ଆହତ ନା ଦଳରୁ ବାଦ୍ ପଡ଼ିଲେ ଶ୍ରେୟସ: IND vs ENG ଶେଷ ୩ଟି ଟେଷ୍ଟରେ ମିଳିଲାନି ସୁଯୋଗ
ନୂଆଦିଲ୍ଲୀ: ଫେବୃଆରୀ ୧୫ ତାରିଖରୁ ଇଂଲଣ୍ଡ ବିପକ୍ଷରେ ତୃତୀୟ ଟେଷ୍ଟ ଆରମ୍ଭ କରିବ ଟିମ ଇଣ୍ଡିଆ । ଏହାପୂର୍ବରୁ ସିରିଜର ଶେଷ ୩ଟି ଟେଷ୍ଟ ମ୍ୟାଚ ପାଇଁ ଦଳ ଘୋଷଣା କରିଛି ଭାରତୀୟ କ୍ରିକେଟ ବୋର୍ଡ । କିନ୍ତୁ ଏହି ଦଳରେ ପୂର୍ବତନ ଅଧିନାୟକ ବିରାଟ କୋହଲି କମବ୍ୟାକ କରୁନାହାନ୍ତି । ତାଙ୍କ ସହିତ ଦଳରୁ ବାଦ୍ ପଡ଼ିଛନ୍ତି ଷ୍ଟାର ବ୍ୟାଟର ଶ୍ରେୟସ ଆୟର । ତେବେ କେ.ଏଲ ରାହୁଲ ଏବଂ ରବିନ୍ଦ୍ର ଜାଡେଜାଙ୍କ ଫେରିବାକୁ ନେଇ ଦଳ ଆଶାବାଦୀ ରହିଛି । କିନ୍ତୁ ଶ୍ରେୟସଙ୍କୁ ଦଳରେ ସ୍ଥାନ ନ ମିଳିବା ନେଇ ଏବେ ପ୍ରଶ୍ନ ଉଠିଛି । କାହିଁକି ତାଙ୍କୁ ଶେଷ ୩ଟି ମ୍ୟାଚରେ ସୁଯୋଗ ଦେଇନି ବିସିସିଆଇ? ଏ ନେଇ ଆଲୋଚନା ଆରମ୍ଭ ହୋଇଯାଇଛି ।
ଇଂଲଣ୍ଡ ବିପକ୍ଷ ଶେଷ ୩ଟି ଟେଷ୍ଟ ପାଇଁ ବିସିସିଆଇର ନୂଆ ଦଳରେ ଷ୍ଟାର ବ୍ୟାଟର ଶ୍ରେୟସ ଆୟରଙ୍କୁ ସୁଯୋଗ ମିଳିନାହିଁ । ତେବେ ରିପୋର୍ଟରୁ ଜଣାଯାଇଛି ଯେ, ସେ ଆହତ ସମସ୍ୟା ପାଇଁ ଦଳରୁ ବାଦ୍ ପଡ଼ିଛନ୍ତି । ତାଙ୍କ ଗୋଇନରେ ଯନ୍ତ୍ରଣ ହେଉଥିବା ନେଇ ସେ ଟିମ ମ୍ୟାନେଜମେଣ୍ଟକୁ ଅବଗତ କରାଇଥିଲେ । ତେଣୁ ଏହି ୩ଟି ମ୍ୟାଚରେ ବିସିସିଆଇ ତାଙ୍କୁ ଦଳରୁ ବାଦ୍ ଦେଇଛି । କିନ୍ତୁ ଅନେକ କ୍ରିକେଟ ସମାଲୋଚକ ଏହାକୁ ସହଜରେ ଗ୍ରହଣ କରିନାହାନ୍ତି । ବୋର୍ଡ ଶ୍ରେୟସଙ୍କୁ ଦଳରୁ ବାଦ୍ ଦେଇଥିବା ଆଲୋଚନା କରାଯାଉଛି । ଖରାପ ଫର୍ମ ଦେଇ ଗତି କରୁଥିବା ଶ୍ରେୟସ ଅନେକ ମ୍ୟାଚରେ ଫ୍ଲପ୍ ସାବ୍ୟସ୍ତ ହୋଇଛନ୍ତି । ଇଂଲଣ୍ଡ ବିପକ୍ଷ ଏହି ପ୍ରଥମ ୨ଟି ଟେଷ୍ଟରେ ବିଫଳ ହୋଇଛନ୍ତି ଶ୍ରେୟସ । ଏହି ୨ଟି ମ୍ୟାଚରେ ସେ ମୋଟ ୨୭ ଏବଂ ୨୯ ରନ୍ ସଂଗ୍ରହ କରିଛନ୍ତି । ତେଣୁ ତାଙ୍କୁ ଆଗାମୀ ୩ଟି ମ୍ୟାଚ ପାଇଁ ଦଳରେ ଚୟନ କରାଯାଇ ନାହିଁ ।
