ତୃତୀୟ ପର୍ଯ୍ୟାୟ ମତଦାନ; ‘ମୁସଲମାନ ସମ୍ପ୍ରଦାୟ ଲୋକଙ୍କୁ ଭୋଟ୍ ଦେବାକୁ ଅନୁମତି ଦେଲାନି ପୋଲିସ’

ଲକ୍ଷ୍ନୌ: ମଙ୍ଗଳବାର ପଶ୍ଚିମ ଉତ୍ତର ପ୍ରଦେଶର ସମ୍ଭାଲରେ ମତଦାନ ବେଳେ ଅନେକ ମୁସଲମାନ ଅଧ୍ୟୁଷିତ ଅଞ୍ଚଳର ଲୋକମାନେ ଭୋଟ୍ ଦେଇ ପାରୁ ନଥିବା ଅଭିଯୋଗ କରିଥିଲେ। ସମାଜବାଦୀ ପାର୍ଟି ଏହାର ସୋସିଆଲ ମିଡିଆ ସାଇଟ୍ ଏକ୍ସରେ ଏକ ଭିଡିଓ ସେୟାର କରି ଅଭିଯୋଗ କରିଛି- “ସମ୍ଭାଲ ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ କୁଣ୍ଡରକି, ବିଲାରି, ଚନ୍ଦାଉସୀ, ସମ୍ଭାଲ ଏବଂ ଅସ୍ମୋଲି ସମେତ ସମସ୍ତ ବିଧାନସଭା ନିର୍ବାଚନ ମଣ୍ଡଳୀରେ ପୋଲିସ ଫୋର୍ସ ଭୋଟରମାନଙ୍କୁ ମାଡ଼ ମାରୁଛି ଏବଂ ଧମକ ଦେଉଛି। ଅଯଥାରେ ଭୋଟର ସ୍ଲିପ୍ ଯାଞ୍ଚ କରି ଭୋଟରଙ୍କୁ ହଇରାଣ କରି ପ୍ରଭାବିତ ହେଉଛନ୍ତି ଭୋଟର ।

ଲୋକମାନେ ଆକ୍ରମଣ ଏବଂ ପରିଚୟପତ୍ର ଅଭିଯୋଗ କରିବାର ଅନେକ ଭିଡିଓ ଗଣମାଧ୍ୟମ ହାତରେ ଲାଗିଛି। ପୋଲିସ ସେମାନଙ୍କ ପରିଚୟ ପତ୍ର ଛଡ଼ାଇ ନେଇ ମାଡ଼ ମାରିବା ସହ ସେମାନଙ୍କୁ ପୋଲିଂ ବୁଥ୍ ରୁ ବାହାର କରି ଦେଇଥିବା ଅନେକ ଲୋକ ଅଭିଯୋଗ କରିଛନ୍ତି। ଆଜି ତୃତୀୟ ପର୍ଯ୍ୟାୟରେ ସମ୍ଭାଲରେ ମତଦାନ ଚାଲିଛି। ଏହାବ୍ୟତୀତ ୟୁପିର ଆଉ ୯ଟି ଆସନରେ ଭୋଟ୍ ଗ୍ରହଣ କରାଯାଉଛି। ସ୍ବର୍ଗତ ସମାଜବାଦୀ ପାର୍ଟି ସାଂସଦ ଶଫିକୁର ରେହମାନ ବାର୍କଙ୍କ ନାତି ଜିଆର ରେହମାନ ବାର୍କ ସମ୍ଭାଲରୁ ଭାରତୀୟ ମେଣ୍ଟର ପ୍ରାର୍ଥୀ। ଭୋଟରଙ୍କୁ ଜୋରଜବରଦସ୍ତ କରିବା ନେଇ ଜିଆଉର ରହମାନ ବାର୍କ ଜିଲ୍ଲା ପ୍ରଶାସନ ନିକଟରେ ଅଭିଯୋଗ କରିଛନ୍ତି।

ଜିଆଉର ରହମାନ କହିଛନ୍ତି, ପୁଲିସ ପ୍ରଶାସନ ଏକ ଦଳ ଭାବେ କାମ କରୁଛି। ଭୋଟରଙ୍କ ସ୍ଲିପ୍ ଛଡ଼ାଇ ନିଆଯାଉଛି। ସେମାନଙ୍କୁ ଭୋଟ୍ ଦେବାକୁ ଦିଆଯାଉନାହିଁ। ଏ ସମ୍ପର୍କରେ ଅଧିକ ସୂଚନା ମିଳିବା ପରେ ହିଁ ସେ କିଛି କହିପାରିବେ ବୋଲି ଜିଲ୍ଲା ପ୍ରଶାସନ କହିଛନ୍ତି। ସେପଟେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଛନ୍ତି, ବିଜେପି ଲୋକମାନେ ବୁଥ୍ ଦଖଲ କରିବାକୁ ଚେଷ୍ଟା କରୁଛନ୍ତି। ଆଶା କରୁଛି ନିର୍ବାଚନ କମିଶନ ଉଚିତ ପଦକ୍ଷେପ ନେବେ।