ଭଉଣୀର ଋତୁସ୍ରାବ ଦେଖି, ଶାରୀରିକ ସମ୍ପର୍କ ଉପରେ ସନ୍ଦେହ କଲା ଭାଇ, ପରେ ଘଟିଲା ଏପରି ହତ୍ୟାକାଣ୍ଡ..

ମୁମ୍ବାଇ: ଆମେ ବର୍ତ୍ତମାନ ଏକବିଂଶ ଶତାବ୍ଦୀରେ ବାସ କରୁଛୁ, ତଥାପି ପୁରୁଣା ଆଦର୍ଶ ଏବଂ ଅଜ୍ଞତାରୁ ମୁକ୍ତି ପାଇ ନାହୁଁ। ପ୍ରତିଦିନ ଏହିପରି ଖବର ସାମ୍ନାକୁ ଆସୁଛି ଯାହା ଅଜ୍ଞତା ହେତୁ ହିଁ ଘଟୁଛି। ମୁମ୍ବାଇର ଥାନେରୁ ଏପରି ଏକ ମାମଲା ସାମ୍ନାକୁ ଆସିଛି, ଯେଉଁଠାରେ ଜଣେ ଯୁବକ ତା ଭଉଣୀର ପିରିୟଡ ପାଇଁ ତାକୁ ମାରିଦେଇଛି। କୁହାଯାଉଛି ଯେ, ମୃତ ଝିଅର ଭାଇ ସନ୍ଦେହ କରିଥିଲେ ଯେ, ତାଙ୍କର ଅନ୍ୟ କାହା ସହ ପ୍ରେମ ସମ୍ପର୍କ ଅଛି। ବର୍ତ୍ତମାନ ପୋଲିସ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି ତଦନ୍ତରେ ନିୟୋଜିତ ଅଛି।

ସୂଚନା ଅନୁଯାୟୀ, ଅଭିଯୁକ୍ତ ଜଣକ ସୁରକ୍ଷା କର୍ମୀ ଭାବରେ କାର୍ଯ୍ୟ କରନ୍ତି। ପୀଡିତା ଝିଅଟି ତାଙ୍କ ମା’ଙ୍କ ଦେହାନ୍ତ ପରେ ତାଙ୍କ ଭାଇ ଏବଂ ଭାଉଜଙ୍କ ସହ ସହରରେ ରହୁଥିଲା। ତାଙ୍କ ପିତା ଗାଁରେ ରହୁଥିଲେ। ପ୍ରଥମ ଋତୁସ୍ରାବରେ ଝିଅଟିର ଅତ୍ୟଧିକ ରକ୍ତସ୍ରାବ ହେଉଥିଲା, ଭାଇ ତାଙ୍କ ପୋଷାକରେ ରକ୍ତ ଦାଗ ଦେଖି ସନ୍ଦେହ କରିବାକୁ ଲାଗିଲା ଯେ,  ତାଙ୍କ ଭଉଣୀ କାହା ସହ ଶାରୀରିକ ସମ୍ପର୍କ ସ୍ଥାପନ କରିଛି। ଋତୁସ୍ରାବ ବିଷୟରେ ଝିଅଟିର କୌଣସି ଜ୍ଞାନ ନଥିଲା। ଏହି କାରଣରୁ, ଯେତେବେଳେ ଭାଇ ତାଙ୍କୁ ରକ୍ତ ଦାଗ ବିଷୟରେ ପଚାରିଥିଲେ, ସେ ଏହାକୁ ବୁଝାଇବା ଅସମର୍ଥ ହୋଇଥିଲେ। ତାଙ୍କ ଭାଉଜ ଏହି ବିଷୟରେ ବୁଝାଇବା ପରିବର୍ତ୍ତେ ତାଙ୍କ ଭାଇଙ୍କୁ ଆହୁରି ଉତ୍ତେଜିତ କରିଥିଲେ।  ପୋଲିସ ଅଧିକାରୀ କହିଛନ୍ତି, ଅଭିଯୁକ୍ତ କିଛି ଜଳିଥିବା ଜିନିଷ ସହିତ ଝିଅର ମୁହଁ ଓ ପିଠି ପୋଡ଼ି ଦେଇଥିଲା। ଏହାପରେ ଝିଅଟିର ମୃତ୍ୟୁ ଘଟିଥିଲା।

ନାବାଳିକାଙ୍କ ମୃତ୍ୟୁ ପରେ ଡାକ୍ତରମାନେ ପୋଲିସକୁ ସୂଚନା ଦେଇଥିଲେ। ଝିଅଟିକୁ ଉଲହସାନଗର କେନ୍ଦ୍ରୀୟ ଡାକ୍ତରଖାନାକୁ ଚିକିତ୍ସା ପାଇଁ ଅଣାଯିବା ପରେ ଏହି ମାମଲା ସାମ୍ନାକୁ ଆସିଥିଲା। ଡାକ୍ତରଖାନାର ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଏହା ପରେ ପୋଲିସ ପହଞ୍ଚି ଝିଅର ମୃତଦେହକୁ ନିଜ ଅଧୀନରେ ନେଇଥିଲା। ପୋଷ୍ଟମର୍ଟମ ପରେ ଭାଇଙ୍କ ଏପରି ହତ୍ୟାକାଣ୍ଡ ମାମଲା ସାମ୍ନାକୁ ଆସିଥିଲା। ଝିଅର ପିଠି, ମୁହଁ ଏବଂ ବେକରେ ଅନେକ ଆଘାତ ଚିହ୍ନ ଦେଖିବାକୁ ମିଳିଥିଲା। ପୋଲିସ ଆଇପିସି ଧାରା ୩୦୨(ହତ୍ୟା) ଅନୁଯାୟୀ ଭାଇଙ୍କ ବିରୋଧରେ ମାମଲା ରୁଜୁ କରି ତାଙ୍କୁ ଗିରଫ କରିଛି।