ତେବେ ରିପୋର୍ଟ ଅନୁସାରେ ଶ୍ରେୟସ ଆହତ ଥିବା ବେଳେ ଏବେ ବେଙ୍ଗଲୁରୁର ନେସନାଲ କ୍ରିକେଟ ଏକାଡେମୀକୁ ଯାଇ ସେଠାରେ ଅଭ୍ୟାସରତ ରହିବେ । ସେ କେତେ ଦିନ ମଧ୍ୟରେ ସୁସ୍ଥ ହୋଇ ଦଳକୁ କମବ୍ୟାକ କରିବେ ସେ ନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ସେପଟେ ଶ୍ରେୟସଙ୍କ ସ୍ଥାନରେ ସରଫରାଜ ଖାନଙ୍କୁ ଦଳରେ ସାମିଲ କରିଛି ବିସିସିଆଇ । ତେବେ ଆଗାମୀ ମ୍ୟାଚରେ ସରଫରାଜଙ୍କ ଖେଳିବା ଏକପ୍ରକାର ନିଶ୍ଚିତ କୁହାଯାଇପାରେ । ଏହାସହିତ ଷ୍ଟାର କ୍ରିକେଟର କେ.ଏଲ ରାହୁଲ ଏବଂ ରବିନ୍ଦ୍ର ଜାଡେଜା ମଧ୍ୟ ଦଳକୁ କମବ୍ୟାକ କରିବାର ଯଥେଷ୍ଟ ସମ୍ଭାବନା ରହିଛି ।
🚨 NEWS 🚨#TeamIndia's Squad for final three Tests against England announced.
Details 🔽 #INDvENG | @IDFCFIRSTBankhttps://t.co/JPXnyD4WBK
— BCCI (@BCCI) February 10, 2024
ଶେଷ ୩ଟି ଟେଷ୍ଟ ପାଇଁ ଭାରତୀୟ ଦଳ: ରୋହିତ ଶର୍ମା(ଅଧିନାୟକ), ଜଶପ୍ରୀତ ବୁମରାହ(ଉପ-ଅଧିନାୟକ), ଯଶସ୍ୱୀ ଜଏସ୍ୱାଲ, ଶୁଭମନ ଗିଲ୍, କେ.ଏଲ ରାହୁଲ, ରଜତ ପାଟିଦାର, ସରଫରାଜ ଖାନ୍, ଧ୍ରୁବ ଜୁରେଲ, କେ.ଏସ ଭରତ, ରବିଚନ୍ଦ୍ରନ ଅଶ୍ୱୀନ, ରବିନ୍ଦ୍ର ଜାଡେଜା, ଅକ୍ସର ପଟେଲ, ୱାଶିଂଟନ୍ ସୁନ୍ଦର, କୁଳଦୀପ ଯାଦବ, ମହମ୍ମଦ ସିରାଜ, ମୁକେଶ କୁମାର, ଆକାଶ ଦୀପ ।
