ରାତାରାତି ବଦଳିଗଲା ବିଜୁବାବୁଙ୍କ ପ୍ରତିମୂର୍ତ୍ତିର ରଙ୍ଗ, ଥିଲା ସବୁଜ ହେଲା ଗେରୁଆ

କଟକ: ରାଜ୍ୟରେ ଏବେ ଚାଲିଛି ରଙ୍ଗ ବୋଳା ରାଜନୀତି। ଏକଥା ଆମେ କହୁନାହୁଁ, ବରଂ ରାଜ୍ୟରେ ବିଜେପି କ୍ଷମତାକୁ ଆସିବା ପରେ ଏପରି କିଛି କାର୍ଯ୍ୟ କରୁଛି ଯାହାକ ବିରୋଧୀ କଟାକ୍ଷ କରି ଏପରି କହୁଛନ୍ତି। ହେଲେ ସାଧାରଣରେ ଏବେ ଚର୍ଚ୍ଚା ହେଉଛି କି, ଏବେ ବିଜୁ ବାବୁଙ୍କ ପାଳି ପଡିଛି।

ସେଥିପାଇଁ ରାତାରାତି ବିଜୁ ବାବୁଙ୍କ ପ୍ରତିମୂର୍ତ୍ତିର ରଙ୍ଗ ଘନ ସବୁଜରୁ ତମ୍ବା ରଙ୍ଗର ହୋଇଯାଇଛି, ଯାହାକି ଗେରୁଆ ପରି ଦିଶୁଛି ବୋଲି ଅଭିଯୋଗ ଆସିଛି। ଯାହାକୁ ନେଇ ରାଜନୈତିକ ବୟାନବାଜି ଆରମ୍ଭ ହୋଇଯାଇଛି।

ରଙ୍ଗବୋଳା ରାଜନୀତି: ତେବେ ବିଜେପି ରାଜ୍ୟରେ କ୍ଷମତାକୁ ଆସିବା ପରେ ଅନେକ ଜିନିଷର ରଙ୍ଗରେ ପରିବର୍ତ୍ତନ କରିଛି। ସରକାରକୁ ଆସିବା ପରେ ମୋହନ ସରକାର ମୋ ବସ୍, ସ୍କୁଲ କୋଠା, ସ୍କୁଲ ଡ୍ରେସ୍ ପ୍ରଭୃତିର ରଙ୍ଗ ବଦଳେଇବା ନେଇ ଅଭିଯୋଗ ଉଠିଛି।

ଏହାକୁ ବିରୋଧୀମାନେ ସମାଲୋଚନା କରୁଛନ୍ତି। ବିରୋଧୀ ସବୁବେଳେ କହି ଆସିଛନ୍ତି, ମୋହନ ସରକାର ନୂଆ ଯୋଜନା ନକରି, କେବଳ ବିଜେଡି ସରକାର ଅମଳର ପୁରୁଣା ଯୋଜନାକୁ ନାଁ ଓ ରଙ୍ଗ ବଦଳାଇବାରେ ବ୍ୟସ୍ତ ଅଛି।

ଏବେ ବିଜୁ ବାବୁଙ୍କ ପାଳି: ଘଟଣାଟି ହେଉଛି କଟକ ସହରର। ଅଭିଯୋଗ ଆସିଛି କି, ସହରର ଏକ କଲୋନୀରେ ଥିବା ଏକ ବିଶାଳ ବିଜୁମୂର୍ତ୍ତିର ରଙ୍ଗକୁ ବଦଳାଇ ଦିଆଯାଇଛି।

ଅଭିଯୋଗ ବେଶୀ ତୀବ୍ର ହେଉଛି ସେତିକିବେଳେ, ଯେତେବେଳେ ଜଣାପଡ଼ିଲା ଯେ, ବିଜୁଙ୍କ ପ୍ରତୂମୂର୍ତ୍ତିର ରଙ୍ଗ ପୂର୍ବରୁ ଘନ ସବୁଜ ଥିବାବେଳେ ଏବେ ଏହା ତମ୍ବା ରଙ୍ଗର ହୋଇଯାଇଛି, ଯାହାକି ଗେରୁଆ ପରି ଦିଶୁଛି ବୋଲି ଅଭିଯୋଗ ଆସିଛି।

ରାତାରାତି ରଙ୍ଗ ଚେଞ୍ଜ: ମିଳିଥିବା ସୂଚନା ଅନୁଯାୟୀ, କଟକ ସହରର ମହାନଦୀ ବିହାର କଲୋନୀରେ ୨୦୧୮ ମସିହା ସେପ୍ଟେମ୍ବର ୧୧ ତାରିଖରେ ଉଦଘାଟିତ ହୋଇଥିବା ଏହି ପ୍ରତିମୂର୍ତ୍ତିଟିକୁ ଉଦଘାଟନ କରିଥିଲେ ସେତେବେଳର ଚୌଦ୍ୱାର-କଟକର ବିଜେଡି ବିଧାୟକ ପ୍ରଭାତ ରଂଜନ ବିଶ୍ୱାଳ।

ତାଙ୍କ ସହିତ ଥିଲେ, କଟକ ମେୟର ମିନାକ୍ଷୀ ବେହେରା, ଡେପୁଟୀ ମେୟର ଅଜୟ କୁମାର ବାରିକ, ୪୭ ନମ୍ବର କର୍ପୋରେଟର କବିତା ଖଣ୍ଡାଇ।

କିଏ ବଦଳାଇଲା ରଙ୍ଗ: ତେବେ ବିଜୁବାବୁଙ୍କର ଏହି ପ୍ରତିମୂର୍ତ୍ତିର ରଙ୍ଗ କିଏ କାହିଁକି ବଦଳେଇଲା ତାହା ସ୍ପଷ୍ଟ ହୋଇନାହିଁ। କୌଣସି କର୍ତ୍ତୃପକ୍ଷ ରଙ୍ଗ ବଦଳାଇଥିବା ବିଷୟ ମାନୁ ନାହାଁନ୍ତି।

କଟକ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେଙ୍କ କଥା ଆହୁରି ଆଶ୍ଚର୍ଯ୍ୟଜନକ। ସେ କହିଛନ୍ତି- ବିଜୁଙ୍କ ପ୍ରତିମୂର୍ତ୍ତର ରଙ୍ଗ ବଦଳାଇବାକୁ ଜିଲ୍ଲା ପ୍ରଶାସନ କାହାରିକୁ ନିର୍ଦ୍ଦେଶ ଦେଇନି। ସରକାରଙ୍କ ତରଫରୁ ମଧ୍ୟ ସେପରି କୌଣସି ନିର୍ଦ୍ଦେଶନାମା ଆସିନାହିଁ। ଏ ସଂପର୍କରେ ତଦନ୍ତ କରାଯିବ।