‘କୋଶଲି’କୁ ଦ୍ୱିତୀୟ ରାଜଭାଷା ମାନ୍ୟତା ପାଇଁ ବିଧାନସଭାରେ ଦାବୀ ଉଠାଇଲେ ବିଜେଡି ବିଧାୟକ

ଭୁବନେଶ୍ୱର: ବିଜୁ ଜନତା ଦଳ (ବିଜେଡି) ବିଧାୟକ ଏବଂ ଓଡ଼ିଶା ବିଧାନସଭାରେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ, କୋଶଲିକୁ ରାଜ୍ୟ ଭାଷା ଭାବରେ ମାନ୍ୟତା ଦେବା ଏବଂ ଭାରତୀୟ ସମ୍ବିଧାନର ଅଷ୍ଟମ ଅନୁସୂଚୀରେ ଏହାକୁ ସାମିଲ କରିବା ପାଇଁ ରାଜ୍ୟ ସରକାରଙ୍କୁ ଅନୁରୋଧ କରିଛନ୍ତି।

ଓଡ଼ିଶା ବିଧାନସଭାରେ ଶୂନ୍ୟ କାଳରେ ଦାବି ଉଠାଇ ଆଚାର୍ଯ୍ୟ ଗୁରୁତ୍ୱାରୋପ କରିଥିଲେ ଯେ ଓଡ଼ିଶାର ୧୧ଟି ଜିଲ୍ଲାରେ ୧.୫ କୋଟିରୁ ଅଧିକ ଲୋକ କୋଶଲି ଭାଷା କହୁଛନ୍ତି।

ପ୍ରସନ୍ନ ଆଚାର୍ଯ୍ୟ କହିଥିଲେ ”ସଂକଳ୍ପକୁ ଦିବସରେ ପାଳନ କଲେ ହେବନି। ଓଡ଼ିଶା କହିଲେ ସମଗ୍ର ଅଞ୍ଚଳ। ଭାଷା ଓ ଭୂଷଣକୁ ଛାଡି ଜାତି ବଞ୍ଚି ପାରିବନି। ଓଡ଼ିଶାର ୧୧ ଜିଲ୍ଲାର ଦେଢ଼ କୋଟି ଲୋକ ସମ୍ବଲପୁରୀ, କୋଶଳୀ ଭାଷା, ସମ୍ବଲପୁରୀ କୋଶଳୀ ଭାଷା ବ୍ୟବାହର କରନ୍ତି। ଏହି ଭାଷାକୁ ସରକାରୀ ସ୍ଵୀକୃତି ପାଇଁ ଅନେକ ଦିନ ଧରି ଦାବି ଉଠିଛି। ଏହି ଭାଷାରେ ଅନେକ କ୍ଷୁଦ୍ର ଗଳ୍ପ, କବିତା, ପୁସ୍ତକ ରଚନା ହୋଇଛି। ନିଜସ୍ଵ ଅଭିଧାନ ବି ରହିଛି ଏହି ଭାଷାରେ। ରଙ୍ଗବତୀ ଗୀତ ସମ୍ବଲପୁର,ଓଡ଼ିଶା , ଭାରତ ଅତିକ୍ରମ କରି ସାରିଛି। ଛି ଛି ରେ ନନୀ ଗୀତ କୁ ନେଇ ସାରା ଭାରତ ବର୍ଷରେ ଚର୍ଚ୍ଚା। ଅନେକ କୁହନ୍ତି ଏହି ଭାଷାର ଲିପି ନାହିଁ। କିନ୍ତୁ ଅନେକ ଭାଷାରେ ଲିପି ନାହିଁ କିନ୍ତୁ ସ୍ଵୀକୃତି ମିଳିଛି। ପୁର୍ବରୁ ଅନେକ ବାର ସଂସଦରେ ଉଠିଛି ଏହି ଭାଷାକୁ ଅଷ୍ଟମ ଅନୁଚ୍ଛେଦରେ ସାମିଲ କରିବାକୁ। ରାଜ୍ୟ ସରକାର ଏ ନେଇ କେନ୍ଦ୍ର ସରକାରଙ୍କୁ ପୁନର୍ବାର ପ୍ରସ୍ତାବ ପଠାଇବାକୁ ଦାବି କଲେ ପ୍ରସନ୍ନ। ରାଜ୍ୟ ସରକାର ମଧ୍ୟ ଏହାକୁ ରାଜ୍ୟ ଭାଷା ଭାବେ ସ୍ଵୀକୃତି ଦିଅନ୍ତୁ। ହାଲକା ଭାବେ ନ ନେଇ ଲୋକଙ୍କ ଆତ୍ମାର ଭାଷାକୁ କୁ ରାଜ୍ୟର ଦ୍ବିତୀୟ ରାଜଭାଷା ଭାବେ ମାନ୍ୟତା ଦିଅନ୍ତୁ।”