ସାମ୍ନାକୁ ଆସିଲା ସାବରିମାଳାରେ ବାପାଙ୍କୁ ଖୋଜିବା ପାଇଁ ସାହାଯ୍ୟ ମାଗୁଥିବା ଶିଶୁର ହୃଦୟ ବିଦାରକ ଭିଡିଓ
ଓଡ଼ିଶା ଭାସ୍କର: ସାବରିମାଳାରେ ଗତ ୫ ଦିନ ହେବ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି ଏବଂ ଭିଡର ଅବ୍ୟବସ୍ଥାକୁ ନେଇ ବିରୋଧୀ କେରଳ ସରକାରଙ୍କୁ ସମାଲୋଚନା ଜାରି ରଖିଛନ୍ତି । ପ୍ରବଳ ଭିଡ଼ ଯୋଗୁଁ ଅନେକ ଶ୍ରଦ୍ଧାଳୁ ସାବରିମାଳା ମନ୍ଦିର ଏବଂ ଭଗବାନ ଆୟପ୍ପାଙ୍କ ଦର୍ଶନ ନପାଇ ପାଣ୍ଡାଲମରୁ ଫେରୁଛନ୍ତି। ସେପଟେ ସାବରିମାଳାରେ ରାସ୍ତା ହରାଇଥିବା ଜଣେ ଶିଶୁ କାନ୍ଦୁଥିବାର ଭିଡିଓ ସାମ୍ନାକୁ ଆସିଛି । ଫୁଟେଜରେ ଦେଖିବାକୁ ମିଳିଛି ଯେ ଶିଶୁଟି ନୀଳକ୍କଲରେ ଭିଡ଼ ଭିତରେ ହଜି ଯାଇଥିବା ତାଙ୍କ ବାପାଙ୍କୁ ଖୋଜୁଛି। ହାତ ଯୋଡ଼ି ପୁଲିସ ସମ୍ମୁଖରେ ଚିତ୍କାର କରୁଥିବା ଶିଶୁଟି ଶେଷରେ ବାପାଙ୍କୁ ଦେଖି ହାତ ହଲାଇଥିଲା।
ସେପଟେ ସାବରିମାଳାରେ ତୀର୍ଥଯାତ୍ରୀଙ୍କ ସଂଖ୍ୟା ବୃଦ୍ଧି ପାଉଥିବାରୁ ଅଧିକ ସମନ୍ୱିତ ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଛନ୍ତି କେରଳ ମୁଖ୍ୟମନ୍ତ୍ରୀ । ତୀର୍ଥଯାତ୍ରୀଙ୍କୁ ଯେପରି କ୍ଷତି ନପହଞ୍ଚେ ସେଥିପାଇଁ ବ୍ୟବସ୍ଥା କରାଯିବା ଉଚିତ। ସମୀକ୍ଷା ବୈଠକରେ ଦେବସ୍ୱମ ମନ୍ତ୍ରୀ କେ ରାଧାକ୍ରିଷ୍ଣନ, ଜଙ୍ଗଲ ମନ୍ତ୍ରୀ ଏକେ ଶଶିନ୍ଦ୍ରନ, ମୁଖ୍ୟ ଶାସନ ସଚିବ ଡ. ଭି ବେଣୁ, ଦେବସ୍ୱାମ ବୋର୍ଡ ସଭାପତି ପିଏସ୍ ପ୍ରଶାନ୍ତ, ରାଜ୍ୟ ପୁଲିସ ମୁଖ୍ୟ ଶେଖ୍ ଦରବେଶ ସାହିବ, ଜିଲ୍ଲାପାଳ ଓ ଅନ୍ୟମାନେ ଯୋଗ ଦେଇଥିଲେ।
Hello @pinarayivijayan & communist govt !!!
Karma has no deadline…!!#Sabarimala #Kerala #Hindus pic.twitter.com/PC8Z5vKOJe
— Pratheesh Viswanath (@pratheesh_Hind) December 12, 2023
ମିଳିଥିବା ସୂଚନା ଅନୁଯାୟୀ, ସାବରିମାଳାରେ ଜନସମାଗମ ଅସମ୍ଭାଳ ହୋଇପଡ଼ିଥିଲା ଏବଂ ଅନେକ ଲୋକ ପାଣ୍ଡାଲମର ଭାଲିଆ କୋଇକ୍କଲ ଶ୍ରୀ ଧର୍ମ ଶାସ୍ତ୍ର ମନ୍ଦିର ଦର୍ଶନ କରିବା ପରେ ଚାଲିଯାଇ ଘରକୁ ଯାଇଥିଲେ। ଘଣ୍ଟା ଘଣ୍ଟା ଧରି ଅପେକ୍ଷା କରିବା ପରେ ପର୍ବତ ଉପରକୁ ଚଢ଼ି ନପାରି ଭକ୍ତମାନେ ଫେରୁଛନ୍ତି। ଏଠାରେ ଏବେ ବି ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି ଏବଂ ଆଦୌ ଆଶ୍ୱସ୍ତି ମିଳୁନାହିଁ। କେଏସଆରଟିସି ବସ୍ ଘଣ୍ଟା ଘଣ୍ଟା ଧରି ଅଟକି ରହିବାରୁ ଅନେକ ଲୋକ ୧୦ ଘଣ୍ଟା ପର୍ଯ୍ୟନ୍ତ ଅପେକ୍ଷା କରିବାକୁ ବାଧ୍ୟ ହୋଇଥିଲେ। ପମ୍ପାରୁ ପ୍ରତି ୧୦ ମିନିଟରେ କେଏସଆରଟିସି ବସ୍ ଚଳାଚଳ କରିଥାଏ। ଘଣ୍ଟା ଘଣ୍ଟା ଧରି ଜଙ୍ଗଲ ରାସ୍ତାରେ ଅନେକ ଗାଡ଼ି ଅଟକି ରହିଛି। ପଳାପଲ୍ଲୀ ଇଲାବୁଙ୍କଲ ପଥ ସମେତ ଜଙ୍ଗଲରେ ଫସି ରହିଥିବା ତୀର୍ଥଯାତ୍ରୀଙ୍କୁ ପାଣି କିମ୍ବା ଖାଦ୍ୟ ମିଳୁନାହିଁ। ସେପଟେ ଭିଡ଼ ଓ କଟକଣା ଜାରି ରହିଥିବା ବେଳେ ଆଜି ୮୯,୯୮୧ ଜଣ ଦର୍ଶନ ପାଇଁ ବୁକିଂ କରିଛନ୍ତି।