ମିଆଁମାର ଓ ବାଂଲାଦେଶରୁ ଆସିଥିବା ଶରଣାର୍ଥୀଙ୍କର ନିଆଯିବ ବାୟୋମେଟ୍ରିକ ରେକର୍ଡ, କେବେଠାରୁ ଆରମ୍ଭ ହେବ ପ୍ରକ୍ରିୟା?
ମିଜୋରାମ ସରକାର ରାଜ୍ୟରେ ଆଶ୍ରୟ ନେଇଥିବା ମିଆଁମାର ଓ ବାଂଲାଦେଶରୁ ଆସିଥିବା ଶରଣାର୍ଥୀଙ୍କ ବାୟୋମେଟ୍ରିକ ଏବଂ ଜନସାଂଖ୍ୟିକୀୟ ତଥ୍ୟ ସଂଗ୍ରହ ପାଇଁ ଏକ ବୃହତ୍ ଅଭିଯାନ ଆରମ୍ଭ କରିବାକୁ ପ୍ରସ୍ତୁତ ହେଉଛନ୍ତି। ଗୃହ ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁସାରେ, ଏହି ପ୍ରକ୍ରିୟା ଜୁଲାଇ ମାସର ଶେଷ ସପ୍ତାହରୁ ଆରମ୍ଭ ହେବାର ସମ୍ଭାବନା ରହିଛି।
ଏହି ଅଭିଯାନରେ ରାଜ୍ୟର ୧୧ଟି ଜିଲ୍ଲାରେ ରହୁଥିବା ପ୍ରାୟ ୩୨,୦୦୦ରୁ ଅଧିକ ମ୍ୟାନମାର ଶରଣାର୍ଥୀ ଏବଂ ୨,୩୭୧ ଜଣ ବାଂଲାଦେଶୀ ଶରଣାର୍ଥୀଙ୍କ ବାୟୋମେଟ୍ରିକ ତଥ୍ୟ ସଂଗ୍ରହ କରାଯିବ। ଏହି ତଥ୍ୟ ସଂଗ୍ରହ ମୁଖ୍ୟତଃ ‘ଫରେନାର୍ସ ଆଇଡେଣ୍ଟିଫିକେସନ ପୋର୍ଟାଲ’ ମାଧ୍ୟମରେ ଅନଲାଇନରେ କରାଯିବ, କିନ୍ତୁ ଗ୍ରାମାଞ୍ଚଳରେ ଇଣ୍ଟରନେଟ ସଂଯୋଗର ଅଭାବ ଥିବା କାରଣରୁ ଅଫଲାଇନ ମୋଡ୍ ମଧ୍ୟ ବ୍ୟବହାର କରାଯାଇପାରେ।
କାହାକୁ ଏବଂ କାହିଁକି ସାମିଲ କରାଯିବ?
ମିଆଁମାରରୁ ଆସିଥିବା ଶରଣାର୍ଥୀମାନେ ମୁଖ୍ୟତଃ ଚିନ୍ ରାଜ୍ୟର ବାସିନ୍ଦା, ଯେଉଁମାନେ ୨୦୨୧ ଫେବୃଆରୀରେ ମ୍ୟାନମାରରେ ସାମରିକ ଅଭ୍ୟୁତ୍ଥାନ ପରେ ମିଜୋରାମରେ ଆଶ୍ରୟ ନେଇଛନ୍ତି। ସେହିପରି ବାଂଲାଦେଶର ଚିଟାଗାଙ୍ଗ ହିଲ୍ ଟ୍ରାକ୍ଟରୁ ଆସିଥିବା ଶରଣାର୍ଥୀମାନେ ୨୦୨୨ରେ ସେଠାରେ ସାମରିକ ଅଭିଯାନ ପରେ ମିଜୋରାମରେ ପହଞ୍ଚିଛନ୍ତି। ଏହି ଶରଣାର୍ଥୀମାନେ, ବିଶେଷତଃ ମ୍ୟାନମାରର ଚିନ୍ ଏବଂ ବାଂଲାଦେଶର ବାଓ୍ୱମ ସମ୍ପ୍ରଦାୟ, ମିଜୋ ଜନଜାତି ସହ ନିକଟ ଜାତିଗତ ସମ୍ପର୍କ ରଖନ୍ତି।