୩୪ ପୋଲିସ ଜିଲ୍ଲାରେ ଖୋଲିବ ଶିଶୁ ଅନୁକୂଳ ପୋଲିସ ଷ୍ଟେସନ, ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ

ପିଲାଙ୍କ ସୁବିଧା ପାଇଁ ରହିବ ବିଛଣା, ଚୌକି ଓ ଟେବୁଲ ସୁବିଧା

ଭୁବନେଶ୍ୱର (ଭାସ୍କର ନ୍ୟୁଜ): ବିଭିନ୍ନ ସମୟରେ ବିଭିନ୍ନ କାରଣରୁ ଆଇନର ପରିସରକୁ ଆସୁଥିବା ଅନେକ ଶିଶୁ ସହାୟତା ଆବଶ୍ୟକ କରୁଥିବାବେଳେ ସେହି ଶିଶୁମାନଙ୍କ ପାଇଁ ଥାନା ଭିତରେ ସ୍ୱତନ୍ତ୍ର ଅନୁକୂଳ ପରିବେଶର ଆବଶ୍ୟକତା ରହିଛି । ଏହାକୁ ଦୃଷ୍ଟିରେ ରଖି ରାଜ୍ୟରେ ୩୪ଟି ଶିଶୁ ଅନୁକୂଳ ପୋଲିସ ଷ୍ଟେସନ ସ୍ଥାପନ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି ।

ସେ କହିଛନ୍ତି ଯେ, ଏହି ସବୁ ପୋଲିସ ଷ୍ଟେସନରେ ଶିଶୁମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ଉପଲବ୍ଧ କରାଯିବ । ଏହିସବୁ ଥାନାଗୁଡ଼ିକରେ ସ୍ୱତନ୍ତ୍ର ଲୋଗୋ ଓ ଫଳକ ରହିବା ସହ ଛୋଟ ଛୋଟ ପୁସ୍ତକାଗାର ମଧ୍ୟ ସ୍ଥାପନ କରାଯିବ । ଏହି ପୁସ୍ତକାଗାରରେ ବିଭିନ୍ନ ରୁଚିସମ୍ପନ୍ନ ପୁସ୍ତକ, ପତ୍ର ତ୍ରିକା ଓ ସମ୍ବାଦପତ୍ର ରଖାଯିବ । ଏହାସହିତ ଶିଶୁମାନଙ୍କ ସୁବିଧା ପାଇଁ ବିଛଣା, ଚୌକି ଓ ଟେବୁଲ ମଧ୍ୟ ରଖାଯିବ । ଏତଦ୍‌ବ୍ୟତୀତ ଏହି ଶିଶୁମାନଙ୍କ ଅଧିକାର ସମ୍ପର୍କୀତ ଫଳକ ଲଗାଯିବ । ଏପରିକି ଦାୟିତ୍ୱରେ ଥିବା ପୋଲିସ ଅଧିକାରୀମାନେ ଏହି ଶିଶୁମାନଙ୍କ ପ୍ରତି କିପରି ବ୍ୟବହାର କରିବେ ସେ ନେଇ ମଧ୍ୟ ସୂଚନାଫଳ ଲଗାଯିବ । ଏହାସହିତ ପିଲାଙ୍କ ପାଇଁ ଖେଳଣା ଓ ଅନ୍ୟାନ୍ୟ ମନୋରଞ୍ଜନ ସାମଗ୍ରୀ ଉପଲବ୍ଧ କରାଯିବ ।

ଥାନା ପରିସର ଭିତରେ ଏକ ଶିଶୁ ଅନୁକୂଳ ପରିବେଶ ସୃଷ୍ଟି କରିବାପାଇଁ ଏହିସବୁ ଥାନାର କାନ୍ଥଗୁଡ଼ିକରେ ସୁନ୍ଦର ଚିତ୍ର ରହିବା ସହିତ ବିଭିନ୍ନ ଶିକ୍ଷଣୀୟ ବିଷୟ ସ୍ଥାନୀତ କରାଯିବ । ସାଧାରଣ ଥାନାଗୁଡ଼ିକ ଠାରୁ ଏହାର ପରିବେଶକୁ ସମ୍ପୂର୍ଣ୍ଣ ଭିନ୍ନ ଭାବରେ ଗଠନ କରାଯିବ । ଫଳରେ ଥାନାକୁ ଯାଉଥିବା ଶିଶୁମାନଙ୍କ ମାନସିକ ଚାପ ହ୍ରାସ କରିବାରେ ଏହା ବିଶେଷ ସହାୟକ ହେବ ବୋଲି ଆଶା କରାଯାଉଛି । ଖୁବ୍‌ଶୀଘ୍ର ଏହିସବୁ ଥାନା ସ୍ଥାପନ ନିମନ୍ତେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି ।

Get real time updates directly on you device, subscribe now.

Comments
Loading...