ବଦଳିଲା ‘ଅଗ୍ନିପଥ’ର ନଜାରା: ବିକ୍ଷୋଭକାରୀ ନୁହେଁ, ପୋଲିସ କରୁଛି ପଥରମାଡ, ଜାଣନ୍ତୁ ଘଟଣା
ନୂଆଦିଲ୍ଲୀ: ଦେଶରେ ଅଗ୍ନିପଥ ଯୋଜନାକୁ ନେଇ ବଢୁଥିବା ବିରୋଧକୁ ଲକ୍ଷ୍ୟ କରି ରାଜ୍ୟର ବିଭିନ୍ନ ସ୍ଥାନରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ତଥାପି ବିରୋଧ ଥମିବାର ନାଁ ନେଉନି । ସେପଟେ ରାଜସ୍ଥାନ ପୋଲିସ ଏବେ ଫୁଲ ଆକ୍ସନ ମୋଡକୁ ଆସିଛି । ଭରତପୁରରେ ଗତ କିଛି ଦିନ ମଧ୍ୟରେ ହୋଇଥିବା ଆକ୍ରମଣ ମାମଲାରେ ଏବେ କାଯର୍ଯ୍ୟାନୁଷ୍ଠାନ ନେଉଛି ପୋଲିସ । ସିସିଟିଭି ଫୁଟେଜ ଆଧାରରେ ବିକ୍ଷୋଭରେ ସାମିଲ ଥିବା ଯୁବକମାନଙ୍କୁ ଗିରଫ କରି ଚାଲିଛି ।
ସୂଚନା ଅନୁସାରେ, ଗତ ୧୭ ତାରିଖ ଭରତପୁର ରେଲୱେ ଷ୍ଟେସନରେ ପୋଲିସ ଏବଂ ଯୁବକଙ୍କ ମଧ୍ୟରେ ଖୁବ ପଥରମାଡ ହୋଇଥିଲା । ଏହି ଘଟଣାରେ ପୋଲିସର ଜଣ ଯବାନ ଗମ୍ଭୀର ଆହତ ହୋଇଛନ୍ତି । ତେବେ ଘଟଣାର ଭିଡିଓ ମିଳିବା ପରେ ପୋଲିସକୁ ନେଇ ଉଠିଥିଲା ଆଙ୍ଗୁଠି । ବିକ୍ଷୋଭ ପ୍ରଦର୍ଶନକାରୀଙ୍କ ଅଭିଯୋଗ ଅନୁଯାୟୀ, ସେମାନେ ଶାନ୍ତିପୂର୍ଣ୍ଣ ବିକ୍ଷୋଭ କରୁଥିବା ବେଳେ ପୋଲିସ ତରଫରୁ ପଥରମାଡ କରାଯାଇଥିଲା । ଯାହାର ଭିଡିଓ ଏବେ ସାମନାକୁ ଆସିଛି । ରେଳ ଲାଇନରେ ବିରୋଧ କରୁଥିବା ପ୍ରଦର୍ଶନକାରୀମାନଙ୍କ ଉପରେ ପୋଲିସର ଏକ ଟିମ ପଥରମାଡ କରିଥିବା ଏହି ଭିଡିଓରେ ଦେଖିବାକୁ ମିଳିଛି । ତେଣୁ ଏହାର ଜବାବରେ ବିକ୍ଷୋଭକାରୀମାନେ ମଧ୍ୟ ପୋଲିସ ଉପରକୁ ପଥରମାଡ କରିଥିଲେ ।
#Watch राजस्थान के भरतपुर में केन्द्र सरकार की अग्निपथ योजना के खिलाफ धरने पर बैठे प्रदर्शकारियों पर पहले पुलिसवालों ने पथराव शुरू किया था। पुलिस के इस रवैये को लेकर कई सवाल उठ रहे हैं। pic.twitter.com/h2anSTO2H9
— Hindustan (@Live_Hindustan) June 19, 2022
ତେବେ ଏହି ଘଟଣାକୁ ନେଇ ପ୍ରଶ୍ନ ଉଠିବାରୁ ରେଲୱେ ଲାଇନ ଉପରେ କବଜା କରି ଶହ ଶହ ଲୋକ ବିକ୍ଷୋଭ ପ୍ରଦର୍ଶନ କରୁଥିବା କହିଛନ୍ତି ସିଟି ସିଓ ସତୀଶ ବର୍ମା । ତେବେ ସେମାନଙ୍କୁ ସେଠାରୁ ହଟିବା ପାଇଁ କୁହାଯିବାରୁ ସେମାନେ ପୋଲିସ ଉପରକୁ ଆକ୍ରମଣ କରିଥିଲେ ବୋଲି କୁହାଯାଇଛି । ପୋଲିସ କଥାକୁ ବିରୋଧ କରି ପ୍ରଦର୍ଶନକାରୀମାନେ ପଥରମାଡ ଆରମ୍ଭ କରିଥିଲେ । ଏହି ପଥରମାଡରେ କିଛି ପୋଲିସକର୍ମୀ ଆହତ ହୋଇଥିବା ମଧ୍ୟ ସେ କହିଛନ୍ତି । ତେବେ ପୋଲିସ ସେମାନଙ୍କୁ ପଥରମାଡ କରିବା ଘଟଣାକୁ ସେ ମିଛ ବୋଲି ସଫେଇ ଦେଇଛନ୍ତି ।