ଗାଜା ହସ୍ପିଟାଲରେ କଟିଗଲା ବିଜୁଳି, ମୋବାଇଲ ଟର୍ଚ୍ଚ ଲାଇଟ ସାହାଯ୍ୟରେ ଡାକ୍ତର କରୁଛନ୍ତି ଅପରେସନ
ଗାଜା: ଇସ୍ରାଏଲ୍-ହାମାସ୍ ଯୁଦ୍ଧ ମଧ୍ୟରେ ଗାଜାର ପରିସ୍ଥିତି ‘ଭୟଙ୍କର’ ହେବାରେ ଲାଗିଛି। ହସ୍ପିଟାଲ ଗୁଡିକ ବିପଦରେ ରହିଛି। ଅନେକ ବିଭାଗ ବିଦ୍ୟୁତ ବିନା କାମ କରୁଛନ୍ତି। ମୋବାଇଲ୍ ଫୋନ୍ ସାହାଯ୍ୟରେ ଡାକ୍ତରଙ୍କୁ ଅପରେସନ୍ କରିବାକୁ ପଡିଲା ଏବଂ ଗୁରୁତର ଆହତମାନଙ୍କୁ ସହାୟତା କରିବା ପାଇଁ ଆଇସିୟୁ ବେଡ୍ ଏବଂ ଭେଣ୍ଟିଲେଟରର ଘୋର ଅଭାବ ରହିଛି । ଆସୋସିଏଟେଡ୍ ପ୍ରେସ ଦ୍ୱାରା ପ୍ରାପ୍ତ ଭିଡିଓ ଫୁଟେଜରେ ମେଡିକାଲ୍ କର୍ମଚାରୀମାନେ ଟର୍ଚ୍ଚ ଲାଇଟ୍ ଦ୍ୱାରା ରୋଗୀମାନଙ୍କୁ ଚିକିତ୍ସା କରୁଥିବା ଦେଖାଯାଇଛି।
ବାସ୍ତବରେ, ଗୁରୁବାର ଏଠାରେ ଏକ ଆବାସିକ କୋଠା ଉପରେ ଇସ୍ରାଏଲର ଏୟାର ଷ୍ଟ୍ରାଇକ ହୋଇଥିଲା, ନିକଟସ୍ଥ ଲୋକମାନେ ଏହି ବିଲ୍ଡିଂରେ ଫସି ରହିଥିବା ଲୋକଙ୍କୁ ସାହାଯ୍ୟ କରିବାକୁ ଦୌଡ଼ିଥିଲେ। ଖାନ ୟୁନିସର ଦକ୍ଷିଣ ଗାଜା ଅଞ୍ଚଳରେ ଥିବା ନାସିର ହସ୍ପିଟାଲର ଜରୁରୀକାଳୀନ ନିର୍ଦ୍ଦେଶକ ଡକ୍ଟର ମହମ୍ମଦ କାଣ୍ଡିଲ କହିଛନ୍ତି ଯେ, ସୁବିଧା ଏବଂ ଯୋଗାଣ ହ୍ରାସ ହେଲେ ଆମେ ଅଧିକ ଜୀବନ ରକ୍ଷା କରିପାରିବୁ ନାହିଁ।
ଡକ୍ଟର କାଣ୍ଡିଲ କହିଛନ୍ତି – “ଆମେ ବହୁତ କଠିନ ପରିସ୍ଥିତିରେ ଅଛୁ, ଏହା ଅତ୍ୟନ୍ତ ଭୟଙ୍କର। ଏହା ଅତ୍ୟନ୍ତ ଭୟାନକ ମଧ୍ୟ ଅଟେ। କୌଣସି ଶବ୍ଦ ଏହି ଭୟଙ୍କର ଦୃଶ୍ୟକୁ ବର୍ଣ୍ଣନା କରିପାରିବ ନାହିଁ। ଗତ କିଛି ଦିନ ହେବ, ଆମେ ସମଗ୍ର ମାନବ ସମ୍ପ୍ରଦାୟକୁ ଏକ ବାର୍ତ୍ତା ପଠାଉଛୁ ଯେ, ଆମ ଡାକ୍ତରଖାନାରେ ଇନ୍ଧନ ନାହିଁ। ଆଜି ସକାଳେ ଏହି ସତ୍ୟ ସାମ୍ନାକୁ ଆସିବାକୁ ଲାଗିଲା, ଯେତେବେଳେ ଆମେ ରୋଗୀର ଚିକିତ୍ସା ପାଇଁ କେବଳ ମୋବାଇଲର ଟର୍ଚ୍ଚ ଲାଇଟ୍ ସହିତ କାମ କରୁଛୁ। ”