ଆପଲ୍କୁ ଡୋନାଲ୍ଡ ଟ୍ରମ୍ପଙ୍କ ଧମକ: ଆମେରିକାରେ ଆଇଫୋନ ନିର୍ମାଣ ନକଲେ ଆମଦାନୀ ଉପରେ ଲାଗିବ ୨୫% ଟାରିଫ
ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟେକ୍ନୋଲୋଜି ଜାଏଣ୍ଟ ଆପଲ୍ ଇନକର୍ପୋରେଟେଡକୁ ଏକ କଡ଼ା ଚେତାବନୀ ଦେଇଛନ୍ତି। ସେ କହିଛନ୍ତି ଯେ,ଯଦି ଆପଲ୍ ଆମେରିକାରେ ଆଇଫୋନ ନିର୍ମାଣ ନକରେ ଏବଂ ଭାରତ କିମ୍ବା ଅନ୍ୟ ଦେଶରୁ ଆମଦାନୀ କରେ, ତେବେ ତାଙ୍କୁ ୨୫% ଟାରିଫ ଦେବାକୁ ପଡ଼ିବ।
ଶୁକ୍ରବାର ନିଜର ସୋସିଆଲ ମିଡିଆ ପ୍ଲାଟଫର୍ମ Truth Socialରେ ଟ୍ରମ୍ପ ଏହି ଧମକ ଦେଇ କହିଛନ୍ତି, “ମୁଁ ବହୁ ଆଗରୁ ଆପଲ୍ର ସିଇଓ ଟିମ କୁକଙ୍କୁ କହିଛି ଯେ ଆମେରିକାରେ ବିକ୍ରି ହେଉଥିବା ଆଇଫୋନଗୁଡ଼ିକ ଆମେରିକାରେ ନିର୍ମାଣ କରାଯିବା ଉଚିତ, ଭାରତ କିମ୍ବା ଅନ୍ୟ କୌଣସି ସ୍ଥାନରେ ନୁହେ। ଯଦି ଏହା ନହୁଏ, ତେବେ ଆପଲ୍କୁ ଆମେରିକାକୁ ୨୫% ଟାରିଫ ଦେବାକୁ ପଡ଼ିବ।”
ଆପଲ୍ ଉପରେ ଚାପ
ଟ୍ରମ୍ପଙ୍କ ଏହି ନୀତି ଆପଲ୍ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି, କାରଣ କମ୍ପାନୀର ଅଧିକାଂଶ ଆଇଫୋନ ଚୀନ, ଭାରତ, ଭିଏତନାମ ଓ ଅନ୍ୟ ଏସୀୟ ଦେଶମାନଙ୍କରେ ନିର୍ମାଣ ହେଉଛି। ଗତ କିଛି ବର୍ଷରେ ଆପଲ୍ ଚୀନ ଉପରେ ନିର୍ଭରଶୀଳତା ହ୍ରାସ କରି ଭାରତରେ ଉତ୍ପାଦନ ବୃଦ୍ଧି କରିଛି, ଯେଉଁଠାରେ ଏହା ପ୍ରାୟ ୨୫% ଆଇଫୋନ ନିର୍ମାଣ କରୁଛି। କିନ୍ତୁ ଟ୍ରମ୍ପଙ୍କ ନୂଆ ଟାରିଫ ନୀତି ଏହି ରଣନୀତିକୁ ବାଧା ସୃଷ୍ଟି କରିପାରେ, ଯାହା ଆପଲ୍ର ସପ୍ଲାଇ ଚେନ ଓ ଖର୍ଚ୍ଚ ଉପରେ ପ୍ରଭାବ ପକାଇବ।
ଆମେରିକାରେ ଉତ୍ପାଦନ କାହିଁକି କଷ୍ଟକର?
ବିଶେଷଜ୍ଞମାନେ କହୁଛନ୍ତି ଯେ ଆମେରିକାରେ ଆଇଫୋନ ନିର୍ମାଣ କରିବା ଆପଲ୍ ପାଇଁ ଅତ୍ୟନ୍ତ ଖର୍ଚ୍ଚବହୁଳ ହେବ। ଏସୀୟ ଦେଶମାନଙ୍କରେ ଶ୍ରମ ଖର୍ଚ୍ଚ କମ ଏବଂ ଉନ୍ନତ ସପ୍ଲାଇ ଚେନ ଇନଫ୍ରାଷ୍ଟ୍ରକଚର ରହିଛି, ଯାହା ଆମେରିକାରେ ଉପଲବ୍ଧ ନାହିଁ। ଓ୍ଵେଡବୁଶ ସିକ୍ୟୁରିଟିଜର ବିଶ୍ଲେଷକ ଡାନ ଆଇଭସ କହିଛନ୍ତି, “ଆପଲ୍ର ସପ୍ଲାଇ ଚେନର ୧୦% ମାତ୍ର ଆମେରିକାକୁ ସ୍ଥାନାନ୍ତର କରିବା ପାଇଁ ୩ ବର୍ଷ ଏବଂ ୩୦ ବିଲିୟନ ଡଲାର ଖର୍ଚ୍ଚ ହେବ, ଯାହା ବହୁତ ବିଘ୍ନ ସୃଷ୍ଟି କରିବ।”