ବିବାହ ଭୋଜି ଖାଇ ଫେରିବା ବେଳେ ଦୁର୍ଘଟଣା, ଚାଲିଗଲେ ୪ ସାଙ୍ଗ

ଆଠଗଡ଼: ରାଜ୍ୟରେ ପ୍ରତିଦିନ ଦୁର୍ଘଟଣା ଘଟୁଥିବା ବେଳେ ଆଜି ଏକ ମର୍ମନ୍ତୁଦ ଦୁର୍ଘଟଣା ସାମ୍ନାକୁ ଆସିଛି । ଏହି ଦୁର୍ଘଟଣାରେ ୪ ଜଣ ସାଙ୍ଗ ପ୍ରାଣ ହରାଇଛନ୍ତି । ବିଳମ୍ବିତ ରାତିରେ ବିବାହ ଭୋଜି ଖାଇ ଫେରୁଥିବା ବେଳେ ଏହି ଦୁର୍ଘଟଣା ଘଟିଛି ।

ସୂଚନା ଅନୁଯାୟୀ, ଆଠଗଡ଼ର ତିଗିରିଆ ଗଦାଧରପୁର-ବିନ୍ଧାଣୀ ମା’ ରାସ୍ତାରେ ଏପରି ମର୍ମନ୍ତୁଦ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ଚାରି ଜଣ ସାଙ୍ଗ ବିବାହ ଭୋଜି ଖାଇ ଫେରୁଥିଲେ । ହଠାତ କାରଟି ଭାରସାମ୍ୟ ହରାଇ ଘର କାନ୍ଥରେ ପିଟି ହୋଇଛି । ଏହି ଭୟଙ୍କର ଦୁର୍ଘଟଣାରେ ଘର ଓ କାର ଚୁରମାର ହୋଇଯାଇଛି ।

ଅନ୍ୟପଟେ କଟକ-ଚାନ୍ଦବାଲି ରାସ୍ତାର ନିଶ୍ଚିନ୍ତକୋଇଲିରେ ଆଉ ଏକ ଦୁର୍ଘଟଣା ଘଟିଛି । ବସ୍ ପଛ ପଟୁ ଧକ୍କା ଦେଲା ବାଇକ୍ । ବସ୍ ତଳେ ଚାପି ହୋଇ ୨ ଜଣ ବାଇକ ଆରୋହୀଙ୍କର ମୃତ୍ୟୁ ଘଟିଛି । ୨ ମୃତକଙ୍କ ଘର ରଘୁନାଥପୁର ଅଞ୍ଚଳର ବୋଲି ଜଣାପଡିଛି ।