ପହଲଗାମ ଆକ୍ରମଣରେ ସହିଦ ଅଧିକାରୀଙ୍କ ପତ୍ନୀଙ୍କୁ ‘ବିଗ ବସ୍ 19’ ଅଫର, ଶୋ’ରେ ନଜର ଆସିବେ କି ହିମାଂଶୀ ନରୱାଲ ?

ନୂଆଦିଲ୍ଲୀ: ଏପ୍ରିଲ୍ ୨୦୨୫ରେ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସମସ୍ତଙ୍କୁ ଦୋହଲାଇ ଦେଇଥିଲା। ଏହି ଆକ୍ରମଣରେ ଭାରତୀୟ ସେନାର ସୈନିକ ବିନୟ ନରୱାଲ ସହିଦ ହୋଇଥିଲେ ।

ବିନୟଙ୍କ ପତ୍ନୀ ହିମାଂଶୀ ନରୱାଲଙ୍କ ଫଟୋ ସେହି ସମୟରେ ସୋସିଆଲ ମିଡିଆରେ ଭାଇରାଲ ହୋଇଥିଲା। ବିବାହ ପରେ ଏହି ଦମ୍ପତି ହନିମୁନ୍ ପାଇଁ ପହଲଗାମରେ ପହଞ୍ଚିଥିଲେ । କିନ୍ତୁ ଏହି ଭୟଙ୍କର ଦୁର୍ଘଟଣା ସେମାନଙ୍କୁ ସବୁଦିନ ପାଇଁ ଅଲଗା କରିଦେଲା। ବିନୟଙ୍କ ମୃତ୍ୟୁରେ ହିମାଂଶୀ ଏବଂ ତାଙ୍କ ପରିବାର ସହିତ ସମଗ୍ର ଦେଶ କାନ୍ଦିଥିଲା ।

ହିମାଂଶୀ ନରୱାଲଙ୍କୁ ବିଗ୍ ବସ୍ ଅଫର୍ ମିଳିଛି କି- ଏବେ ଖବର ଆସିଛି ଯେ ହିମାଂଶୀ ନରୱାଲଙ୍କୁ ରିଆଲିଟି ଶୋ ‘ବିଗ୍ ବସ୍ ୧୯’ ପାଇଁ ଅଫର୍ ମିଳିଛି । ଟେଲି ଚକ୍କରର ରିପୋର୍ଟ ଅନୁଯାୟୀ, ବିଗ୍ ବସ୍ ର ନିର୍ମାତାମାନେ ହିମାଂଶୀଙ୍କୁ ତାଙ୍କ ଶୋ’ରେ ଆଣିବାକୁ ଚାହୁଁଛନ୍ତି କାରଣ ଦର୍ଶକମାନେ ତାଙ୍କ ସହିତ ପୂର୍ବରୁ ଯୋଡ଼ି ହୋଇସାରିଛନ୍ତି ।

ସୁତ୍ରରୁ ଜଣାପଡିଛି ଯେ, ନିମାତାମାନେ ଶୋ’ରେ ଏପରି କିଛି ଲୋକଙ୍କୁ ନେବାକୁ ଚାହୁଁଛନ୍ତି, ଯେଉଁମାନେ ତୁରନ୍ତ ଦର୍ଶକଙ୍କ ସହିତ ଯୋଡ଼ି ହେବେ ଏବଂ ବିଗ୍ ବସ୍ ୧୯ର ବୋର୍ଡରେ ହିମାଂଶୀ ନରୱାଲଙ୍କୁ ନେବା ବିଷୟରେ ଆଲୋଚନା ହୋଇଛି । ତଥାପି, ଏ ବିଷୟରେ ଏପର୍ଯ୍ୟନ୍ତ କିଛି ନିଶ୍ଚିତ ହୋଇନାହିଁ ।

ପହଲଗାମ୍ ଆକ୍ରମଣରେ ତାଙ୍କ ସ୍ୱାମୀ ଏବଂ ନୌସେନା ଅଧିକାରୀ ବିନୟ ନରୱାଲ ସହିଦ ହେବା ପରେ ହିମାଂଶୀ ନରୱାଲଙ୍କ ନାମ ପ୍ରଥମ ଥର ପାଇଁ ସାର୍ବଜନୀନ ହୋଇଥିଲା। ହିମାଂଶୀଙ୍କ ଏକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ସେ ତାଙ୍କ ମୃତ ସ୍ୱାମୀଙ୍କ ପାଖରେ ବସି କାନ୍ଦୁଥିଲେ । ଏହି ଫଟୋ ସାରା ଦେଶକୁ ଥରାଇ ଦେଇଥିଲା। ପରେ, ୟୁଟ୍ୟୁବର ଏଲଭିଶ ଯାଦବ ହିମାଂଶୀଙ୍କୁ ଚିହ୍ନିପାରିଥିଲେ ଏବଂ କହିଥିଲେ ଯେ ସେ ତାଙ୍କ ସହିତ କଲେଜରେ ପାଠପଢ଼ିଥିଲେ ।

‘ବିଗ୍ ବସ୍ ୧୯’ର ପ୍ରୋମୋ ନିକଟରେ ରିଲିଜ୍ ହୋଇଥିଲା। ଏଥିରେ ସଲମାନ ଖାନଙ୍କୁ ଜଣେ ନେତା ଭାବରେ ଦେଖାଯାଇଥିଲା। ସେ କହିଥିଲେ ଯେ ଏଥର ଘରର ସଦସ୍ୟମାନେ ସରକାର ଚଲାଇବେ ଏବଂ ସେମାନେ ସମସ୍ତ ନିଷ୍ପତ୍ତି ନେବେ ।

ଯଦି କିଛି ଭୁଲ ହୁଏ, ତେବେ ଘରର ସଦସ୍ୟମାନଙ୍କୁ ଏହାର କ୍ଷତି ସହିବାକୁ ପଡିବ । ରିପୋର୍ଟ ଅନୁଯାୟୀ, ‘ତାରକ ମେହତା କା ଓଲଟା ଚଷମା’ ଫେମ୍ ଷ୍ଟାର ଶୈଲେଶ ଲୋଧା, ଗୁରଚରଣ ସିଂହ, ମୁନମୁନ୍ ଦତ୍ତାଙ୍କୁ ଶୋ’ର ଅଫର୍ ଦିଆଯାଇଛି । ଏମାନଙ୍କ ବ୍ୟତୀତ ଲତା ସବରୱାଲ, ଫୈସଲ ଶେଖ, ଜନ୍ନତ ଜୁବେର, ପୂରବ ଝା ଏବଂ ଅପୂର୍ବ ମାଖିଜାଙ୍କୁ ଏହି ଅଫର୍ ମିଳିବାର ରିପୋର୍ଟ ରହିଛି ।