ଟାଟା ମାଲିକାନାରେ ଓଡ଼ିଶାର ଆଉ ଏକ କମ୍ପାନୀ, ଜୁଲାଇରୁ କରାଯିବ ହସ୍ତାନ୍ତର
ନୂଆଦିଲ୍ଲୀ(ଓଡ଼ିଶା ଭାସ୍କର): ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନେତୃତ୍ବାଧୀନ ସରକାର ବିଭିନ୍ନ ସରକାରୀ ଉଦ୍ୟୋଗର ଘରୋଇକରଣ ଉପରେ ଏବେ ଜୋର ଦେଉଛନ୍ତି। ତେବେ ଆଉ ଏକ ଉଦ୍ୟୋଗକୁ ଘରୋଇ କମ୍ପାନୀ ହାତକୁ ଟେକି ଦେଇଛନ୍ତି ସରକାର। ଟାଟା ଗ୍ରୁପ୍ ଫାର୍ମକୁ ଓଡିଶା ସ୍ଥିତ ନୀଳାଚଳ ଇସ୍ପାତ ନିଗମ୍ ଲିମିଟେଡ୍ (NINL) ହସ୍ତାନ୍ତର ଜୁଲାଇ ମଧ୍ୟଭାଗରେ ଶେଷ ହେବାର ସମ୍ଭାବନା ରହିଛି। ଜଣେ ଅଧିକାରୀ ଏହି ସୂଚନା ଦେଇଛନ୍ତି। ଟାଟା ଷ୍ଟିଲର ଏକ ୟୁନିଟ୍ ଟାଟା ଷ୍ଟିଲ୍ ଲଙ୍ଗ୍ ପ୍ରଡକ୍ଟସ୍ (TSLP) ଚଳିତ ବର୍ଷ ଜାନୁଆରୀରେ ୧୨,୧୦୦ କୋଟି ଟଙ୍କା ମୂଲ୍ୟରେ NINL ରେ ୯୩.୭୧ ପ୍ରତିଶତ ଅଂଶଧନ ହାସଲ କରିବାକୁ ଏକ ଟେଣ୍ଡର ଜିତିଥିଲା। ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ, ନାଲୱା ଷ୍ଟିଲ ଆଣ୍ଡ ପାୱାର ଲିମିଟେଡ ଏବଂ ଜେଏସଡବ୍ଲୁ ଷ୍ଟିଲ ଲିମିଟେଡକୁ ପଛରେ ପକାଇ ଟାଟା ଏହି ସଫଳତା ହାସଲ କରିଛି।
“ଏହି ପ୍ରକ୍ରିୟା ଶେଷ ପର୍ଯ୍ୟାୟରେ ଅଛି ଏବଂ ହସ୍ତାନ୍ତର ଆସନ୍ତା ମାସ ମଧ୍ୟଭାଗରେ ହେବା ଉଚିତ ବୋଲି ଜଣେ ଅଧିକାରୀ ପିଟିଆଇକୁ କହିଛନ୍ତି। ଯେହେତୁ କମ୍ପାନୀରେ ସରକାରଙ୍କର କୌଣସି ଅଂଶଧନ ନାହିଁ, ବିକ୍ରୟ ଆୟ ବହିର୍ଭୂତ ସମ୍ପତ୍ତିରେ ଦିଆଯିବ ନାହିଁ। ଚାରିଟି CPSE ଏବଂ ଓଡିଶା ସରକାରଙ୍କ ଦୁଇଟି PSU କୁ କିଛି ଅର୍ଥ ମିଳିବ।
ନୀଳାଚଳ ଇସ୍ପାତ ନିଗମ ଲିମିଟେଡ଼ର ୧.୧ ମିଲିୟନ ଟନ କ୍ଷମତା ବିଶିଷ୍ଟ ଓଡ଼ିଶାର କଲିଙ୍ଗନଗରରେ ଏକ ଇଣ୍ଟିଗ୍ରେଟେଡ୍ ଷ୍ଟିଲ ପ୍ଲାଣ୍ଟ ଅଛି। ଏହି ସରକାରୀ କମ୍ପାନୀ ମଧ୍ୟ ବହୁ କ୍ଷତିରେ ଚାଲିଛି ଏବଂ ମାର୍ଚ୍ଚ ୩୦, ୨୦୨୦ ଠାରୁ ଏହି କାରଖାନା ବନ୍ଦ ଅଛି। ମାର୍ଚ୍ଚ ୩୧, ୨୦୨୧ ସୁଦ୍ଧା କମ୍ପାନୀର ୬,୬୦୦ କୋଟି ଟଙ୍କାର ଋଣ ଏବଂ ଅନ୍ୟାନ୍ୟ ଦାୟିତ୍ବ ରହିଛି, ଯେଉଁଥିରେ ପ୍ରମୋଟରଙ୍କ ପାଇଁ ୪,୧୧୬ କୋଟି, ବ୍ୟାଙ୍କ, ୧,୭୪୧ କୋଟି ଟଙ୍କା ଏବଂ କର୍ମଚାରୀଙ୍କ ଦରମା ସାମିଲ।
