ବାରମ୍ବାର ହେଉଥିବା କାଶ ହୋଇପାରେ କ୍ୟାନ୍ସରର ସଂକେତ; ଏହି ଲକ୍ଷଣ ଥିଲେ ତୁରନ୍ତ ନିଅନ୍ତୁ ଡାକ୍ତରଙ୍କ ପରାମର୍ଶ
ଶୀତ ଋତୁ ଏହା ସହିତ ଅନେକ ରୋଗ ଆଣିଥାଏ । ଥଣ୍ଡା ଏବଂ କାଶ ଏହି ସବୁ ରୋଗ ନିଶ୍ଚିତ ଭାବରେ ଶୀତ ୠତୁରେ ଅଧିକ ହୁଏ । କିନ୍ତୁ ଅନେକ ଦିନ ଧରି ହେଉଥିବା କାଶକୁ ହାଲୁକା ଭାବେ ଗ୍ରହଣ କରାଯିବା ଉଚିତ୍ ନୁହେଁ । ବେଳେବେଳେ ଶ୍ୱାସକ୍ରିୟା ସଂକ୍ରମଣ ପାଇଁ କାଶ ମାସ ମାସ ଧରି ରହିଥାଏ । କିନ୍ତୁ ଆପଣ କେବେ ଚିନ୍ତା କରିଛନ୍ତି କି? ଏହି ସ୍ଥାୟୀ କାଶ କିଛି ଗମ୍ଭୀର ମଧ୍ୟ ହୋଇପାରେ କିମ୍ବା ଏହା ଫୁସଫୁସ କ୍ୟାନ୍ସର ରୋଗର ଲକ୍ଷଣ ହୋଇପାରେ । ଯଦି ଆପଣଙ୍କର ଲଗାତାର କାଶ ହେଉଛି ତେବେ ଆପଣ ସତର୍କ ରହିବା ଉଚିତ୍ ।
ଆମେରିକାର ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ର (ସିଡିସି) ଅନୁଯାୟୀ, ଅନେକ ଲୋକଙ୍କଠାରେ ଫୁସଫୁସ କ୍ୟାନ୍ସର ରୋଗର ଭିନ୍ନ ଭିନ୍ନ ଲକ୍ଷଣ ଥାଏ । କିଛି ଲୋକଙ୍କର ଫୁସଫୁସ ସମ୍ବନ୍ଧୀୟ ଲକ୍ଷଣ ଥାଏ । ଫୁସଫୁସ କ୍ୟାନ୍ସର ରୋଗର କାଶ ଏକ ପ୍ରମୁଖ ଲକ୍ଷଣ ହୋଇଥିବାବେଳେ ଏହା ଅନେକ ରୋଗ ଏବଂ ସଂକ୍ରମଣର ଲକ୍ଷଣ ହୋଇପାରେ । ବିଶେଷକରି ଶୀତ ସମୟରେ ଶ୍ୱାସକ୍ରିୟା ସଂକ୍ରମଣ ବୃଦ୍ଧି ପାଇଥାଏ, ଯାହା ଦ୍ୱାରା ଲୋକମାନେ ଜାଣି ପାରନ୍ତି ନାହିଁ ଏହା କ’ଣ ପାଇଁ ହେଉଛି ।
ତେବେ, ବ୍ରିଟେନର ଜାତୀୟ ସ୍ୱାସ୍ଥ୍ୟ ସେବା ଅନୁଯାୟୀ, କାଶ ତିନି ସପ୍ତାହରୁ ଅଧିକ ଦିନ ପର୍ଯ୍ୟନ୍ତ ହେଉଥିଲେ, ଏହାକୁ ଅଣଦେଖା କରାଯିବା ଉଚିତ୍ ନୁହେଁ । ଡାକ୍ତରଙ୍କ ଦ୍ୱାରା ଆପଣଙ୍କ ସ୍ୱାସ୍ଥ୍ୟର ଯାଞ୍ଚ କରନ୍ତୁ । କାରଣ ଏହା ଫୁସଫୁସ କ୍ୟାନ୍ସରକୁ ସୂଚାଇପାରେ । ଯଦି କାଶରେ ଯନ୍ତ୍ରଣା ହୁଏ, ତେବେ ଏହା ଚିନ୍ତାର କାରଣ ହୋଇପାରେ ଏବଂ ଫୁସଫୁସ ବିଶେଷଜ୍ଞଙ୍କୁ ତୁରନ୍ତ ଦେଖାଇବା ଉଚିତ୍ ।
ଫୁସଫୁସ କ୍ୟାନ୍ସର ଦ୍ୱାରା ରକ୍ତସ୍ରାବ ହୋଇପାରେ, ଯାହାଦ୍ୱାରା ଆପଣଙ୍କର ରକ୍ତ କାଶ ମଧ୍ୟ ହୋଇପାରେ । ତେବେ ଫୁସଫୁସ କ୍ୟାନ୍ସର ରୋଗର ଅଧିକାଂଶ ମାମଲା ଧୂମପାନ ଦ୍ୱାରା ହୋଇଥାଏ କିନ୍ତୁ ଅନେକ ସମୟରେ ଯେଉଁମାନେ କେବେ ଧୂମପାନ କରିନାହାଁନ୍ତି ସେମାନେ ମଧ୍ୟ ଏହି ରୋଗର ଶିକାର ହୋଇଥାନ୍ତି । ସିଗାରେଟ ଟାଣିବା ଫୁସଫୁସ କ୍ୟାନ୍ସରର ସବୁଠାରୁ ବଡ ବିପଦର କାରଣ ହୋଇପାରେ । କ୍ୟାନ୍ସର ରୋଗର ସମ୍ଭାବନାକୁ ଏଡାଇବା ପାଇଁ ଏବଂ ଠିକ୍ ସମୟରେ ଉପଯୁକ୍ତ ଚିକିତ୍ସା ପାଇବା ପାଇଁ ନିୟମିତ ସ୍ୱାସ୍ଥ୍ୟ ଯାଞ୍ଚ କରିବା ଉଚିତ ।
