ଓଡ଼ିଶାରେ ୪୭ନମୁନାରୁ ୪୬ନେଗଟିଭ୍ : ସୁବ୍ରତ ବାଗଚୀ

ଭୁବନେଶ୍ୱର, ୧୮ା୩(ଓଡ଼ିଶା ଭାସ୍କର): ଗତ ତିନି ଦିନ ପରି ଆଜି ମଧ୍ୟ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କରୋନା ସମ୍ପର୍କିତ ୨୪ଘଣ୍ଟାର ଅପଡ଼େଟ ଦେଇଛନ୍ତି ଆଇଇସି ମୁଖ୍ୟ ସୁବ୍ରତ ବାଗଚୀ । ସେ କହିଛନ୍ତି କରୋନା ନେଇ କୌଣସି ଅବହେଳାର ପ୍ରଶ୍ନ ଉଠୁନି । ଆଜି ସୁଦ୍ଧା କରୋନା ୧୬୭ଟି ଦେଶକୁ ବ୍ୟାପିଛି । କରୋନାରେ ସାରା ବିଶ୍ୱରେ ଏକ ଲକ୍ଷ ୯୯ହଜାର ଲୋକ ଆକ୍ରାନ୍ତ ଅଛନ୍ତି । କରୋନାରେ ଭାରତରେ ୧୪୮ ଜଣ ଆକ୍ରାନ୍ତ ହୋଇଥିବା ବେଳେ ଓଡ଼ିଶାରେ ଜଣେ ବ୍ୟକ୍ତି କରୋନାରେ ଆକ୍ରାନ୍ତ ଅଛନ୍ତି । ଓଡ଼ିଶାରେ ୪୭ଜଣଙ୍କ ନମୁନା ପରୀକ୍ଷା ହୋଇଥିଲା । ଏଥିରୁ ୪୬ଟି ନମୁନା ନେଗଟିଭ୍ ଆସିଛି । ଗତକାଲି ପଠାଯାଇଥିବା ୧୨ଟି ନମୁନା ସବୁ ନେଗଟିଭ୍ ଆସିଛି । ରାଜ୍ୟରେ ଆକ୍ରାନ୍ତ ଥିବା ବ୍ୟକ୍ତି ଜଣଙ୍କ ଅବସ୍ଥା ଭଲ ରହିଛି ବୋଲି ସେ କହିଛନ୍ତି । ସେ ଧୀରେ ଧୀରେ ସୁସ୍ଥ ହେବାରେ ମଧ୍ୟ ଲାଗିଛନ୍ତି ।
ଏହାସହ ୧୦୪ ନମ୍ବରର ବ୍ୟାପକତା ଉପରେ ଜୋର ଦିଆଯାଉଛି । ଏବେ ସୁଦ୍ଧା ଅନଲାଇନରେ ବାହାରୁ ଆସିଥିବା ନେଇ ୨୧୩୧ରୁ ଅଧିକ ଲୋକ ପଞ୍ଜୀକରଣ କରିଛନ୍ତି । ୮୦ଟି ଦେଶରୁ ଆସିଥିବା ଲୋକ ପଞ୍ଜୀକରଣ କରିଛନ୍ତି । ସାମାଜିକ ଦୂରତା ବଜାୟ ରଖିବା ଉପରେ ଗୁରୁତ୍ୱ ଦେବା ପାଇଁ ପରାମର୍ଶ ଦିଆଯାଇଛି । ମହାପ୍ରଭୁ ୧୪ଦିନ ଅଣସରରେ ରହିଥାନ୍ତି ସେହିପରି କ୍ୱାରେଣ୍ଟାଇନରେ ୧୪ଦିନ ରହିବାକୁ କୁହାଯାଉଛି ।
ମାସ୍କ କୁ ନେଇ ମଧ୍ୟ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଛନ୍ତି ସୁବ୍ରତ ବାଗଚୀ । ସେ କହିଛନ୍ତି ଯାହାର ଦେହ ଭଲ ନାହିଁ ସେ ମାସ୍କ ପିନ୍ଧିବା ଆବଶ୍ୟକ । ଏହାସହ ସ୍ୱାସ୍ଥ୍ୟ କର୍ମଚାରୀମାନେ ମଧ୍ୟ ମାସ୍କ ପିନ୍ଧିବା ଆବଶ୍ୟକ । କିନ୍ତୁ ମାସ୍କ ଯଦି ଆବଶ୍ୟକ ନାହିଁ ତାହାଲେ ନପିନ୍ଧିବାକୁ ସେ କହିଛନ୍ତି । ଏହାସହ ସାନିଟାଇଜର ବଦଳରେ ସାବୁନରେ ହାତ ଧୋଇଲେ ବି ନିରାପଦ ବୋଲି ସେ କହିଛନ୍ତି । ମନ୍ଦିର, ମସ୍ଜିଦ, ଗୀର୍ଜାକୁ ସୁରକ୍ଷିତ ରଖିବା ଉପରେ ଗୁରୁତ୍ୱ ଦେବାକୁ କହିଛନ୍ତି ।

Get real time updates directly on you device, subscribe now.