ମାଗଣା ହୋଇଗଲା ମେଟ୍ରୋରେ ଯିବା ଆସିବା, ମହିଳା ହୁଅନ୍ତୁ କି ପୁରୁଷ ଦେବାକୁ ପଡ଼ିବନି ଭଡ଼ା

ମଧ୍ୟପ୍ରଦେଶ: ମେଟ୍ରୋରେ ଯିବା ଆସିବା କରୁଛନ୍ତି କି? ଯଦି ହଁ, ତେବେ ଆପଣଙ୍କ ପାଇଁ ଏହି ଖବରଟି ବେଶ ଲାଭଦାୟକ। କାରଣ ମେଟ୍ରୋ ରେଳ ନିଗମ ଗୋଟିଏ ସପ୍ତାହ ପାଇଁ ମେଟ୍ରୋ ଯାତ୍ରା ମାଗଣା କରିଛି। ଆଜ୍ଞା ହଁ, ମଧ୍ୟପ୍ରଦେଶର ଇନ୍ଦୋରରେ 31 ମେରୁ ଏହା ଆରମ୍ଭ ହୋଇଛି। ଏପର୍ଯ୍ୟନ୍ତ ଏଥିରେ 1 ଲକ୍ଷରୁ ଅଧିକ ଯାତ୍ରୀ ଯାତ୍ରା କରିସାରିଲେଣି। ଏବେ ଆଉ ମାତ୍ର ଗୋଟିଏ ଦିନ ବାକି ଅଛି।

ରବିବାରଠାରୁ ଇନ୍ଦୋର ମେଟ୍ରୋରେ ଭଡ଼ା ଆଦାୟ ଆରମ୍ଭ ହେବ। ଏହାର ଉଦଘାଟନ ପରଠାରୁ, ମେଟ୍ରୋରେ ଯାତ୍ରା କରିବା ପାଇଁ ଲୋକଙ୍କ ମଧ୍ୟରେ ବହୁତ ଉତ୍ସାହ ଦେଖାଯାଇଥିବା ବେଳେ ପ୍ରତିଦିନ ଏଥିରେ ଯାତ୍ରୀଙ୍କ ସଂଖ୍ୟା ବୃଦ୍ଧି ପାଉଛି।

ସର୍ବନିମ୍ନ ଭଡ଼ା ୫ ଟଙ୍କା ହେବ: ରବିବାରଠାରୁ, ଯାତ୍ରୀମାନଙ୍କଠାରୁ ସର୍ବନିମ୍ନ 5 ଟଙ୍କା ଲେଖା ଭଡା ଆଦାୟ କରାଯିବ, ଯାହା 75 ପ୍ରତିଶତ ରିହାତି ସହିତ ସ୍ଥିର କରାଯାଇଛି। ଏହି ଭଡ଼ା ଆସନ୍ତା ସପ୍ତାହ ପର୍ଯ୍ୟନ୍ତ କାର୍ଯ୍ୟକାରୀ ହେବ।

ସୁପର କରିଡରରେ 5.9 କିଲୋମିଟର ଲମ୍ବା ସେକ୍ସନରେ ମେଟ୍ରୋ କାର୍ଯ୍ୟ ଆରମ୍ଭ ହେବା ପରେ, ଏବେ ବିମାନବନ୍ଦର ଅଞ୍ଚଳ ଗୁଡିକରେ ଟ୍ରାକ୍ ନିର୍ମାଣ ସହ ଜଡିତ କାମ ମଧ୍ୟ ତୀବ୍ର ହୋଇଛି। ବିମାନବନ୍ଦର କର୍ତ୍ତୃପକ୍ଷଙ୍କଠାରୁ ସୀମିତ ସର୍ତ୍ତାବଳୀ ସହିତ ମେଟ୍ରୋ କମ୍ପାନୀକୁ ଡ୍ରୋନ୍ ସର୍ଭେ ପାଇଁ ଅନୁମତି ମିଳିଛି।

ଏହା ସହିତ, ଗାନ୍ଧୀ ନଗରରୁ ସୁପର କରିଡର ଦେଇ ବାପଟ, ବିଜୟ ନଗର, ରାଡିସନ ଏବଂ ରୋବୋଟ ସ୍କୋୟାର ପର୍ଯ୍ୟନ୍ତ 17.5 କିଲୋମିଟର ଲମ୍ବା ଉଚ୍ଚ କରିଡର ଉପରେ କାମ ଚାଲିଛି। ଗାନ୍ଧୀ ନଗରରୁ ବିମାନବନ୍ଦର ପର୍ଯ୍ୟନ୍ତ ମେଟ୍ରୋ ଲାଇନ ଭୂତଳ ହେବା ସହ ପ୍ରଥମ ପର୍ଯ୍ୟାୟରେ ମୋଟ 31.32 କିଲୋମିଟର ଲମ୍ବା କରିଡର ନିର୍ମାଣ ହେବାକୁ ଯାଉଛି।

ଯୋଜନା ଅନୁସାରେ, ସୁପର କରିଡରରୁ ବିମାନବନ୍ଦର ପର୍ଯ୍ୟନ୍ତ ଏକ ମେଟ୍ରୋ କରିଡର ନିର୍ମାଣ କରାଯିବ, ଯେଉଁଥିରେ କିଛି ଅଂଶ ଉଚ୍ଚା ରହିବା ସହିତ କିଛି ଅଂଶ ଭୂତଳ ରହିବ।