେଇ ବଡ଼ ଘୋଷଣା ହେବ। ଥିଏଟର କମାଣ୍ଡ ଅଧୀନରେ ଯେ କୌଣସି ସୀମାରେ ଜଣେ କମାଣ୍ଡର ଆକାଶରୁ ସ୍ଥଳଭାଗ ପର୍ଯ୍ୟନ୍ତ ସମସ୍ତ ନିଷ୍ପତ୍ତି ନେବେ। ଅର୍ଥାତ୍ ସେନା, ବାୟୁସେନା ଓ ନୌସେନା ପାଇଁ କେବଳ ଜଣେ କମାଣ୍ଡର ରହିବେ। ସିଡିଏସ୍ ଜେନେରାଲ ଅନିଲ ଚୌହାନ ଏଥିପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିଛନ୍ତି ଏବଂ ଏବେ ପ୍ରତିରକ୍ଷା ମନ୍ତ୍ରଣାଳୟ ଏବଂ ସରକାର ନିଷ୍ପତ୍ତି ନେବା ମାତ୍ରେ ଏହା ଘୋଷଣା କରାଯିବ।
ସ୍ୱାଧୀନତା ପରେ ସେନା ପ୍ରଥମ ଥର ପାଇଁ ଏଭଳି ନିଷ୍ପତ୍ତି ନେଇଛି, ଯେଉଁଥିରେ କୌଣସି ସୀମାରେ ଜଣେ କମାଣ୍ଡର ଆକାଶରୁ ମାଟି ପର୍ଯ୍ୟନ୍ତ ସମସ୍ତ ନିଷ୍ପତ୍ତି ନେବେ । ମିଳିଥିବା ସୂଚନା ଅନୁଯାୟୀ, ଥିଏଟର କମାଣ୍ଡ ପାଇଁ ସମସ୍ତ ବିଷୟରେ ସେନା ରାଜି ହୋଇଛି ଏବଂ ଖୁବଶୀଘ୍ର ପ୍ରଥମ ଇଣ୍ଟିଗ୍ରେଟେଡ୍ ଥିଏଟର କମାଣ୍ଡ (ଆଇଟିସି) ଘୋଷଣା କରାଯିବ। ଏହି ଆଇଟିସିଗୁଡ଼ିକ ଗୋଟିଏ ସୀମା-ଗୋଟିଏ କମାଣ୍ଡର ନୀତି ଉପରେ କାର୍ଯ୍ୟ କରିବେ, ଅର୍ଥାତ୍ ସୀମା ପାଇଁ ପ୍ରତ୍ୟେକ କମାଣ୍ଡର ସମ୍ପୂର୍ଣ୍ଣ ଦାୟିତ୍ୱ ରହିବ।
- ସମୁଦାୟ ୩ଟି ଇଣ୍ଟିଗ୍ରେଟେଡ୍ ଥିଏଟର କମାଣ୍ଡ ଅର୍ଥାତ୍ ଆଇଟିସି ଗଠନ କରାଯିବ ଏବଂ ପ୍ରତ୍ୟେକ କମାଣ୍ଡକୁ ସୀମାର ସୁରକ୍ଷା ଦାୟିତ୍ୱ ଦିଆଯିବ।
- ଗୋଟିଏ କମାଣ୍ଡ ପାକିସ୍ତାନର ଯତ୍ନ ନେବ, ଗୋଟିଏ ଚୀନ୍ ସୀମା ପାଇଁ ଏବଂ ଗୋଟିଏ ସମୁଦ୍ର ସୁରକ୍ଷା ପାଇଁ।
- ପ୍ରଥମ କମାଣ୍ଡ ହେଉଛି ଦକ୍ଷିଣ-ପଶ୍ଚିମ ଆଇଟିସି ଯାହା ପାକିସ୍ତାନ ସୀମାକୁ ନିଜ ଅକ୍ତିଆରକୁ ନେବ । ଅର୍ଥାତ୍ କଚ୍ଛର ରଣରୁ ଲଦାଖ ପର୍ଯ୍ୟନ୍ତ ପାକିସ୍ତାନ ସୀମା ପାଇଁ ଏହି କମାଣ୍ଡ ଦାୟୀ ରହିବ।
- ବର୍ତମାନ ଭାରତୀୟ ସେନାର ଦକ୍ଷିଣ ପଶ୍ଚିମ କମାଣ୍ଡର ମୁଖ୍ୟାଳୟ ଜୟପୁରରେ ରହିଛି, ଯାହାକୁ ସେହି ନାମର ଥିଏଟର କମାଣ୍ଡକୁ ପରିବର୍ତ୍ତନ କରିବାକୁ ପ୍ରସ୍ତାବ ରହିଛି ।
- ପାକିସ୍ତାନର ସମଗ୍ର ସୀମାର ସୁରକ୍ଷା ଦାୟିତ୍ୱ ତୁଲାଇବା ପାଇଁ ଏହି ଥିଏଟର କମାଣ୍ଡରେ ସେନା, ବାୟୁସେନା ଏବଂ ନୌସେନାର ସମସ୍ତ ସୈନିକ ଏବଂ ଉପକରଣ ରହିବ ।
- ଚୀନ୍ ସୀମା ପାଇଁ ଏକ ଉତ୍ତର ସମନ୍ବିତ ଥିଏଟର କମାଣ୍ଡ ଗଠନ କରାଯିବ, ଯାହାର ମୁଖ୍ୟାଳୟ ଲକ୍ଷ୍ନୌ ହେବ।
- ଲକ୍ଷ୍ନୌ ବର୍ତ୍ତମାନ ଭାରତୀୟ ସେନାର ସେଣ୍ଟ୍ରାଲ କମାଣ୍ଡର ମୁଖ୍ୟାଳୟ, ଯାହାକୁ ଥିଏଟର କମାଣ୍ଡକୁ ପରିବର୍ତ୍ତନ କରାଯିବ।
- ଏହି କମାଣ୍ଡ ଲଦାଖରୁ ଅରୁଣାଚଳ ପ୍ରଦେଶ ପର୍ଯ୍ୟନ୍ତ ସମଗ୍ର ଚୀନ୍ ସୀମା ପାଇଁ ଦାୟୀ ରହିବ।
- ଏଥିରେ ଏହି ସମଗ୍ର ଅଞ୍ଚଳର ସେନା ଓ ବାୟୁସେନାର ସମସ୍ତ ସମ୍ବଳ ରହିବ।
- ତୃତୀୟ କମାଣ୍ଡ ସାମୁଦ୍ରିକ ସୁରକ୍ଷା ପାଇଁ ରହିବ, ଯାହାର ମୁଖ୍ୟାଳୟ ତିରୁବନନ୍ତପୁରମରେ ରହିବ । ଏଥିରେ ନୌସେନା, ସ୍ଥଳସେନା ଓ ବାୟୁସେନାର ସମସ୍ତ ସୈନିକ ଓ ସମ୍ବଳ ରହିବ।
