ଭାରସାମ୍ୟ ହରାଇ ବିଲକୁ ଖସିଲା କାର୍, ଅଳ୍ପକେ ବର୍ତ୍ତିଲେ ୪ ଯାତ୍ରୀ
ସାଲେପୁର (ଭାସ୍କର ନ୍ୟୁଜ୍): ସାଲେପୁର ଶିଶୁଆ ବଜାର ନିକଟରେ ଭାରସାମ୍ୟ ହରାଇ ରାସ୍ତାକଡ଼କୁ ପଲଟିଲା କାର। ଦୁର୍ଘଟଣାରେ କାରରେ ଥିବା ୪ଜଣ ଯାତ୍ରୀ ଅଳ୍ପକେ ବର୍ତ୍ତି ଯାଇଥିବା ଜଣାଯାଇଛି । ସ୍ଥାନୀୟଲୋକଙ୍କ ସାହାୟତାରେ ସମସ୍ତ ଯାତ୍ରୀଙ୍କୁ ଉଦ୍ଧାର କରାଯାଇଛି।
ଖବରରୁ ପ୍ରକାଶ ଯେ, ବୁଧବାର ଅପରାହ୍ଣରେ କଟକସାଲେପୁର ରାସ୍ତାର ଶିଶୁଆ ବଜାର ନିକଟରେ କଟକରୁ ପଟ୍ଟାମୁଣ୍ଡାଇ ଅଭିମୁଖେ ଯାଉଥିବା ଇଣ୍ଡିଗୋ ଗାଡ଼ି ନମ୍ବର (ଓଡି୦୨ବି-ଏମ୍-୦୧୭୨) ଚାଳକର ଅସାବଧାନତା ଯୋଗୁ କାରଟି ଭାରସାମ୍ୟ ହରାଇ ରାସ୍ତା ପାଶ୍ୱର୍ରେ ଥିବା ବିଲକୁ ପଲଟିଯାଇଥିଲା । କାରରେ ଥିବା ୪ଜଣ ଯାତ୍ରୀ ଅଳ୍ପରେ ବଡ଼ ଦୁର୍ଘଟଣାରୁ ବର୍ତ୍ତିଯାଇଥିବା ପ୍ରତ୍ୟକ୍ଷଦର୍ଶୀଙ୍କ ଠାରୁ ପ୍ରକାଶ । ଜଣାପଡିଛି ଯେ, ପଟ୍ଟାମୁଣ୍ଡାଇ ଅଞ୍ଚଳର ଜଣେ ଯୁବକର ହାତ ଭାଙ୍ଗିଯାଇଥିବାରୁ କଟକ ବଡ଼ ମେଡ଼ିକାଲରୁ ଚିକିତ୍ସା କରି ଘରକୁ ଫେରୁଥିବାବେଳେ ଶିଶୁଆ ବଜାର ନିକଟରେ ଏହି ଦୁର୍ଘଟଣା ଘଟିଥିବା ସାଲେପୁର ଅଗ୍ନିଶମ ଅଧିକାରୀ ଶିଶିର କୁମାର ବେହେରା ପ୍ରକାଶ କରିଛନ୍ତି।
