ଗୋବିନ୍ଦ ସହ ଅନ୍ୟ ଶିକ୍ଷୟିତ୍ରୀଙ୍କ ପରକୀୟା ପ୍ରୀତିର ଭିଡିଓ ଥିଲା ମମିତାଙ୍କ ପାଖରେ, ଭାଇରାଲ୍ ଧମକ ଯୋଗୁଁ କରାଯାଇଥିଲା ହତ୍ୟା

ଭୁବନେଶ୍ୱର(ଓଡ଼ିଶା ଭାସ୍କର): କଳାହାଣ୍ଡି ମହାଲିଙ୍ଗ ସନସାଇନ୍ ପବ୍ଲିକ ସ୍କୁଲ ଅଧ୍ୟକ୍ଷା ମମିତା ମେହେରଙ୍କ ହତ୍ୟା ଘଟଣାରେ ପ୍ରତି ମୁହୂର୍ତ୍ତରେ ନୂଆ ନୂଆ ଖୁଲାସା ହେଉଛି । ତେବେ ଗୋବିନ୍ଦକୁ ପୋଲିସ ରିମାଣ୍ଡରେ ଆଣିବା ପରେ ଆଜି ଭୋର ୪ଟାରୁ ସିନ୍ ରିକ୍ରିଏସନ୍ କରାଇଛି । ୨୦ରୁ ୨୫ ମିନିଟର ଏହି ଡେମୋରେ ମମିତାଙ୍କୁ ଗୋବିନ୍ଦ କିପରି ହତ୍ୟା କରିଥିଲା, ତାହାର ଡେମୋ ଦେଖାଇଥିଲା ।

ତେବେ ଜଣାପଡ଼ିଛି ଯେ, ମମିତାଙ୍କ ପାଖରେ ଗୋବିନ୍ଦର ପରକୀୟା ପ୍ରୀତିର ଭିଡିଓ ରହିଥିଲା । ମମିତା ଉକ୍ତ ଭିଡିଓକୁ ସର୍ବସମ୍ମୁଖକୁ ଆଣିବାକୁ ଧମକ ଦେବାରୁ ତାଙ୍କୁ ହତ୍ୟା କରାଯାଇଥିଲା । ସ୍କୁଲର ଅନ୍ୟ ଦୁଇଜଣ ଶିକ୍ଷୟିତ୍ରୀଙ୍କ ଖୁବ ନିକଟତର ହୋଇଥିଲା ଗୋବିନ୍ଦ । ଏପରିକି ମମିତାଙ୍କୁ ଅଧ୍ୟକ୍ଷା ପଦରୁ ହଟାଇବାକୁ ପ୍ରସ୍ତୁତ ହୋଇଥିଲା ଯୋଜନା । ସ୍କୁଲର ହଷ୍ଟେଲକୁ ମୋବାଇଲ ବ୍ୟବହାର ନିଷେଧ ଥିଲେ ହେଁ କିଛି ଯୁବତୀ ମୋବାଇଲ ବ୍ୟବହାର କରୁଥିବା ଦେଖିବାକୁ ମିଳିଥିଲା । ତେବେ ଇତିମଧ୍ୟରେ ଜଣେ ଶିକ୍ଷୟିତ୍ରୀଙ୍କ ସହ ଗୋବିନ୍ଦର ଅବୈଧ ସଂପର୍କର ଭିଡିଓ ମମିତାଙ୍କ ହାତରେ ପଡ଼ିଥିଲା । ଏହାକୁ ଭାଇରାଲ କରିବା ପାଇଁ ମମିତା ଗୋବିନ୍ଦକୁ ଧମକ ଦେଉଥିଲେ । ଉଭୟଙ୍କ ମଧ୍ୟରେ ଏହି ଘଟଣାକୁ ନେଇ କିଛି ମାସ ଧରି ବିବାଦ ଲାଗି ରହିଥିଲା । ଏପରିକି ଗତ ଜୁଲାଇ ମାସରେ ଦୁହିଁଙ୍କ ମଧ୍ୟରେ ଏନେଇ ପାଟିତୁଣ୍ଡ ହୋଇଥିଲା । ଗୋବିନ୍ଦକୁ ବର୍ବାଦ କରିଦେବେ ବୋଲି ମମିତା ଧମକ ଦେଇଥିଲେ । ବହୁତ ବୁଝାଇବା ପରେ ମମିତା ନ ବୁଝିବାରୁ ପ୍ରତିଶୋଧପରାୟଣ ହୋଇ ଗୋବିନ୍ଦ ମମିତାଙ୍କୁ ରାସ୍ତାକୁ ହଟାଇ ଦେଇଥିଲା ।