କାର୍ ଭିତରେ ଶିଶୁମାନେ ଥିବା ଜାଣିନପାରି ଲକ୍ କରିଦେଲେ ମାଲିକ, ଶ୍ବାସରୁଦ୍ଧ ହୋଇ ଚାଲିଗଲା 4 ଜୀବନ

ନୂଆଦିଲ୍ଲୀ: ଗୁଜୁରାଟରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି । କାର୍ ଭିତରେ ଶ୍ବାସରୁଦ୍ଧ ହୋଇ 4 ଶିଶୁଙ୍କ ଜୀବନ ଚାଲିଯାଇଛି । ଗୁଜୁରାଟର ଆମରେଲିରେ ଘଟିଯାଇଛି ଏହି ଘଟଣା । ତେବେ କାର୍ ଭିତରେ ଶ୍ବାସରୁଦ୍ଧ ହୋଇ ଶିଶୁମାନଙ୍କ ଜୀବନ ଯିବା କାରଣରୁ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ଏନେଇ ଆମରେଲି ଉପ ଆରକ୍ଷୀ ଅଧୀକ୍ଷକ ଚିରାଗ ଦେଶାଇ ଏହି ସୂଚନା ଦେଇଛନ୍ତି ।

ସୂଚନା ଅନୁସାରେ, ଦମ୍ପତି ନିଜ ଛୁଆକୁ ଛାଡି ପ୍ରତିଦିନ କାମକୁ ଯାଇଥିଲେ । ଶନିବାର ଦିନ ମଧ୍ୟ ଛୁଆକୁ ଛାଡି ସେମାନେ ଜମିକୁ ଯାଇଥିଲେ । ତେବେ ଘର ପାଖେ ରହିଥିବା କାରକୁ ଦେଖି ଖେଳିବା ପାଇଁ ଛୁଆମାନେ ଚଢି ପଡିଥିଲେ । ତେବେ ଛୁଆମାନେ ଖେଳିବା ଜାଣିପାରିନଥିୱେ ଗାଡି ମାଲିକ । ଏହାପରେ ସେ ଗାଡିକୁ ଲକ୍ କରିଦେଇଥିଲେ । ତେବେ ଦୀର୍ଘ ସମୟ ଧରି କାରରେ ବନ୍ଦ ରହିବା କାରଣରୁ ଛୁଆମାନଙ୍କର ଶ୍ବାସରୁଦ୍ଧ ହୋଇଥିଲା । ଫଳରେ ସେମାନଙ୍କର ମୃତ୍ୟୁ ହୋଇଥିବା ନେଇ ପୋଲିସ ପକ୍ଷରୁ ସନ୍ଦେହ କରାଯାଉଛି । କିନ୍ତୁ ପ୍ରକୃତ କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । ତେବେ ସମସ୍ତ ଶିଶୁମାନଙ୍କ ବୟସ 2ରୁ 7 ବର୍ଷ ମଧ୍ୟରେ ହେବା ନେଇ କୁହାଯାଇଛି । ତେବେ ଦମ୍ପତି କାମ ସାରି ଘରକୁ ଫେରିବା ବେଳେ ଛୁଆମାନଙ୍କର ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ବର୍ତ୍ତମାନ ସୁଦ୍ଧା ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହୋଇନଥିବା ବେଳେ ତଦନ୍ତ ଆରମ୍ଭ କରିଛି ପୋଲିସ୍ ।