ବିନା ଓବିସି ସଂରକ୍ଷଣରେ ଅନୁଷ୍ଠିତ ହେବ ନିର୍ବାଚନ ,ସରକାରଙ୍କ ଡ୍ରାଫ୍ଟ ବିଜ୍ଞପ୍ତି ପ୍ରତ୍ୟାଖ୍ୟାନ କରିଲେ ହାଇକୋର୍ଟ
ନୂଆଦିଲ୍ଲୀ : ୟୁପିରେ ଲୋକାଲ ଅର୍ବାନ ବଡି ନିର୍ବାଚନ ସମ୍ପର୍କରେ ଓବିସି ସଂରକ୍ଷଣ ସହ ଜଡିତ ଆବେଦନ ଉପରେ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଦେଇଛନ୍ତି। ଯାହା ରାଜ୍ୟ ସରକାରଙ୍କ ପାଇଁ ଏକ ବଡ ଝଟକା। ହାଇକୋର୍ଟର ଲକ୍ଷ୍ନୌ ବେଞ୍ଚ ନାଗରିକ ନିର୍ବାଚନ ପାଇଁ ଡିସେମ୍ବର ୫ ରେ ଜାରି କରାଯାଇଥିବା ବିଜ୍ଞପ୍ତି ଡ୍ରାଫ୍ଟକୁ ପ୍ରତ୍ୟାଖ୍ୟାନ କରିଛି। ଏହା ସହିତ କୋର୍ଟ ରାଜ୍ୟ ସରକାରଙ୍କୁ ଓବିସି ସଂରକ୍ଷଣ ବିନା ନିର୍ବାଚନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ପ୍ରସଙ୍ଗରେ ଦାଖଲ ହୋଇଥିବା ପିଟିସନ୍ ଉପରେ ଜଷ୍ଟିସ୍ ଦେବେନ୍ଦ୍ର କୁମାର ଉପାଧ୍ୟାୟ ଏବଂ ଜଷ୍ଟିସ୍ ସୌରଭ ଲାଭାନିଆର ଡିଭିଜନ୍ ବେଞ୍ଚ ଏହି ନିଷ୍ପତ୍ତି ଗ୍ରହଣ କରିଛନ୍ତି।
ଆହ୍ଲାବାଦ ହାଇକୋର୍ଟର ଲକ୍ଷ୍ନୌ ବେଞ୍ଚ ଗତ ଶନିବାର ନିର୍ବାଚନ ଉପରେ ଶୁଣାଣି କରି ଏହାର ନିଷ୍ପତ୍ତି ସଂରକ୍ଷିତ ରଖିଛି। ଏହି ମାମଲା ସହ ଜଡିତ ନିର୍ବାଚନ ବିଜ୍ଞପ୍ତି ଜାରି କରିବାକୁ କୋର୍ଟ ସ୍ଥଗିତ ରଖିଥିଲେ। ଜଷ୍ଟିସ ଦେବେନ୍ଦ୍ର କୁମାର ଉପାଧ୍ୟାୟ ଏବଂ ଜଷ୍ଟିସ ସୌରଭ ଲାଭାନିଆଙ୍କ ବେଞ୍ଚରେ ବୈଭଵ ପାଣ୍ଡେ ଏବଂ ଅନ୍ୟମାନଙ୍କ ପକ୍ଷରୁ ଜନସ୍ୱାର୍ଥ ମାମଲା ଦାୟର କରାଯାଇଥିଲା।
ଅଭିଯୋଗ ପରେ ଏହା ଉପରେ ଡିସେମ୍ବର ୨୭ ପର୍ଯ୍ୟନ୍ତ ନିର୍ବାଚନ ତାରିଖ ଘୋଷଣା ଉପରେ ଶୁଣାଣି ସ୍ଥଗିତ ରଖା ଯାଇଛି । ବରିଷ୍ଠ ଓକିଲ ଏଲପି ମିଶ୍ର ଆବେଦନକାରୀଙ୍କ ପକ୍ଷରୁ ହାଜର ହୋଇଥିଲେ। ତାଙ୍କ ଯୁକ୍ତିରେ ସେ କହିଥିଲେ ଯେ ସହରାଞ୍ଚଳ ସ୍ଥାନୀୟ ସଂସ୍ଥାଗୁଡ଼ିକରେ ଓବିସି ସଂରକ୍ଷଣ ସେବା ତଥା ଶିକ୍ଷାନୁଷ୍ଠାନରେ ସଂରକ୍ଷଣଠାରୁ ଭିନ୍ନ।
ତେବେ ଏହି ଯାଚିକାକୁ ବିରୋଧ କରି ଅତିରିକ୍ତ ମୁଖ୍ୟ ଷ୍ଟାଣ୍ଡିଂ କାଉନସିଲ୍ ଅମିତାଭ ରାୟ କୋର୍ଟରେ ଯୁକ୍ତି ବାଢିଛନ୍ତି ଯେ ସରକାର ପୂର୍ବରୁ ସଂରକ୍ଷଣ କରିସାରିଛନ୍ତି। ସ୍ଥାନୀୟ ସରକାର ନିର୍ବାଚନରେ ଓବିସି ସଂରକ୍ଷଣ ପାଇଁ ମ୍ୟୁନିସିପାଲିଟି ଆକ୍ଟର ବ୍ୟବସ୍ଥା ମଧ୍ୟ ରାଜ୍ୟ ସରକାର ପାଳନ କରିଛନ୍ତି।
