ମହାକାଶରୁ ପୃଥିବୀ ଆଡକୁ ମାଡିଆସୁଛି ବଡ ବିପଦ, ଟେନସନରେ ନାସାର ବୈଜ୍ଞାନିକ
ମହାକାଶରୁ ଏକ ବୃହତ୍ ଆଷ୍ଟେରଏଡ୍ ବା ଛୋଟା ତାରା ବହୁ ତୀବ୍ର ଭାବରେ ପୃଥିବୀ ଆଡକୁ ମାଡି ଆସୁଛି ବୋଲି ଆମେରିକା ଅନ୍ତରୀକ୍ଷ ଏଜେନ୍ସି ନାସା ପ୍ରକାଶ କରିଛି । କୁହାଯାଉଛି ଯେ, ଛୋଟା ତାରା ପୃଥିବୀର ସର୍ବୋଚ୍ଚ ପର୍ବତ ଏଭରେଷ୍ଟ ଠାରୁ ଅନେକ ଗୁଣରେ ବଡ । ଏହି ଆଷ୍ଟେରଏଡର ବେଗ ଘଣ୍ଟା ପ୍ରତି ୩୧,୩୧୯ କିଲୋମିଟର ରହିଛି ଅର୍ଥାତ୍ ପ୍ରତି ସେକେଣ୍ଡରେ ୮.୭୨ କିଲୋମିଟର ଗତିକରୁଛି । ଏହି ବେଗରେ ସେ ଯଦି ପୃଥିବୀର କୌଣସି ଅଂଶକୁ ଆଘାତ କରେ, ତେବେ ସୁନାମି ହୋଇପାରେ କିମ୍ବା ଏହା ଦେଶକୁ ନଷ୍ଟ କରିପାରେ ।
ତେବେ ନାସା କହିଛି ଯେ, ପୃଥିବୀଠାରୁ ପ୍ରାୟ ୬୪ ଲକ୍ଷ କିଲୋମିଟର ଦୂରରେ ଏହା ଅତିକ୍ରମ କରିବାକୁ ଥିବାରୁ ଆତଙ୍କିତ ହେବାର ନାହିଁ । ମହାକାଶ ବିଜ୍ଞାନରେ ଏହି ଦୂରତା ଅଧିକ ବିବେଚନା ହେଉନଥିଲେ ମଧ୍ୟ କମ୍ ବି ନୁହେଁ । ଏହା ପୃଥିବୀକୁ ଆଘାତ କରିପାରେ ବୋଲି କେତେକ ବୈଜ୍ଞାନିକ ଆଶଙ୍କା କରୁଛନ୍ତି । ଏହି ଆଷ୍ଟେରଏଡର ନାମ ୫୨୭୬୮ ରଖାଯାଇଛି । ପ୍ରଥମେ ଏହି ଉଲ୍କା ପିଣ୍ଡକୁ ୧୯୯୮ରେ ନାସା ଦେଖିଥିଲା, ଯାହାର ବ୍ୟାସ ପ୍ରାୟ ୪ କିଲୋମିଟର । ୨୯ ଏପ୍ରିଲରେ ଏହି ଆଷ୍ଟେରଏଡ୍ ପୃଥିବୀ ଦେଇ ଗତି କରିବ ବୋଲି ଆକଳନ କରାଯାଇଛି ।
