ବିଜେପିକୁ ଶକ୍ତ ଝଟକା: ଇସ୍ତଫା ଦେଲେ ମନ୍ତ୍ରୀ ଧର୍ମ ସିଂ ସାଇନି, ନିର୍ବାଚନ ପୂର୍ବରୁ ଗଲେଣି ୧୨ ବିଧାୟକ

ଲଖନଉ: ଉତ୍ତରପ୍ରଦେଶ ବିଧାନସଭା ନିର୍ବାଚନ ଆରମ୍ଭ ହେବା ପୂର୍ବରୁ ଦଳ-ବଦଳ ରାଜନୀତି ଆରମ୍ଭ ହୋଇଛି । ଏହାରି ମଧ୍ୟରେ ବିଜେପି ବିଧାୟକ ତଥା ଆୟୁଷ ମନ୍ତ୍ରୀ ଡାକ୍ତର ଧର୍ମ ସିଂ ସାଇନି ଇସ୍ତଫା ଦେଇ ହଇଚଇ ସୃଷ୍ଟି କରିଛନ୍ତି । ଦଳ ଛାଡ଼ିଛନ୍ତି ମନ୍ତ୍ରୀ ଧର୍ମ ସିଂହ ସାଇନି । ସେ ସମାଜବାଦୀ ପାର୍ଟି ଯିବେ ବୋଲି ସୂଚନା ମିଳିଛି । ଧର୍ମ ସିଂ ନିଜ ପଦରୁ ଇସ୍ତଫା ଦେଇଛନ୍ତି । ଇସ୍ତଫା ଦେବା ପରେ ସେ ସପା ଅଧ୍ୟକ୍ଷ ଅଖିଳେଶ ଯାଦବଙ୍କ ସହିତ ସାକ୍ଷାତ କରିଛନ୍ତି । ଏହା ସହ ୨ ମନ୍ତ୍ରୀ ଓ ଅନ୍ୟ କେତେକ ବିଧାୟକ ମଧ୍ୟ ୧୪ରେ ଇସ୍ତଫା ଦେଇପାରନ୍ତି ବୋଲି ଧର୍ମ ସିଂହ କହିଛନ୍ତି ।

କୁହାଯାଉଛି ଯେ, ସିହାରନପୁରର ନକୁଡ଼ ସିଟରୁ ବିଜେପି ବିଧାୟକ ଧର୍ମ ସିଂ ତାଙ୍କ ସରକାରୀ ବାସଭବନ ଓ ସିକ୍ୟୁରିଟି ତ୍ୟାଗ କରିଛନ୍ତି । ସେ ବି ସ୍ୱାମୀ ପ୍ରସାଦ ମୌର୍ଯ୍ୟ ଓ ଦାରା ସିଂହ ଚୌହ୍ୱାନଙ୍କ ପରି ମନ୍ତ୍ରୀ ପଦ ଛାଡ଼ିଛନ୍ତି । ତେବେ ବର୍ତ୍ତମାନ ସୁଦ୍ଧା ୩ ମନ୍ତ୍ରୀ ଓ ୧୧ ବିଧାୟକ ଇସ୍ତଫା ଦେଇସାରିଛନ୍ତି । ଧର୍ମ ସିଂହ ନିଜର ଇସ୍ତଫାପତ୍ରରେ ଲେଖିଛନ୍ତି ଯେ, ‘ ଆୟୁଷ ମନ୍ତ୍ରୀ ଭାବେ ମୁଁ ସମ୍ପୂର୍ଣ୍ଣ ସହଯୋଗ କରି ନିଜ ବିଭାଗର ଉନ୍ନତି ପାଇଁ କାମ କରିଥିଲି । କିନ୍ତୁ ପଛୁଆ, ବଞ୍ଚିତ, ଦଳିତ, କୃଷକ ଓ ବେରୋଜଗାରଙ୍କୁ ଅତ୍ୟଧିକ ଅବହେଳିତ ମନୋଭାବ ସହିତ ଦଳିତମାନଙ୍କ ସଂରକ୍ଷଣକୁ ନେଇ ସରକାର ଖେଳୁଛନ୍ତି । ଏଥିରେ ଆଘାତ ହୋଇ ମୁଁ ଉତ୍ତରପ୍ରଦେଶ ମନ୍ତ୍ରୀମଣ୍ଡଳରୁ ଇସ୍ତଫା ଦେଉଛି ।’