ଲତାଙ୍କୁ ମାରିବାକୁ ଚାହୁଁଥିଲେ କି ଏମାନେ, ସେଥିପାଇଁ ଖାଇବାରେ ଦେଇଥିଲେ ବିଷ: ଜାଣନ୍ତୁ କିଏ ସେମାନେ
ନୂଆଦିଲ୍ଲୀ: ସବୁଦିନ ପାଇଁ ଲିଭିଯାଇଛି ମାଆ ସରସ୍ୱତୀଙ୍କ ସୁରକନ୍ୟା ଲତା ମଙ୍ଗେସକରଙ୍କ ଜୀବନର ଦୀପ । ଯେତେ ଝୁରିଲେ ବି ଆମ ଗହଣକୁ ଆଉ ଫେରିବେନି ସମସ୍ତଙ୍କର ପ୍ରିୟ ସୁର ସାମ୍ରାଜ୍ଞୀ । ତେବେ ଲତା ବିୟୋଗରେ ଆଜି ତାଙ୍କର ପ୍ରଶଂସକମାନେ ତାଙ୍କର ସମସ୍ତ ସ୍ମୃତିକୁ ପାଗଳ ପରି ଖୋଜିବାରେ ଲାଗିଛନ୍ତି । ସ୍ୱରକନ୍ୟା ଲତା ମାଆ ପରି ପବିତ୍ର ହୋଇଥିଲେ ହେଁ ତାଙ୍କୁ ମଧ୍ୟ ହତ୍ୟା କରିବାର ଯୋଜନା କରାଯାଇଥିଲା । ତାଙ୍କର ଅଗୋଚରରେ ତାଙ୍କର ଖାଇବାରେ ବିଷୟ ମିଶାଇ ଦିଆଯାଇଥିଲା ।
୧୯୬୩ ମସିହାର କଥା, ଲତାଙ୍କୁ ୩୩ ବର୍ଷ ବୟସ ହୋଇଥିବା ବେଳେ ଦିନେ ସକାଳୁ ସେ ହଠାତ୍ ଅସୁସ୍ଥ ହୋଇପଡ଼ିଥିଲେ । ତାଙ୍କର ପେଟରେ ଭୀଷଣ ଯନ୍ତ୍ରଣା ହେବା ସହ ବାନ୍ତିରେ ସବୁଜ ରଙ୍ଗର କିଛି ପଦାର୍ଥ ବାହାରି ଆସିଥିଲା । ପରେ ଡାକ୍ତର ତାଙ୍କର ପରୀକ୍ଷା ନିରୀକ୍ଷା ପରେ ଯେଉଁ ତଥ୍ୟ ଦେଇଥିଲେ ତାହା ସଭିଙ୍କୁ ତାଜୁବ କରିଦେଇଥିଲା । ଲତାଙ୍କୁ ସ୍ଲୋ ପଏଜନ୍ ଦିଆଯାଇଥିବା ଡାକ୍ତର କହିଥିଲେ । ତେବେ ଏହି ଘଟଣାଟିକୁ ନେଇ ସେ ସମୟରେ ବହୁ ଚର୍ଚ୍ଚା ହୋଇଥିଲେ ହେଁ ଏହା ପଛର ପ୍ରକୃତ କାର୍ପଟଦାର କିଏ ଥିଲା ତାହା ଆଜି ପର୍ଯ୍ୟନ୍ତ ରହସ୍ୟ ହୋଇ ରହିଯାଇଛି ।
ଏହି ବିଷୟର ପରିଣତି ଏତେ ଭୟଙ୍କର ଥିଲା ଯେ, ପରବର୍ତ୍ତୀ ୩-୪ ମାସ ପର୍ଯ୍ୟନ୍ତ ଲତା ଅସୁସ୍ଥ ହେବା ସହ ଗୀତ ଗାଇ ପାରିନଥିଲେ । ତେବେ କିଏ ସେ, ଯେ କି ମାଆ ଲତାଙ୍କୁ ବିଷ ଦେବାର ସାହସ କରିଥିଲା? କୁହାଯାଏ, ଏହି ଘଟଣା ପରେ ଲତାଙ୍କ ଘରର ରୋଷେୟା ଘରୁ ଅଚାନକ ଫେରାର ହୋଇଯାଇଥିଲେ । ଏପରିକି ଉକ୍ତ ବ୍ୟକ୍ତି ଜଣଙ୍କ ନିଜର ଦରମା ନେବାକୁ ମଧ୍ୟ ଆସିନଥିଲେ । ତେବେ ଏଠାରେ ପ୍ରଶ୍ନ ଉଠୁଛି, ଉକ୍ତ ରୋଷେୟା କ’ଣ ସତରେ ଲତାଙ୍କୁ ଖାଇବାରେ ବିଷ ଦେଇଥିଲେ ନା ଏହା ପଛରେ ଆଉ କେଉଁ ବାହ୍ୟ ବ୍ୟକ୍ତିଙ୍କର ଷଡ଼ଯନ୍ତ୍ର ଥିଲା?
