Actress ତମନ୍ନା ଭାଟିଆଙ୍କ ପାଇଁ ବଡ଼ ସମସ୍ୟା! ସଞ୍ଜୟ ଦତ୍ତଙ୍କ ପରେ ସମନ୍ କଲା ସାଇବର ସେଲ

ନୂଆଦିଲ୍ଲୀ: ବାହୁବଳୀ ଫେମ୍ ଅଭିନେତ୍ରୀ ତମନ୍ନା ଭାଟିଆଙ୍କ ପାଇଁ ଏକ ବଡ଼ ସମସ୍ୟା ମୁଣ୍ଡ ଟେକିଛି । ମହାରାଷ୍ଟ୍ର ସାଇବର ସେଲ୍ ପକ୍ଷରୁ ତମନ୍ନାଙ୍କୁ ସମନ୍ ପଠାଯାଇଛି । ପୂର୍ବରୁ ବଲିଉଡ ଅଭିନେତା ସଞ୍ଜୟ ଦତ୍ତଙ୍କୁ ଏହି ଏଜେନ୍ସି ପକ୍ଷରୁ ସମନ୍ କରାଯାଇଥିଲା । ବର୍ତ୍ତମାନ ତମନ୍ନା ମଧ୍ୟ ଏହି ଜାଲରେ ଛନ୍ଦି ହୋଇଛନ୍ତି । ଆଇପିଏଲ ମ୍ୟାଚ ଷ୍ଟ୍ରିମିଙ୍ଗ ମାମଲାରେ ପଚରାଉଚରା କରିବା ପାଇଁ ତମନ୍ନାଙ୍କୁ ସମନ୍ ପଠାଇଛି ମହାରାଷ୍ଟ୍ର ସାଇବର ସେଲ୍ । ତେଣୁ ଆସନ୍ତା ଏପ୍ରିଲ ୨୯ ତାରିଖରେ ତମନ୍ନାଙ୍କୁ ଉପସ୍ଥିତ ହେବା ପାଇଁ କୁହାଯାଇଛି ।

ବେଆଇନ୍ ଭାବରେ ଆଇପିଏଲ ମ୍ୟାଚ ଷ୍ଟ୍ରିମିଙ୍ଗ କରବାକୁ ନେଇ ଅଡ଼ୁଆରେ ପଡ଼ିଛନ୍ତି ବାହୁବଳୀ ଫେମ୍ ଅଭିନେତ୍ରୀ ତମନ୍ନା ଭାଟିଆ । ଏ ନେଇ ମହାରାଷ୍ଟ୍ର ସାଇବର ସେଲ୍ ତାଙ୍କୁ ପଚରାଉଚରା ପାଇଁ ସମନ୍ ପଠାଇଛି । ଆସନ୍ତା ୨୯ ତାରିଖରେ ତମନ୍ନାଙ୍କୁ ସାଇବର ବ୍ରାଞ୍ଚରେ ଉପସ୍ଥିତ ହେବା ପାଇଁ ନୋଟିସ ଦିଆଯାଇଛି । ଫେୟାରପ୍ଲେ ଆପରେ ଆଇପିଏଲ ମ୍ୟାଚର ଷ୍ଟ୍ରିମିଙ୍ଗ କରୁଥିବା ମାମଲାରେ ତମନ୍ନାଙକୁ ଜେରା କରିବ ମହାରାଷ୍ଟ୍ର ସାଇବର ସେଲ୍ । ରିପୋର୍ଟ ଅନୁସାରେ, ଏଭଳି କାର୍ଯ୍ୟ ପାଇଁ ଭାୟାକମ୍ ୧୮କୁ କୋଟି କୋଟି ଟଙ୍କାର କ୍ଷତି ସହିବାକୁ ପଡ଼ିଛି ।

M

ତେବେ ତମନ୍ନାଙ୍କ ପୂର୍ବରୁ ଏହି ମାମଲାରେ ବଲିଉଡର ‘ଖଳନାୟକ’ ସଞ୍ଜୟ ଦତ୍ତ ମଧ୍ୟ ଫସି ସାରିଛନ୍ତି । ରିପୋର୍ଟ ଅନୁସାରେ, ୨୦୨୩ ମସିହାରେ ଭାୟାକମ୍ ୧୮ର ଅଭିଯୋଗ ପରେ ଏକ ମାମଲା ରୁଜୁ ହୋଇଥିଲା । କମ୍ପାନୀ ନିକଟରେ ଆଇପିଏଲ ମ୍ୟାଚ ପ୍ରସାରଣ କରିବା ପାଇଁ ଚୁକ୍ତି ରହିଥିବା ବେଳେ ଆଇପିଏଲ ପାଇଁ ଆଇପିଆର ମଧ୍ୟ ରହିଛି । ଏହାପରେ ମଧ୍ୟ ବେଟିଂ ଆପ୍ ଫେୟାରପ୍ଲେ ପ୍ଲାଟଫର୍ମରେ ବେଆଇନ୍ ଭାବରେ ମ୍ୟାଚ୍ ଷ୍ଟ୍ରିମିଙ୍ଗ କରୁଥିବା ନେଇ ଅଭିଯୋଗ ହୋଇଥିଲା । ଏହାଦ୍ୱାରା ଭାୟାକମ୍୧୮କୁ ପ୍ରାୟ ୧୦୦ କୋଟି ଟଙ୍କାର କ୍ଷତି ସହିବାକୁ ପଡ଼ିଛି । ତେବେ ଏହି ମାମଲାରେ ବାଦଶାହ, ସଞ୍ଜୟ ଦତ୍ତ, ଜ୍ୟାକଲିନ୍ ଫର୍ଣ୍ଣାଣ୍ଡିଜ ଏବଂ ତମନ୍ନା ଭାଟିଆଙ୍କ ସହ ଅନେକ ସେଲିବ୍ରିଟି ଫସିଥିବା ଜାଣିବାକୁ ମିଳିଛି ।