ବଙ୍ଗଳା ହିଂସାକୁ ନେଇ ଆକ୍ସନମୋଡରେ ଗୃହମନ୍ତ୍ରଣାଳୟ, ମମତା ସରକାରଙ୍କ ଠାରୁ ମାଗିଲେ ରିପୋର୍ଟ
ନୂଆଦିଲ୍ଲୀ: ପଶ୍ଚିମ ବଙ୍ଗଳାର ହାୱାଡାରେ ହୋଇଥିବା ହିଂସାକୁ ନେଇ ଗୃହମନ୍ତ୍ରଣାଳୟ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏଠାରେ ରାମ ନବମୀ ଶୋଭାଯାତ୍ରାରେ ଦୁଇ ଗୋଷ୍ଠୀ ମଧ୍ୟରେ ହୋଇଥିବା ହିଂସା ସମ୍ପର୍କରେ ଗୃହ ମନ୍ତ୍ରଣାଳୟ ମମତା ସରକାରଙ୍କଠାରୁ ରିପୋର୍ଟ ମାଗିଛନ୍ତି। ରାମ ନବମୀ ଶୋଭାଯାତ୍ରାରେ ଏଠାରେ ଦୁଇ ଗୋଷ୍ଠୀ ମଧ୍ୟରେ ହିଂସା ଦେଖାଦେଇଥିଲା ଏବଂ ଉଭୟ ପାର୍ଶ୍ୱରୁ ନିଆଁ ଲଗାଇ ଦିଆଯାଇଥିଲା। କିଛି ଦିନ ପୂର୍ବରୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ରାଜ୍ୟପାଳ ସିଭି ଆନନ୍ଦ ବୋଷଙ୍କ ସହ କଥା ହୋଇଥିଲେ ଏବଂ ରାଜ୍ୟର ବର୍ତ୍ତମାନର ସ୍ଥିତିକୁ ବିଶେଷ କରି ହାୱାଡା ହିଂସାକାଣ୍ଡରେ ଅନୁଧ୍ୟାନ କରିଥିଲେ।
ସୂଚନାନୁସାରେ, ଗୃହ ମନ୍ତ୍ରଣାଳୟର ଚିଠିରେ କୁହାଯାଇଛି ଯେ, ବଙ୍ଗଳାରେ କାହିଁକି ସୁରକ୍ଷା ଅଭାବ ଦେଖାଦେଇଛି? ବିଶେଷକରି ଏକ ସମୟରେ ଯେତେବେଳେ ରାମନବମୀ ଏବଂ ମୁସଲମାନମାନେ ରମଜାନ ପାଇଁ ଉପବାସ କରୁଛନ୍ତି। ସୂତ୍ର ଏହା ମଧ୍ୟ କହିଛି ଯେ, ପୋଲିସର କାର୍ଯ୍ୟାନୁଷ୍ଠାନ ଠିକ୍ ସମୟରେ ହୋଇଥିବାବେଳେ କେବଳ ବଙ୍ଗଳା ଏବଂ ବିହାରରେ କାର୍ଯ୍ୟାନୁଷ୍ଠାନର ଅଭାବ ଦେଖାଯାଇଛି।
ଗୁରୁବାର (ମାର୍ଚ୍ଚ ୩୦) ହାୱାଡା ସହରର ଶିବପୁର ଅଞ୍ଚଳରେ ରାମନବମୀ ଶୋଭାଯାତ୍ରାରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା। ଏହା ପରେ ଶୁକ୍ରବାର ଦିନ ପୋଲିସ ଫୋର୍ସ ମୁତୟନ ହେବା ପରେ ଏହି ଅଞ୍ଚଳରେ ପରିସ୍ଥିତି ଶାନ୍ତିପୂର୍ଣ୍ଣ ରହିଥିଲା କିନ୍ତୁ ପୁଣି ପରଦିନ ହିଂସା ଆରମ୍ଭ ହୋଇଥିଲା। ହିଂସା ସମୟରେ ଅନେକ ଦୋକାନ ଏବଂ ଅଟୋ-ରିକ୍ସା ଭଙ୍ଗାରୁଜା ହୋଇଥିବାବେଳେ କେତେକ ପୋଲିସ ଗାଡି ସମେତ ଅନେକ କାରରେ ନିଆଁ ଲାଗିଯାଇଥିଲା। ଭିଡ଼କୁ ନିୟନ୍ତ୍ରଣ କରିବା ପାଇଁ ପୋଲିସ ବଳ ପ୍ରୟୋଗ କରିଥିଲା।
