(Video) ରାହୁଲଙ୍କ ଆଗରେ ଶୁଭିଲା ‘ଜୟ ଶ୍ରୀ ରାମ’, ‘ମୋଦୀ ମୋଦୀ’ ନାରା: ହଠାତ୍ ବସରୁ ଓହ୍ଲାଇ ଭିଡ଼ ଆଡ଼କୁ ମାଡ଼ିଗଲେ କଂଗ୍ରେସ ନେତା
ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧିଙ୍କ ନେତୃତ୍ୱରେ ‘ଭାରତ ଯୋଡ଼ ନ୍ୟାୟ ଯାତ୍ରା’ ଆଜି ଆସାମରେ ଯାତ୍ରା କରିଥିଲା । ତେବେ ରାଜ୍ୟର ସୋନିତପୁର ଜିଲ୍ଲାରେ ରାହୁଲଙ୍କ ବସ୍ ଆଗରେ ଲୋକଙ୍କର ପ୍ରବଳ ଭିଡ଼ ଦେଖିବାକୁ ମିଳିଥିଲା । ଲୋକମାନେ ହାତରେ ପତାକା ଧରି ‘ଜୟ ଶ୍ରୀ ରାମ’ ଓ ‘ମୋଦୀ ମୋଦୀ’ ନାରା ଦେଇଥିଲେ । ଏହି ଅବସରରେ ରାହୁଲ ବସରୁ ତଳକୁ ଓହ୍ଲାଇ ଭିଡ଼ ଭିତରକୁ ମାଡ଼ି ଯାଇଥିଲେ । ତାଙ୍କର ସୁରକ୍ଷାକର୍ମୀମାନେ ରାହୁଲଙ୍କୁ ବସକୁ ଫେରି ଯିବାକୁ କହିଥିଲେ ।
ତେବେ ରାହୁଲ ବସ ଭିତରେ ବସିଥିବା ସମୟରେ ଗହଳି ଭିତରୁ ‘ଜୟ ଶ୍ରୀ ରାମ’, ‘ମୋଦୀ ମୋଦୀ’ ନାରା ଶୁଣିବାକୁ ମିଳିଥିଲା । ଏହି ସମୟରେ ଧୀରସ୍ଥିର ଭାବେ ବସିଥିବା ରାହୁଲ ଅଚାନକ ବସରୁ ତଳକୁ ଓହ୍ଲାଇ ଭିଡ଼ ଭିତରକୁ ମାଡ଼ି ଯାଇଥିଲେ । ଏହି ଘଟଣାକୁ ନେଇ ରାହୁଲ ସୋସିଆଲ ମିଡ଼ିଆ ପ୍ଲାଟଫର୍ମ ଏକ୍ସ’ରେ ଏକ ପୋଷ୍ଟ ଶେୟାର କରିଥିବା ବେଳେ ବିଜେପି ନେତା ଅମିତ ମାଲବୀୟ ମଧ୍ୟ ଏକ ଭିଡିଓ ଶେୟାର କରିଛନ୍ତି ।
ସେହି ପୋଷ୍ଟରେ ଅମିତ ଲେଖିଛନ୍ତି, ରାହୁଲ ବସ ଭିତରେ ବସିଥିବା ବେଳେ ତାଙ୍କ ସାମ୍ନାରେ ଲୋକମାନେ ‘ଜୟ ଶ୍ରୀ ରାମ’, ‘ମୋଦୀ ମୋଦୀ’ ନାରା ଦେଇଥିଲେ । ଏହି ସମୟରେ ରାହୁଲ ନିଜର ଶାନ୍ତିଭାବ ହରାଇବା ସହ ଅଚାନକ ବସରୁ ତଳକୁ ଓହ୍ଲାଇ ପଡ଼ିଥିଲେ । ଏହି ସାମାନ୍ୟ ଘଟଣାରେ ରାହୁଲ ବହୁତ ପ୍ରତିକ୍ରିୟାଶୀଳ ହୋଇପଡ଼ିଥିଲେ । ତେବେ ଅଯୋଧ୍ୟାର ରାମ ମନ୍ଦିର ପ୍ରାଣ ପ୍ରତିଷ୍ଠା ଉତ୍ସବର ନିମନ୍ତ୍ରଣକୁ ହିନ୍ଦୁ ବିରୋଧୀ କଂଗ୍ରେସ ଅସ୍ୱୀକାର କରିଥିବା ବେଳେ ଆଗାମୀ ଦିନରେ ଦେଶର ଲୋକଙ୍କୁ ରାହୁଲ କିପରି ସାମ୍ନା କରିବେ ବୋଲି ଅମିତ ପ୍ରଶ୍ନ କରିଥିଲେ । ସୋନିତପୁର ଜିଲ୍ଲାରେ ଏହି ଯାତ୍ରା ସମୟରେ ତାଙ୍କର କାରକୁ ଆକ୍ରମଣ କରାଯାଇଥିବା ନେଇ କଂଗ୍ରେସ ନେତା ଜୟରାମ ରମେଶ ଅଭିଯୋଗ କରିବା ପରେ ଅମିତ ଏହି ଭିଡିଓ ଶେୟାର କରିଥିଲେ ।
Rahul Gandhi lost his cool after Jai Shri Ram and Modi Modi slogans were raised in his presence. If this is how rattled he is, how will he face the people of this country in days ahead, after the anti-Hindu Congress rejected the invite to be part of the Pran Pratistha in Ayodhya? pic.twitter.com/XsBX4elSBG
— Amit Malviya (@amitmalviya) January 21, 2024