ଫାଇନାଲରେ ଦଳ, ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହେଲେ ଶାହରୁଖ: ଜାଣନ୍ତୁ ସମସ୍ୟା

ନୂଆଦିଲ୍ଲୀ: ସନରାଇଜର୍ସ ହାଇଦ୍ରାବାଦକୁ ମାତ୍ ଦେଇ ଫାଇନାଲରେ ପହଞ୍ଚିଛି ଶାହରୁଖ ଖାନଙ୍କ ଦଳ କୋଲକାତା ନାଇଟ ରାଇଡର୍ସ । କିନ୍ତୁ ଏହାପରେ ଦଳ ପାଇଁ ଏକ ଦୁଃଖଦ ଖବର ସାମନାକୁ ଆସିଛି । ଅଚାନକ ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ମାଲିକ ଶାହରୁଖ ଖାନ୍ । ପ୍ରବଳ ଗରମ(ଲୁ)ର ପ୍ରଭାବରେ ଅସୁସ୍ଥ ହେବାରୁ ଶାହରୁଖଙ୍କୁ ଅହମ୍ମଦାବାଦର କେଡି ହସ୍ପିଟାଲରେ ଭର୍ତ୍ତି କରାଯାଇଛି । ଡି-ହାଇଡ୍ରେସନ ପାଇଁ କିଙ୍ଗ ଖାନଙ୍କୁ ମେଡିକାଲ ନିଆ ଯାଇଥିବା ଜାଣିବାକୁ ମିଳିଛି ।

ଆଜି ସକାଳେ ଶାହାରୁଖ ଖାନଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡି ଯାଇଥିଲା। ଏହା ପରେ ତାଙ୍କୁ ଯଥାଶୀଘ୍ର କେଡି ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ପ୍ରାଥମିକ ଚିକିତ୍ସା ପରେ ଶାହାରୁଖ ସୁସ୍ଥ ଅନୁଭବ କରିବାରୁ ତାଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଛି । ବର୍ତ୍ତମାନ ତାଙ୍କ ସ୍ୱାସ୍ଥ୍ୟ ପୂର୍ବ ଅପେକ୍ଷା ଭଲ ବୋଲି କୁହାଯାଉଛି। କିନ୍ତୁ ଡାକ୍ତରମାନେ ଶାହାରୁଖଙ୍କୁ କିଛି ସମୟ ବିଶ୍ରାମ ନେବାକୁ କହିଛନ୍ତି। ଆଇପିଏଲ୍ ୨୦୨୪ ର ଫାଇନାଲ ମ୍ୟାଚ୍ ମେ’ ୨୬ ତାରିଖରେ ଚେନ୍ନାଇର ଏମ. ଚିଦାମ୍ବରମ୍ ଷ୍ଟାଡିୟମରେ ଖେଳାଯିବ । ଯଦି ତାଙ୍କ ସ୍ୱାସ୍ଥ୍ୟ ଅବସ୍ଥା ଭଲ ରହେ, ତେବେ ଏହି ଫାଇନାଲ ମ୍ୟାଚରେ ଶାହାରୁଖଙ୍କୁ ମଧ୍ୟ ଦଳକୁ ସମର୍ଥନ କରିବାକୁ ପହଞ୍ଚିପାରନ୍ତି ।

ସୂଚନା ଅନୁସାରେ, ମେ ୨୧ ରେ, ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ କୋଲକାତା ନାଇଟ୍ ରାଇଡର୍ସ ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଆଇପିଏଲ୍ ୨୦୨୪ ର ପ୍ରଥମ ଯୋଗ୍ୟତା ମ୍ୟାଚ୍ ଖେଳାଯାଇଥିଲା । କେକେଆର୍ ଏହି ମ୍ୟାଚ୍ ଜିତି ଚତୁର୍ଥ ଥର ପାଇଁ ଫାଇନାଲରେ ପ୍ରବେଶ କରିଛି । ଏହି ମ୍ୟାଚ୍ ପାଇଁ ଶାହାରୁଖ ଅହମ୍ମଦାବାଦକୁ ଦୁଇ ଦିନ ଆସିଥିଲେ। ଅତ୍ୟଧିକ ଉତ୍ତାପ ହେତୁ ଡିହାଇଡ୍ରେସନ୍ ଭଳି ସମସ୍ୟାରେ ପୀଡ଼ିତ ହୋଇଛନ୍ତି ବଲିଉଡ ବାଦଶାହ ଶାହରୁଖ । ତେବେ ମ୍ୟାଚ୍ ପରେ ଶାହାରୁଖ ଖାନ ଦୀର୍ଘ ସମୟ ପଡ଼ିଆରେ ରହି ପ୍ରଶଂସକମାନଙ୍କୁ କୃତଜ୍ଞତା ଜଣାଇଥିଲେ। ଏହା ପରେ ବିଳମ୍ବିତ ରାତିରେ ସେ ନିଜ ଦଳ ସହିତ ଅହମ୍ମଦାବାଦର ଏକ ହୋଟେଲରେ ପହଞ୍ଚିଥିଲେ। ଯେଉଁଠାରେ ତାଙ୍କୁ ଦଳ ସହିତ ଏକ ବିରାଟ ସ୍ୱାଗତ କରାଯାଇଥିଲା ।