ମର୍ମନ୍ତୁଦ ସଡ଼କ ଦୁର୍ଘଟଣା: ଓଲଟିଲା ପ୍ରବାସୀ ବୋଝେଇ ବସ୍, ୧୮ଜଣଙ୍କ ମୃତ୍ୟୁ, ୨୯ ଆହତ
ନୂଆଦିଲ୍ଲୀ: ଶୁକ୍ରବାର ମେକ୍ସିକୋରେ ଭେନେଜୁଏଲା ଏବଂ ହାଇତିରୁ ପ୍ରବାସୀମାନଙ୍କୁ ନେଇ ଯାଉଥିବା ଏକ ବସ୍ ଓଲଟି ପଡିଛି। ଏହି ଦୁର୍ଘଟଣାରେ ଦୁଇ ମହିଳା ଏବଂ ତିନି ଶିଶୁଙ୍କ ସମେତ ମୋଟ ୧୮ ଜଣଙ୍କର ମୃତ୍ୟୁ ହୋଇଛି। AFP ରିପୋର୍ଟ ଅନୁଯାୟୀ, ଓକ୍ସାକା ଏବଂ ପଡୋଶୀ ରାଜ୍ୟ ପୁଏବଲାକୁ ସଂଯୋଗ କରୁଥିବା ରାଜପଥରେ ଏହି ଦୁର୍ଘଟଣା ଘଟିଛି।
ପଡୋଶୀ ମେକ୍ସିକୋ ରାଜ୍ୟ ପୁଏବଲା ସୀମା ନିକଟରେ ଅବସ୍ଥିତ ଟେପେଲାମେ ସହରରେ ଏହି ବସ୍ ଦୁର୍ଘଟଣା ଘଟିଛି। ସ୍ଥାନୀୟ ଅଧିକାରୀଙ୍କ କହିବା ଅନୁଯାୟୀ ବସ୍ ଦୁର୍ଘଟଣାରେ ମୋଟ ୨୯ ଜଣ ଆହତ ହୋଇଛନ୍ତି। ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ମେକ୍ସିକୋର ନ୍ୟାସନାଲ ଇମିଗ୍ରେସନ ଏଜେନ୍ସି କହିଛି ଯେ, ବସ୍ରେ ୫୫ ଜଣ ବିଦେଶୀ ନାଗରିକ ଅଛନ୍ତି। ଏଥିରେ କୁହାଯାଇଛି ଯେ, ପୀଡିତଙ୍କ ମଧ୍ୟରେ ପେରୁ ଅଞ୍ଚଳର ଲୋକ ମଧ୍ୟ ଅଛନ୍ତି।
ଆମେରିକା ଯାଉଥିବା ପ୍ରବାସୀମାନଙ୍କ ସହିତ ଏହା ଏକ ନୂଆ ଦୁର୍ଘଟଣା। ଆମେରିକା-ମେକ୍ସିକୋ ସୀମାରେ ପହଞ୍ଚିବା ପାଇଁ ବିଭିନ୍ନ ଦେଶରୁ ହଜାର ହଜାର ପ୍ରବାସୀ ବସ୍, ଟ୍ରଲର ଏବଂ ଟ୍ରେନରେ ଯାତ୍ରା କରନ୍ତି। ଗତ ରବିବାର ଦିନ କ୍ୟୁବା ପ୍ରବାସୀମାନଙ୍କୁ ନେଇ ଯାଉଥିବା ଏକ ମାଲବାହୀ ଟ୍ରକ ଚିଆପାସରେ ଓଲଟି ପଡିବାରୁ ଅତି କମରେ ୧୦ ଜଣ କ୍ୟୁବା ପ୍ରବାସୀଙ୍କର ମୃତ୍ୟୁ ଘଟିଥିବା ବେଳେ ୨୫ ଜଣ ଆହତ ହୋଇଥିଲେ। ମେକ୍ସିକୋ ନ୍ୟାସନାଲ ଇମିଗ୍ରେସନ୍ ଇନଷ୍ଟିଚ୍ୟୁଟ୍ କହିଛି ଯେ, ସମସ୍ତ ମୃତ କ୍ୟୁବା ପ୍ରବାସୀ ମହିଳା ଏବଂ ସେମାନଙ୍କ ମଧ୍ୟରୁ ଜଣେ ୧୮ ବର୍ଷରୁ କମ୍।