ପେଟ୍ରୋଲରେ ପାଣି ! ପେଟ୍ରୋଲ ପମ୍ପରେ ଆଗରେ ଗ୍ରାହକଙ୍କ ଉତ୍ତେଜନା, ସ୍ପଷ୍ଟୀକରଣ ନ ଦେଇ ଲୁଚିଲେ ମ୍ୟାନେଜର
ଭଞ୍ଜନଗର, (ଭାସ୍କର ନ୍ୟୁଜ୍) : ପେଟ୍ରୋଲରେ ମିଶିଛି ପାଣି । ଗାଡ଼ିରେ ପକାଇ ଗ୍ରାହକ ହେଲେ ହଟହଟା । ଗଂଜାମ ଜିଲ୍ଲା ବେଲଗୁଣ୍ଠା ବ୍ଳକ୍ର ଗାଙ୍ଗପୁର ପେଟ୍ରୋଲ ପମ୍ପ ରେ ଏଭଳି ପାଣି ମିଶାଇ ପେଟ୍ରୋଲ ଦିଆଯାଉଥିବା ଅଭିଯୋଗ ଆଣିଛନ୍ତି କିଛି ଗ୍ରାହକ । ଏନେଇ ପେଟ୍ରୋଲ ପମ୍ପ ଆଗରେ କିଛି ସମୟ ପର୍ଯ୍ୟନ୍ତ ଚାପା ଉତ୍ତେଜନା ଦେଖିବାକୁ ମିଳିଥିଲା । ରବିବାର ଦିନ କିଛି ଚାରିଚକିଆ ଓ ମୋଟର ସାଇକେଲ ରେ ପେଟ୍ରୋଲ ପକାଇଥିବା ଗ୍ରାହକଙ୍କ ନଜରକୁ ଆସିଥିଲା ଏଭଳି ଘଟଣା ।
ଗାଡ଼ିରେ ପେଟ୍ରୋଲ ପକାଇଥିବା ଗ୍ରାହକ ମାନଙ୍କ ଗାଡ଼ି କିଛି ରାସ୍ତା ଯିବା ପରେ ଗାଡିରେ ତ୍ରୃଟି ଦେଖାଦେଇଥିଲା । ଗାଡ଼ି ଚାଲିନଥିଲା । ଗୋଟିଏ ପରେ ଗୋଟିଏ ଗାଡ଼ିରେ ଏଭଳି ସମସ୍ୟା ଦେଖାଦେବାର ପରେ ଜଣା ପଡିଥିଲା। ପେଟ୍ରୋଲରେ ପାଣି ମିଶିଥିବା ଜାଣିପାରି ସବୁତକ ଗାଡ଼ି ଗାଙ୍ଗପୁର ପେଟ୍ରୋଲ ପମ୍ପରେ ପହଞ୍ଚିଥିଲେ। ପରେ ଘଟଣାସ୍ଥଳ ପେଟ୍ରୋଲ ପମ୍ପ କର୍ମଚାରୀ ଓ ଗ୍ରାହକ ମଧ୍ୟରେ କଥା କଟାକଟି ହୋଇଥିଲା। ଏହାକୁ ନେଇ ଘଟଣା ସ୍ଥଳରେ ଉତ୍ତେଜନା ଦେଖାଦେଇଛି ଦେଇଥିଲା । ଏ ସଂକ୍ରାନ୍ତରେ ପେଟ୍ରୋଲ ପମ୍ପ ମାଲିକ କିମ୍ବା ମ୍ୟାନେଜରଙ୍କ ପକ୍ଷରୁ କୈାଣସି ସ୍ପଷ୍ଟୀକରଣ ଦିଆଯାଇନଥିବା ବେଳେ ପେଟ୍ରୋଲ ରେ ପାଣି ମିଶିବା ଘଟଣା ଏବେ ସ୍ଥାନୀୟ ଗ୍ରାହକଙ୍କ ମହଲରେ ପେଟ୍ରୋଲ ପମ୍ପ ରେ ଦିଆଯାଉଥିବା ପେଟ୍ରୋଲ କୁ ନେଇ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ପେଟ୍ରୋଲ ର ଚଢ଼ାଉ ଦର ଗ୍ରାହକଙ୍କ ଚିନ୍ତା ବଢାଇ ଦେଇଥିବା ବେଳେ ପାଣି ମିଶାଇ ପେଟ୍ରୋଲ ଏବେ ପେଟ୍ରୋଲ ପମ୍ପ ର ସ୍ୱଚ୍ଛତା ଉପରେ ସନ୍ଦେହ ସୃଷ୍ଟି କରିଛି ।
