ଖଚାଖଚ ଭିଡ : ଟ୍ରେନ ଭିତରେ ଭିଡିଗଲେ ଦୁଇ ମହିଳା, ସୋସିଆଲ ମିଡିଆରେ ଭିଡିଓ ଭାଇରାଲ
ନୂଆଦିଲ୍ଲୀ: ଗତ କିଛି ଦିନ ହେବ ଟ୍ରେନ ଓ ମେଟ୍ରୋରେ ଲଢେଇ ଝଗଡାର ଭିଡିଓ ଲଗାତର ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । କେତେବେଳେ ସିଟ୍କୁ ନେଇ କଳି ଝଗଡା ତ ପୁଣି କେତେବେଳେ ଅଶ୍ଳୀଳ କମେଣ୍ଟକୁ ନେଇ । ଦିଲ୍ଲୀ ମେଟ୍ରୋ ପକ୍ଷରୁ ତ ଏହାକୁ ନେଇ ବହୁବାର ଚେତାବନୀ ଜାରି କରାଯାଇଛି । ଏବେ ଏହିପରି ଏକ ତାଜା ମାମଲା ମୁମ୍ବାଇ ଲୋକାଲ ଟ୍ରେନକୁ ନେଇ ଆସିଛି ।
ସୋସିଆଲ ମିଡିଆରେ ଭାଇରାଲ ହେଉଥିବା ମୁମ୍ବାଇ ଲୋକାଲ ଟ୍ରେନର ଏହି ଭିଡିଓରେ ଦେଖିବାକୁ ମିଳୁଛି ଅଚାନକ କୌଣସି ଏକ କଥାକୁ ନେଇ ଦୁଇ ଜଣ ମହିଳା ପରସ୍ପର ମଧ୍ୟରେ ଝଗଡା ଆରମ୍ଭ କରିଦେଲେ । ତେବେ ଝଗଡା କେବଳ କଥା କଟାକଟି ମଧ୍ୟରେ ସୀମିତ ରହିଲା ନାହିଁ ମାରପିଟ୍ ପର୍ଯ୍ୟନ୍ତ ବି ଚାଲିଗଲା । ଭିଡିଓରେ ଦେଖିବାକୁ ମିଳୁଛି ଜଣେ ମହିଳା ଅନ୍ୟ ଜଣଙ୍କୁ ଜୋରଦାର ଚାପୁଡା ମାରୁଥିବା ବେଳେ ବଦଳରେ ଅନ୍ୟଜଣକ ବି ତାଙ୍କ ଉପରେ ଥାପଡ କଷି ଦେଉଛନ୍ତି । ଏହା ସହିତ ଉଭୟ ପରସ୍ପରର କେଶକୁ ମଧ୍ୟ ଝିଙ୍କୁଛନ୍ତି । ଏହାକୁ ନେଇ ଟ୍ରେନରେ ହଙ୍ଗାମା ସୃଷ୍ଟି ହୋଇଛି ।
ପାଖରେ ଥିବା ମହିଳାମାନେ ଏଥିରେ ହସ୍ତକ୍ଷେପ କରି ପରିସ୍ଥିତିକୁ ବହୁ ସମୟ ପରେ ଶାନ୍ତ କରାଇଛନ୍ତି । ଏହି ଘଟଣାର କିଛି ଦିନ ପୂର୍ବରୁ ଦିଲ୍ଲୀ ମେଟ୍ରୋରେ ମଧ୍ୟ ମହିଳାଙ୍କ ମଧ୍ୟରେ ଝଗଡାର ଭିଡିଓ ଭାଇରାଲ ହୋଇଥିଲା । ଏହି ମାମଲାରେ ଦୁଇ ଜଣ ମହିଳାଙ୍କ ମଧ୍ୟରେ ସିଟ୍ରେ ବସିବାକୁ ନେଇ ମାରପିଟ୍ ହୋଇଥିଲା ।
