ଗାଜିଆବାଦରେ ଭୟାବହ ଅଗ୍ନିକାଣ୍ଡ, ଜଳିଗଲା ୩୦ ଚାଳ ଘର, ୪୯ ଗାଈ ମୃତ
ଗାଜିଆବାଦ: ଉତ୍ତର ପ୍ରଦେଶର ଗାଜିଆବାଦରୁ ଆସିଛି ବଡ ଖବର। ଏଠାକାର ଇନ୍ଦିରାପୁରମର କନାବନି ପୁସ୍ତା ରୋଡ୍ ଡୁବ ଅଞ୍ଚଳରେ ସ୍ଥିତ ଏକ ଚାଳ ଘରେ ଭୀଷଣ ଅଗ୍ନିକାଣ୍ଡ ଘଟିଛି। ଏହି କାରଣରୁ ନିକଟରେ ଥିବା ଏକ ଗୋଶାଳାରେ ଏ ପର୍ଯ୍ୟନ୍ତ ପ୍ରାୟ ୪୯ ଗାଈଙ୍କ ମୃତ୍ୟୁ ଘଟିଛି। ଛଅରୁ ଅଧିକ ଦମକଳ ଗାଡି ଦୁର୍ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାରେ ଜୁଟିଛନ୍ତି।
ଅଗ୍ନିକାଣ୍ଡ ଖବରରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ଅନେକ ଗାଈ ଜୀବନ୍ତ ଦଗ୍ଧ ହୋଇ ଯାଇଛନ୍ତି। ତେବେ ଗାଈଙ୍କ ସଠିକ୍ ସଂଖ୍ୟା ଜଣା ପଡିନାହିଁ। ଅଗ୍ନିକାଣ୍ଡ ଏତେ ଭୟାବହ ରହିଛି ଯେ, ଦେଖୁ ଦେଖୁ ପୂରା ବସ୍ତିକୁ ବ୍ୟାପି ଯାଇଛି। ଏ ପର୍ଯ୍ୟନ୍ତ କୌଣସି ମୃତାହତର ସୂଚନା ମିଳିନାହିଁ। ତେବେ ନିଆଁ ଲାଗିବାର କାରଣ ଏ ଯାଏଁ ସ୍ପଷ୍ଟ ହୋଇ ନାହିଁ।
ଶ୍ରୀ କୃଷ୍ଣ ସେବା ଗୋଶାଳା ଟ୍ରଷ୍ଟର ସଞ୍ଚାଳକ ସୁରଜଙ୍କ ଅନୁଯାୟୀ, ଦୁର୍ଘଟଣା ସମୟରେ ତାଙ୍କ ଗୋଶାଳାରେ ୧୦୦ରୁ ଅଧିକ ଗାଈ ଥିଲେ। ଏଥିରୁ ପ୍ରାୟ ୫୦ ଗାଈଙ୍କ ମୃତ୍ୟୁ ଘଟି ସାରିଲାଣି। ନିଆଁ ଏକ ଚାଳ ଘରେ ଲାଗିଥିଲା। ଅଗ୍ନିକାଣ୍ଡରେ ୩୦ରୁ ଅଧିକ ଚାଳଛପର ଘର ଜଳିପୋଡି ଛାରଖାର ହୋଇ ଯାଇଛି। ଏହି ସମୟରେ ୩ ସିଲିଣ୍ଡର ଫୁଟିଥିବା ସେ କହିଛନ୍ତି।
