ମେଡିକାଲ ପିଜି ପାଇଁ ଏଥର ଦେବାକୁ ପଡିବ ନେକ୍ସଟ ପରୀକ୍ଷା, ନହେଲେ ମିଳିବ ନାହିଁ..
ଭୁବନେଶ୍ୱର: ଏଣିକି ପିଜିରେ ନାମ ଲେଖେଇବା ପାଇଁ ଆଉ ନିଟ ପରୀକ୍ଷା ଦେବାକୁ ପଡିବ ନାହିଁ । ଆସନ୍ତା ବର୍ଷରୁ ଏହି ନୂତନ ନିୟମ ଲାଗୁ ହେବାକୁ ଯାଉଛି । ଏହା ପରିବର୍ତ୍ତେ ଶେଷ ବର୍ଷ ମେଡିକାଲ ପଢ଼ୁଥିବା ଛାତ୍ରଛାତ୍ରୀ ମାନେ ନେକ୍ସଟ (National Exit Test)ପରୀକ୍ଷା ଦେବେ । ତେବେ ଏହା ଆଗରୁ ଯେଉଁମାନେ ବିଦେଶରେ ମେଡିକାଲ ପାଠ ପଢ଼ି ଭାରତରେ ପ୍ରାକ୍ଟିସ କରିବାକୁ ଚାହୁଁଥିଲେ ତାଙ୍କ ପାଇଁ ଏଫଏମଜିଇ ପରୀକ୍ଷା ଦେବାକୁ ପଡୁଥିଲା କିନ୍ତୁ ଏବେ ଏହି ପରୀକ୍ଷା ସମସ୍ତଙ୍କ ପାଇଁ ବାଧ୍ୟତାମୂଳକ କରାଯାଇଛି ।
୨୦୨୩ ଶିକ୍ଷା ବର୍ଷରୁ ଉଭୟ ଭାରତ ଏବଂ ଭାରତ ବାହାର ଯେଉଁମାନେ ମେଡିକାଲ ଶିକ୍ଷା ଗ୍ରହଣ କରି ଫେରୁଛନ୍ତି ସେମାନଙ୍କ ପାଇଁ ନେକ୍ସଟ ପରୀକ୍ଷା ବାଧ୍ୟତାମୂଳକ କରାଯାଇଛି । ସ୍ନାତକୋତ୍ତର ପରୀକ୍ଷା ପାଇଁ ଜାତୀୟ ଯୋଗ୍ୟତା ପ୍ରବେଶ ପରୀକ୍ଷା NEXT ଦ୍ୱାରା ବଦଳାଇବାକୁ ଯୋଜନା କରାଯାଇଛି। ପ୍ରସ୍ତାବିତ ନିୟମଗୁଡ଼ିକରେ ଦର୍ଶାଯାଇଛି ଯେ NEXT ଦୁଇଟି ପୃଥକ ପରୀକ୍ଷଣ ଭାବରେ ବ୍ୟବହୃତ ହେବ ଯାହାକୁ ‘ଷ୍ଟେପ୍’ ଦ୍ୱାରା ବିଭକ୍ତ କରାଯାଇଛି। ଷ୍ଟେପ୍ ୧ ପାଇଁ ପରୀକ୍ଷା ଡିସେମ୍ବର ଦ୍ୱିତୀୟ ସପ୍ତାହରେ ହେବ ଏବଂ ଷ୍ଟେପ୍ ୨ ପାଇଁ ବ୍ୟବହାରିକ ପରୀକ୍ଷା ମାର୍ଚ୍ଚ ଦ୍ୱିତୀୟ ସପ୍ତାହରେ ହେବ।
ଯେଉଁଭଳି ବିଏଡ କରିବା ପରେ ଶିକ୍ଷକତା ପାଇଁ ଓଟିଇଟି କ୍ଲିୟର କରିବା ନିହାତି ଭାବରେ ଆବଶ୍ୟକ ଠିକ ସେହିଭଳି ନେକ୍ସଟ-୨ ପରୀକ୍ଷାରେ ସଫଳ ହେବା ପରେ ହିଁ ଛାତ୍ରଛାତ୍ରୀ ମାନେ ଯୋଗ୍ୟ ବିବେଚିତ ହୋଇ ଲାଇସେନ୍ସ ପାଇପାରିବେ । ଏହି ପରୀକ୍ଷା ଉତ୍ତୀର୍ଣ୍ଣ ହେବା ପରେ ପିଜି କରିବା ପାଇଁ ଯୋଗ୍ୟତା ଅର୍ଜନ କରିବେ। ମେଡିକାଲ ଗ୍ରାଜୁଏଟ ମାନେ ଏକା ସହିତ ନେକ୍ସଟ ପରୀକ୍ଷା ଦେଇ ପାରିବେ।
ଯଦି ପ୍ରାର୍ଥୀ MBBS ପ୍ରୋଗ୍ରାମରେ ନାମ ଲେଖାଇବାର ଦଶ ବର୍ଷ ମଧ୍ୟରେ ଉଭୟ NEXT ଷ୍ଟେପ୍ ୧ ଏବଂ ଷ୍ଟେପ୍ ୨ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି, ତେବେ ସେମାନେ NEXT ଷ୍ଟେପ୍ ୧ ପରୀକ୍ଷାରେ କେତେ ଥର ଅଂଶଗ୍ରହଣ କରିପାରିବେ ସେଥିରେ କୌଣସି ପ୍ରତିବନ୍ଧକ ନାହିଁ। ଆପଣ ନିଜ ସ୍କୋରକୁ ବଢେଇବାକୁ କେତେଥର ଚେଷ୍ଟା କରିପାରିବେ ସେଥିରେ କୌଣସି ପ୍ରତିବନ୍ଧକ ନାହିଁ।