କୋଲକାତା ଦୁଷ୍କର୍ମ-ହତ୍ୟା ମାମଲା: ରାଷ୍ଟ୍ରପତି-ପ୍ରଧାନମନ୍ତ୍ରୀଙ୍କୁ ଚିଠି ଲେଖିଲେ କନିଷ୍ଠ ଡାକ୍ତର, ଲୋଡିଲେ ହସ୍ତକ୍ଷେପ
କୋଲକାତା: ପଶ୍ଚିମବଙ୍ଗର ରାଜଧାନୀ କୋଲକାତାର ଆରଜି କର ମେଡିକାଲ କଲେଜ ଆଣ୍ଡ ହସ୍ପିଟାଲରେ ଜଣେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାକୁ ବିରୋଧ କରି ଜୁନିୟର ଡାକ୍ତରମାନେ ୩୫ ଦିନ ଧରି ଆନ୍ଦୋଳନ ଚଳାଇଛନ୍ତି। ସେମାନଙ୍କ ଦାବି ନେଇ ଡାକ୍ତର ଓ ବେଙ୍ଗଲ ସରକାରଙ୍କ ମଧ୍ୟରେ ସହମତି ହୋଇନାହିଁ। ସେଥିପାଇଁ ସେମାନଙ୍କ ପ୍ରଦର୍ଶନ ଜାରି ରହିଛି। ଗୁରୁବାର ଦିନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଡାକ୍ତରମାନଙ୍କୁ ତୃତୀୟ ଥର ପାଇଁ ଆଲୋଚନା ପାଇଁ ଡାକିଥିଲେ।
କିନ୍ତୁ ଡାକ୍ତର ବୈଠକର ସିଧା ପ୍ରସାରଣ ପାଇଁ ଜିଦ୍ ଧରିଥିଲେ। ତେଣୁ ବୈଠକ ହୋଇପାରିନଥିଲା। ଏହାପରେ ମମତା ବାନାର୍ଜୀ ଏକ ସାମ୍ବାଦିକ ସମ୍ମିଳନୀ କରି ଇସ୍ତଫା ଦେବାକୁ ପ୍ରସ୍ତୁତ ଥିବା କହିଛନ୍ତି। ଅନ୍ୟପକ୍ଷରେ ଆନ୍ଦୋଳନରତ ଡାକ୍ତରମାନେ ଶୁକ୍ରବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଏହି ମାମଲାରେ ହସ୍ତକ୍ଷେପ କରିବାକୁ ଅନୁରୋଧ କରିଛନ୍ତି।
ଚିଠିରେ ଡାକ୍ତରମାନେ ଲେଖିଛନ୍ତି- “ଦେଶର ମୁଖ୍ୟ ହିସାବରେ ଆମେ ଆମର ସମସ୍ୟାକୁ ଆପଣଙ୍କ ଆଗରେ ରଖୁଛୁ, ଯାହାଦ୍ୱାରା ସବୁଠାରୁ ଜଘନ୍ୟ ଅପରାଧର ଶିକାର ହୋଇଥିବା ଆମର ଦୁର୍ଭାଗ୍ୟଜନକ ସହଯୋଗୀ ନ୍ୟାୟ ପାଇପାରିବେ । ଏଥିସହ ପଶ୍ଚିମବଙ୍ଗ ସ୍ୱାସ୍ଥ୍ୟ ବିଭାଗ ଅଧୀନରେ ଆମେ ସ୍ୱାସ୍ଥ୍ୟକର୍ମୀମାନେ ବିନା ଭୟ ଓ ଆଶଙ୍କାରେ ଜନସାଧାରଣଙ୍କ ପ୍ରତି କର୍ତ୍ତବ୍ୟ ନିର୍ବାହ କରିପାରିବା। ଏହି କଠିନ ସମୟରେ ଆପଣଙ୍କ ଉପସ୍ଥିତି ଆମ ସମସ୍ତଙ୍କ ପାଇଁ ଆଲୋକର ଆଲୋକ ପାଲଟିବ ଏବଂ ଆଖପାଖ ଅନ୍ଧାରରୁ ବାହାରିବାର ବାଟ ଦେଖାଇବ।”
ପଶ୍ଚିମବଙ୍ଗର ମୁଖ୍ୟ ଶାସନ ସଚିବ ମନୋଜ ପନ୍ତ ଗୁରୁବାର ଅପରାହ୍ନ ୫ଟାରେ ଆନ୍ଦୋଳନରତ ଡାକ୍ତରମାନଙ୍କୁ ରାଜ୍ୟ ସଚିବାଳୟରେ ଏକ ବୈଠକ ପାଇଁ ଡାକିଥିଲେ। ଅପରାହ୍ନ ୫ଟା ୨୫ରେ ଡାକ୍ତର ପହଞ୍ଚିଥିଲେ। ଏହି ବୈଠକ ପାଇଁ ସରକାର ୧୫ ଜଣିଆ ଡାକ୍ତରଙ୍କ ପ୍ରତିନିଧି ଦଳକୁ ଅନୁମୋଦନ କରିଥିଲେ। ତେବେ ଏହି ପ୍ରତିନିଧି ଦଳରେ ୩୦ ଜଣ ସଦସ୍ୟ ଥିଲେ। ବୈଠକର ସିଧା ପ୍ରସାରଣ ଦାବିରେ ଡାକ୍ତରମାନେ ଅଟଳ ରହିଥିଲେ। ତେଣୁ ବୈଠକ ହୋଇପାରିନଥିଲା।
