ମନ୍ତ୍ରୀଙ୍କ ପରେ ସଚିବ ବଦଳିଲେ: ଅରବିନ୍ଦ ଅଗ୍ରୱାଲ ନୂଆ ଉଚ୍ଚଶିକ୍ଷା ସଚିବ
ଭୁବନେଶ୍ୱର(ଓଡ଼ିଶା ଭାସ୍କର): ଆଜି ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ ମନ୍ତ୍ରିମଣ୍ଡଳରୁ ବାଦ୍ ପଡ଼ିଥିଲେ । ରୋହିତଙ୍କୁ ମନ୍ତ୍ରିମଣ୍ଡଳରୁ ବାଦ ଦେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କୁ ସୁପାରିଶ କରିଥିଲେ । ଗତବର୍ଷ ଜୁନ ମାସରେ ରୋହିତଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇଥିବା ବେଳେ ଅଚାନକ ଏହି ନିଷ୍ପତ୍ତିକୁ ନେଇ ବେଶ୍ ଚର୍ଚ୍ଚା ହୋଇଥିଲା । ନିଜ ବିଭାଗରେ ସେ ଦକ୍ଷତା ମୁତାବକ ପ୍ରଦର୍ଶନ କରିଥିଲେ ବୋଲି ରୋହିତ ନିଜ ପ୍ରତିକ୍ରିୟାରେ କହିଥିଲେ ।
ତେବେ ଏହା ମଧ୍ୟରେ ପୁଣି ଏକ ବଡ଼ ଖବର ସାମ୍ନାକୁ ଆସିଛି । ଉଚ୍ଚଶିକ୍ଷା ମନ୍ତ୍ରୀ ପଦରୁ ବାଦ ପଡ଼ିବା ପରେ ଏବେ ବିଭାଗୀୟ ସଚିବ ମଧ୍ୟ ବାଦ୍ ପଡ଼ିଛନ୍ତି । ଉଚ୍ଚଶିକ୍ଷା ସଚିବ ବିଷ୍ଣୁପଦ ସେଠୀଙ୍କୁ ବଦଳି କରାଯାଇଛି । ଶ୍ରୀ ସେଠୀଙ୍କୁ ସାଧାରଣ ପ୍ରଶାସନ ବିଭାଗର ଓଏସଡି ଭାବେ ନିଯୁକ୍ତି ଦିଆଯାଇଛି । ଅରବିନ୍ଦ ଅଗ୍ରୱାଲଙ୍କୁ ଉଚ୍ଚଶିକ୍ଷା ବିଭାଗର ନୂଆ ସଚିବ ଭାବେ ଦାୟିତ୍ୱ ଦିଆଯାଇଛି । ବିଷ୍ଣୁପଦଙ୍କୁ ଉଚ୍ଚଶିକ୍ଷା ବିଭାଗ ସଚିବ ସହିତ ଓଡ଼ିଶା ହାଇଡ୍ରୋ ପାୱାର କପୋରେସନ (ଓଏଚପିସି)ର ଅଧ୍ୟକ୍ଷ ପଦରୁ ବାଦ୍ ଦିଆଯାଇଛି । ବିଶାଲ ଦେବଙ୍କୁ ଓଏଚପିସିର ନୂଆ ଅଧ୍ୟକ୍ଷ ଭାବେ ଦାୟିତ୍ୱ ଦିଆଯାଇଛି ।
ଗତ ୨୦୧୪ରେ ପ୍ରଥମ ଥର ପାଇଁ ରୋହିତ ବିଜେଡି ଟିକେଟରେ ବିଧାୟକ ଭାବେ ଜିତିଥିଲେ । ଏହାପରେ ସେ ୨୦୧୯ରେ ଦ୍ୱିତୀୟ ଥର ପାଇଁ ବିଧାନସଭାକୁ ନିର୍ବାଚିତ ହୋଇଥିଲେ । ନିକଟରେ ମୁଖ୍ୟମନ୍ତ୍ରୀ ବିଭିନ୍ନ ବିଭାଗର ସମୀକ୍ଷା କରିଥିଲେ । ଏହି ଅବସରରେ ବିଭାଗୀୟ ମନ୍ତ୍ରୀମାନେ ନିଜ ନିଜ ବିଭାଗର ରିପୋର୍ଟ ଉପସ୍ଥାପନ କରିଥିଲେ । ତେବେ ବିଭାଗୀୟ ଖରାପ ପ୍ରଦର୍ଶନ ପାଇଁ ମୁଖ୍ୟମନ୍ତ୍ରୀ ରାଜ୍ୟପାଳଙ୍କୁ ସୁପାରିଶ କରିଥିବା ଜଣାପଡ଼ିଥିଲା ।
