ମୋଦୀ ସରକାରଙ୍କ ଏହି ନିଷ୍ପତ୍ତିକୁ ରାହୁଲ ଗାନ୍ଧୀ କଲେ ସମର୍ଥନ, କହିଲେ ମୋତେ ଲାଗୁଛି ସବୁ ବିରୋଧୀ ନେତା ବି ସହମତ ହେବେ
ନୂଆଦିଲ୍ଲୀ: କଂଗ୍ରେସ ସାଂସଦ ରାହୁଲ ଗାନ୍ଧୀ ଏବେ ୟୁରୋପ ଗସ୍ତରେ ଅଛନ୍ତି । ଏହି କ୍ରମରେ ବେଲଜିୟମରେ ଏକ ସାମ୍ବାଦିକ ସମ୍ମିଳନୀରେ ସମ୍ବୋଧିତ କରିବା ସମୟରେ ରାହୁଲ ମୋଦୀ ସରକାରଙ୍କ ଏକ ନିଷ୍ପତ୍ତିକୁ ସମର୍ଥନ କରିଛନ୍ତି । ସେ କହିଛନ୍ତି ରୁଷ ଓ ୟୁକ୍ରେନ୍ ଯୁଦ୍ଧ ଉପରେ ସରକାର ଯେଉଁଭଳି ଭାବରେ ନିଜର ପକ୍ଷ ରଖିଛନ୍ତି ତାହାକୁ ନେଇ ବିରୋଧୀ ତାଙ୍କ ସହ ସହମତ । ତେବେ ରାହୁଲ ଗାନ୍ଧୀଙ୍କ ଏପରି ମନ୍ତବ୍ୟ ସମସ୍ତଙ୍କୁ ଚକିତ କରିଛି କାରଣ ଏହା ବହୁତ କମ୍ ଦେଖାଯାଏ କି ରାହୁଲ ଗାନ୍ଧୀଙ୍କ ସହିତ କୌଣସି ବିରୋଧୀ ନେତା ମୋଦୀ ସରକାରଙ୍କ କୌଣସି ନିଷ୍ପତ୍ତି ଉପରେ ସହମତି ପ୍ରକାଶ କରିବା ବା ସମର୍ଥନ କରିବା ।
ରାହୁଲ କହିଛନ୍ତି ମୋତେ ଲାଗୁଛି ଯେ, ସମସ୍ତ ବିରୋଧୀ ରାଜନୈତିକ ଦଳ ରୁଷ ଓ ୟୁକ୍ରେନ ଯୁଦ୍ଧ ମଧ୍ୟରେ ଭାରତର ବର୍ତ୍ତମାନ ନୀତି ସହିତ ସହମତି ପ୍ରକାଶ କରିବେ । ଦିଲ୍ଲୀରେ ଆୟୋଜିତ ହେବାକୁ ଯାଉଥିବା ଜି-୨୦ ଶିଖର ସମ୍ମିଳନୀରେ ବିରୋଧୀ ନେତା ମଲ୍ଲିକାର୍ଜୁନ ଖଡଗେଙ୍କୁ ଆମନ୍ତ୍ରଣ କରାଯାଇ ନ ଥିବା ପ୍ରଶ୍ନରେ ରାହୁଲ ଗାନ୍ଧୀ କହିଥିଲେ, ମୋଦୀ ସରକାର ବିରୋଧୀ ନେତାଙ୍କୁ ଆମନ୍ତ୍ରଣ ନ କରିବାକୁ ନିଷ୍ପତ୍ତି ନେଇଛନ୍ତି । ଏହାର ଅର୍ଥ ମୋଦୀ ସରକାର ୬୦ ପ୍ରତିଶତ ଜନସଂଖ୍ୟାକୁ ପ୍ରତିନିଧିତ୍ୱ କରୁଥିବା ନେତାଙ୍କୁ ଗୁରୁତ୍ୱ ଦେଉନାହାନ୍ତି । ତେବେ ଏହା ଏପରି ଏକ ମାମଲା ଯାହା ବିଷୟରେ ଲୋକମାନେ ଚିନ୍ତା କରିବା ଉଚିତ । ଏହା ପଛରେ କେଉଁ ପ୍ରକାର ଚିନ୍ତାଧାରା ରହିଛି ତାହା ଜନତା ଭାବିବା ଉଚିତ ।
ଏଠାରେ ସୂଚାଇ ଦିଆଯାଇପାରେ ଯେ, ଏହା ପୂର୍ବରୁ ମଧ୍ୟ ଜୁନ୍ ମାସରେ ଆମେରିକା ଗସ୍ତ ସମୟରେ ରାହୁଲ ଗାନ୍ଧୀ ରୁଷ ୟୁକ୍ରେନ ଯୁଦ୍ଧ ଉପରେ କେନ୍ଦ୍ର ସରକାରଙ୍କ ଦୃଷ୍ଟିଭଙ୍ଗୀକୁ ସମର୍ଥନ କରିଥିଲେ ।