ଭାଗ ଭାଗ ହୋଇଯିବ କି ପାକିସ୍ତାନ ? ବେଲୁଚିସ୍ତାନ ପରେ ଏବେ ସିନ୍ଧର ସ୍ବାଧିନତା ଦାବି

ଇସଲାମାବାଦ: ବେଲୁଚିସ୍ତାନ ପରେ ଏବେ ପାକିସ୍ତାନର ସିନ୍ଧ ପ୍ରଦେଶରେ ମଧ୍ୟ ସ୍ୱାଧୀନତା ଦାବି ଜୋର ଧରିଛି। ସିନ୍ଧକୁ ଏକ ସ୍ୱତନ୍ତ୍ର ଦେଶ ଭାବରେ ଗଠନ କରିବାକୁ ଦାବି କରି ଏକ ରାଜନୈତିକ ଗୋଷ୍ଠୀ ଜୟ ସିନ୍ଧ ପ୍ରିଡମ୍ ମୁଭମେଣ୍ଟ (JSFM), ଶୁକ୍ରବାର ପାକିସ୍ତାନର ଏକ ରାଜପଥରେ ଶାନ୍ତିପୂର୍ଣ୍ଣ ଧାରଣା ଦେଇଥିଲା।

ଏହି ସମୟରେ, ନିଖୋଜ ଏବଂ ଜେଲରେ ଥିବା ସିନ୍ଧୀ ରାଷ୍ଟ୍ରବାଦୀଙ୍କୁ ମୁକ୍ତି ପାଇଁ ଦାବି କରାଯାଇଥିଲା। ସିନ୍ଧୁ ଦେଶର ଏକ ଓକିଲ ଗୋଷ୍ଠୀ, ସିନ୍ଧ ଏବଂ ବେଲୁଚିସ୍ତାନରେ ହୋଇଥିବା ନିଖୋଜ, ଅବୈଧ ଅଟକ ଏବଂ ମାନବାଧିକାର ଉଲ୍ଲଂଘନ ପ୍ରତି ବିଶ୍ୱ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିଥିଲା।

ସିନ୍ଧି ଜାତୀୟତାବାଦୀଙ୍କ ମୁକ୍ତି ପାଇଁ ଦାବି:

JSFM ଅଧକ୍ଷ ସୋହେଲ ଆବ୍ରୋ, ଜୁବୈର ଏବଂ ଅମର ଆଜାଦୀଙ୍କ ସମେତ ନେତାମାନେ ଜାହିଦ ଚନ୍ନା, ସଜ୍ଜାଦ ଚନ୍ନା, ଅଦନାନ ବଲୋଚ୍ ଏବଂ ଶାହିଦ ସୁମରୋଙ୍କୁ ତୁରନ୍ତ ମୁକ୍ତ କରିବାକୁ ଆହ୍ୱାନ କରିଥିଲେ। ଏହା ସହିତ ସେମାନଙ୍କ ବିରୁଦ୍ଧରେ ଥିବା ମିଥ୍ୟା ମାମଲା ପ୍ରତ୍ୟାହାର କରିବା ଏବଂ ବଳପୂର୍ବକ ଗିରଫ ହୋଇଥିବା ସମସ୍ତଙ୍କୁ ମୁକ୍ତ କରିବା ପାଇଁ ଦାବି କରାଯାଇଥିଲା ।

ଜେଲର ଫାଟକ ବନ୍ଦ କରିବାକୁ ଧମକ:

ଏଥିରେ ଆହୁରି କୁହାଯାଇଛି ଯେ,  ‘ଆମର ପ୍ରୟାସ ଶାନ୍ତିପୂର୍ଣ୍ଣ ଏବଂ ଗଣତାନ୍ତ୍ରିକ ଅଟେ । ଆମ ଲୋକମାନେ ମୁକ୍ତ ନହେବା ପର୍ଯ୍ୟନ୍ତ ଆମେ ଏହା ଜାରି ରଖିବୁ।’ ଏହି ସମୟରେ, ସେମାନେ ଜେଲରେ ବନ୍ଦୀ ଜାତୀୟତାବାଦୀମାନଙ୍କ ପ୍ରତି ହେଉଥିବା ଦୁର୍ବ୍ୟବହାର ବନ୍ଦ କରିବାକୁ ଚେତାବନୀ ଦେଇଥିଲେ ଏବଂ ଧମକ ଦେଇଥିଲେ ଯେ, ଯଦି ଏହା ଜାରି ରହେ ତେବେ ସେମାନେ ଜେଲର ମୁଖ୍ୟ ଫାଟକ ବନ୍ଦ କରିଦେବେ। ସେମାନେ ଜାତିସଂଘ, ଆମ୍ନେଷ୍ଟି ଇଣ୍ଟର୍‌ନ୍ୟାସନାଲ୍‌ ଏବଂ ହ୍ୟୁମାନ ରାଇଟ୍ସ ୱାଚ୍ ଭଳି ଅନ୍ତର୍ଜାତୀୟ ସଂଗଠନକୁ ମଧ୍ୟ ଆହ୍ୱାନ କରି ପାକିସ୍ତାନର ମାନବାଧିକାର ଉଲ୍ଲଂଘନ ଉପରେ ହସ୍ତକ୍ଷେପ ଏବଂ ବିଶ୍ୱବ୍ୟାପୀ ନିନ୍ଦା କରିବାକୁ ଅନୁରୋଧ କରିଛନ୍ତି।

ସିନ୍ଧରେ ସ୍ୱାଧୀନତା ପାଇଁ ଦାବି:

ପାକିସ୍ତାନର ସିନ୍ଧରେ ସିନ୍ଧିମାନେ ଐତିହାସିକ ଭାବରେ ସେମାନଙ୍କ ପରିଚୟ ଓ ସ୍ୱାଧୀନତା ପାଇଁ ସଂଘର୍ଷ କରି ଆସୁଛନ୍ତି । ଏବେ ଏହି ଦାବି ସ୍ୱାଧୀନତା ଆଡ଼କୁ ଗତି କରୁଛି। ସିନ୍ଧୀମାନେ ଅଭିଯୋଗ କରିଛନ୍ତି ଯେ, ପାକିସ୍ତାନ ସରକାର ବ୍ୟବସ୍ଥାଗତ ଅତ୍ୟାଚାର ମାଧ୍ୟମରେ ସିନ୍ଧୀ ସଂସ୍କୃତିକୁ ବିଲୁପ୍ତ କରୁଛନ୍ତି।

ଇତିମଧ୍ୟରେ, ଏହି ସପ୍ତାହରେ ବେଲୁଚିସ୍ତାନରେ ପାକିସ୍ତାନଠାରୁ ସ୍ୱାଧୀନତା ଘୋଷଣା କରାଯାଇଛି। ବେଲୁଚ୍ ନେତାମାନେ ସୋସିଆଲ ମିଡିଆରେ ଏହି ଘୋଷଣା ବିଷୟରେ ସୂଚନା ଦେଇଥିଲେ, ଯାହା ପରେ #RepublicOfBalochistan ଭଳି ହ୍ୟାସଟ୍ୟାଗ୍ ଟ୍ରେଣ୍ଡ କରିବା ଆରମ୍ଭ କରିଥିଲା।