ଅସ୍ତ ହେଉଥିବା ବାଜିରେ ସୂର୍ଯ୍ୟୋଦୟ କରିଥିଲେ ସୂର୍ଯ୍ୟକୁମାର, ଫାଇନାଲ ମ୍ୟାଚର ଟର୍ଣ୍ଣିଂ ପଏଣ୍ଟ

ଓଡିଶା ଭାସ୍କର : ବିଶ୍ୱ ବିଜେତା ହୋଇସାରିଛି ଟିମ୍ ଇଣ୍ଡିଆ । ସାରା ଭାରତରେ କ୍ରିକେଟର ଦୀପାବଳି ପାଳନ କରାଯାଉଛି । ଗତକାଲି ଭାରତ ଦକ୍ଷିଣ ଆଫ୍ରିକାକୁ ହରାଇ ୧୩ ବର୍ଷ ପରେ ଆଇସିସି ଟ୍ୱେଣ୍ଟି ଟ୍ୱେଣ୍ଟି ବିଶ୍ୱକପ ଜିତିଛି ରୋହିତବାହିନୀ । ଭାରତ ଫାଇନାଲରେ ୧୭୬ ରନର ବିଜୟ ଲକ୍ଷ୍ୟ ଦେଇଥିଲା ଦକ୍ଷିଣ ଆଫ୍ରିକାକୁ । ଜବାବରେ ଦକ୍ଷିଣ ଆଫ୍ରିକା ଦଳ ବ୍ୟାଟିଂ କରିବାକୁ ଆସି ପ୍ରାରମ୍ଭିକ ବିପର୍ଯ୍ୟୟର ସାମ୍ନା କରିଥିଲା । କିନ୍ତୁ, ପରବର୍ତ୍ତୀ ସମୟରେ ବ୍ୟାଟର ହେନରିକ କ୍ଲାସେନ ଓ ଡେଭିଡ ମିଲରଙ୍କ ଧୂଆଁଧାର ବ୍ୟାଟିଂ ସାଉଥ ଆଫ୍ରିକାକୁ ବିଜୟର ଦ୍ୱାରଦେଶରେ ପହଞ୍ଚାଇ ଦେଇଥିଲେ । ଏହାପରେ ହାର୍ଦ୍ଦିକ ପାଣ୍ଡ୍ୟା ହେନରିକ କ୍ଲାସନଙ୍କ ଗୁରୁତ୍ୱପୂର୍ଣ୍ଣ ୱିକେଟ ନେଇଥିଲେ । ମାତ୍ର ଫାଇନାଲ ଫାଇଟରେ ଡେଭିଡ ମିଲରଙ୍କ ୱିକେଟ ମ୍ୟାଚ ଟଣ୍ଣିଂ ପଏଣ୍ଟ ଥିଲା ଯାହାଙ୍କୁ ସୂର୍ଯ୍ୟକୁମାର ଯାଦବ ବାଉଣ୍ଡ୍ରୀ ଲାଇନରେ ଅଦ୍ଭୂତ ଭାବରେ କ୍ୟାଚ କରି ନେଇଥିଲେ ।

ଶେଷ ଓଭରରେ ଦକ୍ଷିଣ ଆଫ୍ରିକାକୁ ଜିତିବା ପାଇଁ ମାତ୍ର ୧୬ ରନର ଆବଶ୍ୟକତା ଥିଲା । ଏହି ସମୟରେ ଷ୍ଟ୍ରାଇକରେ ଡେଭିଡ ମିଲର ଥିଲେ । ହାର୍ଦ୍ଦିକଙ୍କ ଫୁଲଟସ ବଲକୁ ମିଲର ଜୋରରେ ପ୍ରହର କରିଥିଲେ । ଯାହା ବାଉଣ୍ଡ୍ରୀ ଲାଇନ ପାଖକୁ ଯାଇ ଛକା ହଉ ହଉ ହେଇ ନ ଥିଲା । ଏହି ସମୟରେ ସୂର୍ଯ୍ୟକୁମାର ଯାଦବ ଦୌଡିକି ଆସି ଅଦ୍ଭୂତ ଭାବରେ ମିଲରଙ୍କ କ୍ୟାଚ ନେଇଥିଲେ । ବଲ ବାଉଣ୍ଡ୍ରୀକୁ ଛୁଇଁବାକୁ ଯାଉଥିଲା, ମାତ୍ର ତାହା କରିବାକୁ ଦେଇ ନ ଥିଲେ ସୂର୍ଯ୍ୟକୁମାର । ବଲକୁ ସେ ଉପରକୁ ଭିଙ୍ଗି ତାହାକୁ ସୁନ୍ଦର ଭାବରେ କ୍ୟାଚ କରିଥିଲେ । ଲାଗୁଥିଲା ଏ କ୍ୟାଚ ହୋଇ ନ ଥିଲେ ଭାରତ ହାତରୁ ମ୍ୟାଚ ଯାଇ ଥାଆନ୍ତା ଓ ଟ୍ରଫି ବି । ବିଶ୍ୱକପ କ୍ରିକେଟ ଇତିହାସରେ ଏହାକୁ ସର୍ବଶ୍ରେଷ୍ଠ କ୍ୟାଚ ବୋଲି ବିବେଚନା କରୁଛନ୍ତି ଅନେକ ଫ୍ୟାନ୍ସ ଓ କ୍ରିକେଟର । ସୂର୍ଯ୍ୟକୁମାର ଯାଦବ ଭାରତର ସୂର୍ଯ୍ୟକୁ ଅସ୍ତ ହେବାକୁ ଦେଇ ନ ଥିଲେ । ଡେଭିଡ ମିଲରଙ୍କ କ୍ୟାଚ କରି ସେ ଭାରତକୁ ଟ୍ରଫି ଭେଟି ଦେଇଥିଲେ । ଯାହାର ଅପେକ୍ଷା ଦୀର୍ଘ ୧୧ ବର୍ଷରୁ ଥିଲା ।