ଓଡ଼ିଶା ଭାସ୍କର ପକ୍ଷରୁ ‘ମା’ ତୁଝେ ସଲାମ’ କାର୍ଯ୍ୟକ୍ରମ

ସହିଦଙ୍କୁ ଦିଆଗଲା ଶ୍ରଦ୍ଧାଞ୍ଜଳି

0 452

ଭୁବନେଶ୍ୱର,୧୫ା୮(ଓଡ଼ିଶା ଭାସ୍କର) : ଆଜି ସାରା ଦେଶବ୍ୟାପୀ ପାଳନ ହେଉଛି ୭୪ତମ ସ୍ୱାଧୀନତା ଦିବସ । ଏନେଇ ସାରା ଦେଶ ତଥା ରାଜ୍ୟରେ ଉତ୍ସାହ ଦେଖାଦେଇଛି । କରୋନା ମହାମାରୀ ସତ୍ତେ୍ୱ ସାମାଜିକ ଦୂରତ୍ୱକୁ ବଜାୟ ରଖି ସାରା ଦେଶ ଆଜି ପାଳନ କରିଛି ସ୍ୱାଧୀନତା ଦିବସ । ତେବେ ଏହି ଅବସରରେ ଦୈନିକ ସମ୍ବାଦପତ୍ର ‘ଓଡ଼ିଶା ଭାସ୍କର’ ପକ୍ଷରୁ ଦେଶମାତୃକା ପାଇଁ ବଳିଦାନ ଦେଇଥିବା ଓଡ଼ିଆ ସହିଦଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିବା ସହିତ ସହିଦଙ୍କ ପରିବାରବର୍ଗଙ୍କୁ ସମ୍ମାନିତ କରିବା ଉଦ୍ଦେଶ୍ୟରେ ମା’ ତୁଝେ ସଲାମ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । କୋଭିଡ଼-୧୯ ଗାଇଡ଼ଲାଇନ ପାଳନ କରିବା ସହ ଏହି କାର୍ଯ୍ୟକ୍ରମକୁ ଭିଡ଼ିଓ କନଫରେନ୍ସିଂ ମାଧ୍ୟମରେ ପାଳନ କରାଯାଇଛି । ଏହି ଅବସରରେ ୩୦ଟି ଜିଲ୍ଲାର ଜିଲ୍ଲା ପ୍ରତିନିଧିମାନେ ଭିଡ଼ିଓ କନଫରେନ୍ସି ମାଧ୍ୟମରେ ଯୋଗ ଦେଇଥିଲେ । ମୁଖ୍ୟ ଅତିଥି ଭାବେ ଭାରତୀୟ ସେନାର ଲେଫ୍ଟନାଣ୍ଟ ଜେନେରାଲ ନାରାୟଣ ମହାନ୍ତି, ସମ୍ମାନିତ ଅତିଥି ଭାବେ ୱେବ ମାଧ୍ୟମରେ ଏନଡ଼ିଆରଏଫ ଡିଜି ସତ୍ୟନାରାୟଣ ପ୍ରଧାନ, ଭାରତୀୟ ବାୟୁସେନାର ଗ୍ରୁପ୍ କ୍ୟାପ୍ଟେନ ଡୋମିନିକ୍ ରିୟାନ ଯୋଗ ଦେଇଥିଲେ । ଏହି ଅବସରରେ ଦେଶ ପାଇଁ ସହିଦ ହୋଇଥିବା ମୟୁରଭଞ୍ଜର ଓଡ଼ିଆ ପୁଅ ନୁଦୁରାମ ସୋରେନ ଓ କନ୍ଧମାଳ ଜିଲ୍ଲାର ସହିଦ ଚନ୍ଦ୍ରକାନ୍ତ ପ୍ରଧାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯିବା ସହ ସେମାନଙ୍କ ପରିବାରବର୍ଗଙ୍କୁ ଓଡ଼ିଶା ଭାସ୍କର ପକ୍ଷରୂ ସମ୍ମାନିତ କରାଯାଇଥିଲା । ଏହାସହିତ ଆମ ସହିତ ଦୀର୍ଘ ଦିନ ଧରି କାର୍ଯ୍ୟକରିଆସୁଥିବା ତଥା ଖୋର୍ଦ୍ଧା ଜିଲ୍ଲା ପ୍ରତିନିଧି ସତ୍ୟନାରାୟଣ ଦାଶ ଓ କାଳିଆପାଣି ପ୍ରତିନିଧି ମଧୁପରଂଜନ ନନ୍ଦଙ୍କୁ ଶ୍ରେଷ୍ଠ ସାମ୍ବାଦିକ ଭାବେ ସମ୍ମାନିତ କରାଯାଇଥିଲା ।ଓଡିଶା ଭାସ୍କର ପରିଚାଳନା ନିର୍ଦେଶକ ମଧୁ ମହାନ୍ତି ସ୍ୱାଗତ ଅଭିଭାଷଣ ରଖିଥିବା ବେଳେ ଓଡିଶା ଭାସ୍କର ବ୍ୟୁରୋ ଚିଫ କୌସ୍ତୁଭ ଦାସ ଅତିଥି ପରିଚୟ ପ୍ରଦାନ କରିଥିଲେ।

Leave A Reply

Your email address will not be published.