ସରକାରୀ ସ୍କୁଲରେ ଛାତ୍ରଛାତ୍ରୀଙ୍କ ସଂଖ୍ୟା ବଢ଼ିଛି: ଗ୍ରାମାଞ୍ଚଳରେ ୯୮.୪% ପିଲା ସ୍କୁଲ ଯାଉଛନ୍ତି
ନୂଆଦିଲ୍ଲୀ: ଦେଶର ଗ୍ରାମୀଣ ଇଲାକାରେ ଶିକ୍ଷାର ନୂଆ ଚିତ୍ର ସାମ୍ନାକୁ ଆସିଛି । ଗ୍ରାମାଞ୍ଚଳରେ ଏବେ ୯୮.୪ ପ୍ରତିଶତ ପିଲା ସ୍କୁଲ ଯାଉଛନ୍ତି । ପ୍ରଥମଥର ପାଇଁ ଏହି ସଂଖ୍ୟା ୯୮ ପ୍ରତିଶତ ଉପରକୁ ଉଠିଛି । ୨୦୧୮ ମସିହାରେ ଏହି ସଂଖ୍ୟା ଥିଲା ୯୭.୨ ପ୍ରତିଶତ । ରିପୋର୍ଟରେ ଜଣାଯାଇଛି ଯେ ଘରୋଇ ସ୍କୁଲରେ ଆଡମିଶନ ନେଉଥିବା ଛାତ୍ରଛାତ୍ରୀଙ୍କ ସଂଖ୍ୟା ହ୍ରାସ ପାଇଛି ।
ଅନ୍ୟପକ୍ଷରେ ସରକାରୀ ସ୍କୁଲରେ ଛାତ୍ରଛାତ୍ରୀଙ୍କ ସଂଖ୍ୟା ପୂର୍ବାପେକ୍ଷା ବଢ଼ିଥିବା ଜଣାଯାଇଛି । ୪ ବର୍ଷ ପୂର୍ବରୁ ଅର୍ଥାତ ୨୦୧୮ରେ ଘରୋଇ ସ୍କୁଲରେ ୩୦.୯ ପ୍ରତିଶତ ଛାତ୍ରଛାତ୍ରୀ ଅଧ୍ୟୟନ କରୁଥିଲେ କିନ୍ତୁ ୨୦୨୨ରେ ଏହା ୨୫ ପ୍ରତିଶତକୁ ଖସିଆସିଛି । ସରକାରୀ ସ୍କୁଲରେ ୬-୧୪ ବର୍ଷ ବୟସର ଆଡ୍ମିଶନ୍ ନେଉଥିବା ଛାତ୍ରଛାତ୍ରୀଙ୍କ ସଂଖ୍ୟା ଏବେ ୭୨.୯ ପ୍ରତିଶତ ହୋଇଥିବାବେଳେ ୨୦୧୮ରେ ଏହା ୬୬ ପ୍ରତିଶତ ଥିଲା ।
ସେହିପରି ଦେଶରେ ସ୍କୁଲରେ ଶିକ୍ଷୟ ଶିକ୍ଷୟିତ୍ରୀଙ୍କ ଉପସ୍ଥିତିରେ ବି ସୁଧାର ଆସିଛି । ୨୦୨୨ରେ ଉପସ୍ଥିତି ସଂଖ୍ୟା ୮୭ ପ୍ରତିଶତ ରେକର୍ଡ କରାଯାଇଥିବା ବେଳେ ୨୦୧୮ରେ ଏହା ୮୫.୪ ପ୍ରତିଶତ ଥିଲା । ଛାତ୍ରଛାତ୍ରୀଙ୍କ ଉପସ୍ଥିତି ସଂଖ୍ୟା ବି ବୃଦ୍ଧି ପାଇଁ ୭୨ ପ୍ରତିଶତରେ ପହଞ୍ଚିଛି । ୭ରୁ ୧୦ ବର୍ଷ ବୟସର ଛାତ୍ରଛାତ୍ରୀ ସବୁଠୁ ଅଧିକ ୯୯% ଆଡମିଶନ୍ ନେଇଥିବା ବେଳେ ୧୧ରୁ ୧୪ ବର୍ଷର ଛାତ୍ରଛାତ୍ରୀ ୯୮ ପ୍ରତିଶତ ଆଡ୍ମିଶନ୍ ନେଇଥିବା ଜଣାଯାଇଛି ।
ସେହିପରି ୨୦୨୨ରେ ୬୯ ପ୍ରତିଶତ ସ୍କୁଲରେ ଖେଳପଡ଼ିଆ ପ୍ରସ୍ତୁତ ହୋଇଥିବା ଏଥିରେ ଜଣାଯାଇଛି । ୨୦୧୮ରେ ଏହା ୬୬.୫ ପ୍ରତିଶତ ଥିଲା । ସର୍ଭେରେ ଜଣାଯାଇଛି ୫୦ ପ୍ରତିଶତ ଛାତ୍ରଛାତ୍ରୀଙ୍କ ମା’ ଓ ୮୦ ପ୍ରତିଶତ ଛାତ୍ରଛାତ୍ରୀଙ୍କ ପିତା ୫ମ ଶ୍ରେଣୀରୁ ଅଧିକ ଅଧ୍ୟୟନ କରିଛନ୍ତି ।
