UNHRC: ପାଲେଷ୍ଟାଇନ ସହ ଜଡିତ ୟୁଏନଏଚଆରସି ପ୍ରସ୍ତାବକୁ ଭାରତର ସମର୍ଥନ, ସପକ୍ଷରେ ଦେଲା ଭୋଟ୍
ନୂଆଦିଲ୍ଲୀ: ମିଳିତ ଜାତିସଂଘ ମାନବ ଅଧିକାର ପରିଷଦରେ ଏକ ସଂକଳ୍ପ ପ୍ରସ୍ତାବ ସପକ୍ଷରେ ଭାରତ ଶୁକ୍ରବାର ଦିନ ଭୋଟ୍ ଦେଇଛି, ଯାହା ପାଲେଷ୍ଟାଇନବାସୀଙ୍କ ଆତ୍ମନିର୍ଭରଶୀଳତାର ଅବିଚ୍ଛେଦ୍ୟ ଅଧିକାରକୁ ପ୍ରମାଣିତ କରିଛି । ଯେଉଁଥିରେ ପାଲେଷ୍ଟାଇନର ଏକ ସ୍ୱାଧୀନ ରାଷ୍ଟ୍ରର ଅଧିକାର ମଧ୍ୟ ସାମିଲ ହୋଇଛି ।
ଏହି ପ୍ରସ୍ତାବରେ ଭାରତର ସହମତି :-
ଜେନେଭା ସ୍ଥିତ ମିଳିତ ଜାତିସଂଘ ମାନବ ଅଧିକାର ପରିଷଦରେ ‘ପାଲେଷ୍ଟାଇନ ଲୋକମାନଙ୍କର ଆତ୍ମ-ନିର୍ଣ୍ଣୟ ଅଧିକାର’ ଉପରେ ସଂକଳ୍ପ ପ୍ରସ୍ତାବ ଗ୍ରହଣ କରାଯାଇଥିଲା ଯେଉଁଥିରେ ଭାରତ ସମେତ ୪୨ ସଦସ୍ୟ ଦେଶ ସପକ୍ଷରେ ମତ ଦେଇଥିଲେ । ୪୭ ସଦସ୍ୟ ବିଶିଷ୍ଟ ପରିଷଦରେ ଆମେରିକା ଏବଂ ପାରାଗୁଏ କେବଳ ଦୁଇଟି ଦେଶ ପ୍ରସ୍ତାବ ବିରୋଧରେ ଭୋଟ୍ ଦେଇଥିଲେ ଓ ଆଲବେନିଆ, ଆର୍ଜେଣ୍ଟିନା ଏବଂ କାମେରୁନ ଏଥିରେ ଅଂଶଗ୍ରହଣ କରିନଥିଲେ ।
ପାଲେଷ୍ଟାଇନ ଲୋକଙ୍କ ଅଧିକାରକୁ ନିଶ୍ଚିତ କରିବା :-
ଏହି ପ୍ରସ୍ତାବରେ ପାଲେଷ୍ଟାଇନର ଲୋକମାନଙ୍କର ଅତ୍ୟାବଶ୍ୟକ, ସ୍ଥାୟୀ ଓ ଅଧିକାର ପୁଷ୍ଟି ହୋଇଛି, ଯେଉଁଥିରେ ସ୍ୱାଧୀନତା, ନ୍ୟାୟ ଏବଂ ସମ୍ମାନ ସହ ବଞ୍ଚିବାର ଅଧିକାର ଏବଂ ସେମାନଙ୍କର ସ୍ୱାଧୀନ ପାଲେଷ୍ଟାଇନ ରାଷ୍ଟ୍ରର ଅଧିକାର ସାମିଲ ହୋଇଛି । ମିଳିତ ଜାତିସଂଘର ପ୍ରସ୍ତାବ ସମେତ ଅନ୍ତର୍ଜାତୀୟ ଆଇନ ତଥା ଅନ୍ୟାନ୍ୟ ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ମାନଦଣ୍ଡ ଅନୁଯାୟୀ ଇସ୍ରାଏଲ୍-ପାଲେଷ୍ଟାଇନ ଯୁଦ୍ଧର ଏକ ନ୍ୟାୟପୂର୍ଣ୍ଣ, ବିସ୍ତୃତ ଏବଂ ସ୍ଥାୟୀ ଶାନ୍ତିପୂର୍ଣ୍ଣ ସମାଧାନ ହାସଲ କରିବାର ଆବଶ୍ୟକତା ଏହା ମଧ୍ୟ ନିଶ୍ଚିତ କରିଛି ।
ଦୁଇଟି ରାଷ୍ଟ୍ର ନୀତି ସମାଧାନକୁ ମିଳିଲା ଶକ୍ତି :-
ଏହି ପ୍ରସ୍ତାବରେ ଇସ୍ରାଏଲକୁ ପୂର୍ବ ଜେରୁଜେଲମ ସମେତ ଅଧିକୃତ ପାଲେଷ୍ଟାଇନ ଅଞ୍ଚଳ ଦଖଲ କରିବାକୁ ତୁରନ୍ତ ବନ୍ଦ କରିବାକୁ ଏବଂ ପାଲେଷ୍ଟାଇନର ରାଜନୈତିକ ସ୍ୱାଧୀନତା, ସାର୍ବଭୌମତ୍ୱ ତଥା ଆଞ୍ଚଳିକ ଅଖଣ୍ଡତା ଉପରେ କୌଣସି ପ୍ରତିବନ୍ଧକକୁ ଦୂର କରିବାକୁ ତଥା ସମାଧାନ କରିବାକୁ କୁହାଯାଇଛି । ତେବେ ପ୍ରସ୍ତାବ ପାଲେଷ୍ଟାଇନ ଏବଂ ଇସ୍ରାଏଲ ମଧ୍ୟରେ ବିବାଦର ସମାଧାନ ଭାବରେ ଦୁଇ-ରାଷ୍ଟ୍ର ନୀତିକୁ ନିଶ୍ଚିତ କରିଛି ।
