ବେଆଇନ ଭାବେ ଆମେରିକାରେ ପ୍ରବେଶ କରିବାକୁ ଉଦ୍ୟମ, କାନାଡା ସୀମାରେ ଭାରତୀୟଙ୍କ ସମେତ ୮ ଜଣ ପ୍ରବାସୀ ମୃତ
ନୂଆଦିଲ୍ଲୀ: କାନାଡାରୁ ବେଆଇନ ଭାବେ ଆମେରିକାରେ ପ୍ରବେଶ କରିବାକୁ ଚେଷ୍ଟା କରୁଥିବାବେଳେ କାନାଡ଼ା- ଆମେରିକା ସୀମାରେ ଜୀବନ ହରାଇଲେ ୪ ଭାରତୀୟ। ସେଣ୍ଟ ଲରେନ୍ସ ନଦୀରେ ବୁଡ଼ିଯିବା ପରେ ଗୋଟିଏ ଭାରତୀୟ ପରିବାରର ସଦସ୍ୟଙ୍କ ସମେତ ଆଠ ଜଣଙ୍କର ମୃତ୍ୟୁ ଘଟିଛି। ଅଧିକାରୀମାନେ ଶୁକ୍ରବାର ଏହି ସୂଚନା ଦେଇଛନ୍ତି। କାନାଡା ସ୍ଥାନୀୟ ଗଣମାଧ୍ୟମ ‘ସିବିସି’ ଏବଂ ‘ସିଟିଭି’ ଅନୁଯାୟୀ ଗୁରୁବାର ସକାଳେ କାନାଡାର କୋଷ୍ଟଗାର୍ଡ ପେଟ୍ରୋଲିଙ୍ଗ କରିବା ସମୟରେ କ୍ୟୁବିକ ଅଞ୍ଚଳରେ ଏକ ଓଲଟି ପଡିଥିବା ଡଙ୍ଗା ନିକଟରେ ମୃତଦେହ ଦେଖିଥିଲେ।
ଶୁକ୍ରବାର ଦିନ ଏକ ସାମ୍ବାଦିକ ସମ୍ମିଳନୀରେ ଆକ୍ୱେସାନେ ମୋହାକ୍ ପୋଲିସ୍ ସର୍ଭିସର ଡେପୁଟି ଚିଫ୍ ଲି-ଆନ୍ ଓ’ବ୍ରାଇନ୍ କହିଛନ୍ତି ଯେ ଏହି ୬ ଜଣ ବ୍ୟକ୍ତି ଦୁଇଟି ପରିବାରର ବୋଲି ଜଣାପଡିଛି। ଗୋଟିଏ ପରିବାର ରୋମାନିଆର ଏବଂ ଅନ୍ୟଟି ଭାରତର। ଅଧିକାରୀ କହିଛନ୍ତି, ‘ଆଶା କରାଯାଉଛି ଯେ ସମସ୍ତେ କାନାଡାରୁ ବେଆଇନ ଭାବେ ଆମେରିକାରେ ପ୍ରବେଶ କରିବାକୁ ଚେଷ୍ଟା କରୁଥିଲେ।’ ବେଆଇନ ଭାବେ ଆମେରିକାରେ ପ୍ରବେଶ କରିବାକୁ ଚେଷ୍ଟା କରିବା ପରେ ଦୁଇ ଶିଶୁଙ୍କ ସମେତ ଆଠ ଜଣଙ୍କର କାନାଡା-ଆମେରିକା ସୀମା ନିକଟରେ ଥିବା ଏକ ଜଳାଶୟରେ ମୃତଦେହ ମିଳିଥିବା ପୋଲିସ କହିଛି।
ଏହି ଲୋକମାନଙ୍କର ମୃତଦେହ ଆକ୍ୱେସେନ୍ ମୋହାକ୍ ସମ୍ପ୍ରଦାୟର ଜଣେ ନିଖୋଜ ବ୍ୟକ୍ତିଙ୍କ ଡଙ୍ଗା ନିକଟରେ ଦେଖିବାକୁ ମିଳିଥିଲା ବୋଲି ଅଧିକାରୀମାନେ କହିଛନ୍ତି। ସ୍ଥାନୀୟ ପୋଲିସ ମୁଖ୍ୟ ସଚିନ ଦୁଲୁଦେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ବର୍ତ୍ତମାନ ପାଣିରୁ ମୋଟ ୮ ଟି ମୃତଦେହ ଉଦ୍ଧାର କରାଯାଇଛି। ବର୍ଷା, କୁଆପଥର, ପ୍ରବଳ ପବନ ଏବଂ ଖରାପ ପାଣିପାଗ ଅବସ୍ଥା ଯୋଗୁଁ ଛୋଟ ଡଙ୍ଗାଟି ଓଲଟି ପଡିଥିଲା। ପ୍ରଥମ ମୃତଦେହ ଏହି ଅଞ୍ଚଳର ବିମାନ ଅନୁସନ୍ଧାନ ସମୟରେ ମିଳିଥିଲା। ମୃତ୍ୟୁର କାରଣ ଜାଣିବା ପାଇଁ ଅଧିକାରୀମାନେ ପୋଷ୍ଟମର୍ଟମ ଏବଂ ଟକ୍ସିକୋଲୋଜି ପରୀକ୍ଷଣର ଫଳାଫଳକୁ ଅପେକ୍ଷା କରିଛନ୍ତି। ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ସାମ୍ବାଦିକମାନଙ୍କୁ ସୂଚନା ଦେଇ କହିଛନ୍ତି ଯେ ଆମର ସମବେଦନା ନିହତ ଲୋକଙ୍କ ପରିବାର ସହ ଅଛି, ଏହା ଏକ ହୃଦୟ ବିଦାରକ ପରିସ୍ଥିତି।
