ଇବ୍ରାହିମ ରାଇସିଙ୍କ ମୃତ୍ୟୁ ପରେ ଇରାନର କାର୍ଯ୍ୟକାରୀ ରାଷ୍ଟ୍ରପତି ଭାବେ ନିଯୁକ୍ତ ହେଲେ ମହମ୍ମଦ ମୋଖବର

ନୂଆଦିଲ୍ଲୀ: ହେଲିକପ୍ଟର ଦୁର୍ଘଟଣାରେ ଇବ୍ରାହିମ ରାଇସିଙ୍କ ମୃତ୍ୟୁ ପରେ ଇରାନର କାର୍ଯ୍ୟକାରୀ ରାଷ୍ଟ୍ରପତି ଭାବେ ନିଯୁକ୍ତ ହେଲେ ମହମ୍ମଦ ମୋଖବର। ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲୀ ଖାମେନି ସୋମବାର ଏହି ଘୋଷଣା କରିଛନ୍ତି। ଇରାନର ବୈଦେଶିକ ମନ୍ତ୍ରୀ ହୋସେନ୍ ଅମିରାବ୍ଦୋଲ୍ଲାହିଆନ୍, ପୂର୍ବ ଆଜରବାଇଜାନ ପ୍ରଦେଶର ଗଭର୍ଣ୍ଣର ଏବଂ ଅନ୍ୟ ଅଧିକାରୀ ଓ ଅଙ୍ଗରକ୍ଷୀଙ୍କୁ ନେଇ ଯାଉଥିବା ହେଲିକପ୍ଟର ରବିବାର ଦେଶର ଉତ୍ତର-ପଶ୍ଚିମ ପାହାଡ଼ିଆ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଛି। ଦୀର୍ଘ ଘଣ୍ଟାର ଖୋଜାଖୋଜି ପରେ ସୋମବାର ଏହି ହେଲିକପ୍ଟରକୁ ଉତ୍ତର-ପଶ୍ଚିମ ଇରାନରୁ ମିଳିଥିଲା।

ରାଇସିଙ୍କ ବିୟୋଗରେ ଖାମେନି ଏକ ଶୋକବାର୍ତ୍ତାରେ ଉପରାଷ୍ଟ୍ରପତି ଅନ୍ତରୀଣ ଦାୟିତ୍ୱ ଗ୍ରହଣ କରିବେ ବୋଲି ଘୋଷଣା କରିଛନ୍ତି। ଇରାନର ସର୍ବୋଚ୍ଚ ନେତା ମଧ୍ୟ ଏହି ବାର୍ତ୍ତାରେ ୫ ଦିନିଆ ଶୋକ ଘୋଷଣା କରିଛନ୍ତି। ସମ୍ବିଧାନର ଧାରା ୧୩୧ ଅନୁଯାୟୀ ମୋଖବର କାର୍ଯ୍ୟନିର୍ବାହୀ ଶାଖାର ନେତୃତ୍ୱ ନେଉଛନ୍ତି ବୋଲି ଖାମେନି ଏକ ବିବୃତିରେ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ମୋଖବରଙ୍କୁ ସର୍ବାଧିକ ୫୦ ଦିନ ମଧ୍ୟରେ ବିଧାନସଭା ଓ ନ୍ୟାୟିକ ମୁଖ୍ୟଙ୍କ ସହ ରାଷ୍ଟ୍ରପତି ନିର୍ବାଚନ ପାଇଁ ପ୍ରସ୍ତୁତ ହେବାକୁ ପଡ଼ିବ।

ଇରାନର ସମ୍ବିଧାନ ଅନୁଯାୟୀ, ଇରାନର ଉପରାଷ୍ଟ୍ରପତି ସର୍ବୋଚ୍ଚ ନେତାଙ୍କ ଅନୁମୋଦନ କ୍ରମେ କ୍ଷମତା ଗ୍ରହଣ କରନ୍ତି, ଯଦି ରାଷ୍ଟ୍ରପତିଙ୍କ ମୃତ୍ୟୁ ହୁଏ ଏବଂ ୫୦ ଦିନ ମଧ୍ୟରେ ନୂତନ ରାଷ୍ଟ୍ରପତି ନିର୍ବାଚନ କରାଯିବ। ୨୦୨୫ରେ ଇରାନରେ ରାଷ୍ଟ୍ରପତି ନିର୍ବାଚନ ହେବାର ଥିଲା। ରବିବାର ସକାଳେ ଇରାନ ରାଷ୍ଟ୍ରପତି ଆଜରବାଇଜାନର ରାଷ୍ଟ୍ରପତି ଇଲହାମ ଅଲିୟେଭଙ୍କ ସହ ଡ୍ୟାମ ଉଦଘାଟନ କରିବା ପାଇଁ ଆଜରବାଇଜାନ ସୀମାରେ ଥିଲେ । ଆଜରବାଇଜାନ ସୀମା ନିକଟରେ ଥିବା ଜୋଲଫା ନିକଟରେ ତାଙ୍କ ହେଲିକପ୍ଟର ହାର୍ଡ ଲ୍ୟାଣ୍ଡିଂ କରିଥିଲା। ତାଙ୍କ ବିୟୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବିଶ୍ୱର ଅନେକ ନେତା ଗଭୀର ଶୋକ ପ୍ରକାଶ କରିଛନ୍ତି।