କନିଆଁର ପସନ୍ଦ ଆସିଲାନି ବର, ରାସ୍ତାରୁ ହଟାଇ ଦେବାକୁ ଦେଲା ଦେଢ ଲକ୍ଷ ଟଙ୍କାର ସୁପାରୀ

 ମହାରାଷ୍ଟ୍ର: ଯେତେବେଳେ ଆପଣମାନଙ୍କର କେଉଁଠି ବାହାଘର ପ୍ରସ୍ତାବ ପଡେ ଆଉ ପୁଅ ପସନ୍ଦ ଆସେନି। ସେତେବେଳେ ଆପଣ କ’ଣ କରନ୍ତି। ନିଶ୍ଚିତ ଭାବରେ ବାହାଘର ଭାଙ୍ଗି ଦେଉଥିବେ। ହେଲେ ଏଠି ଜଣେ ଝିଅର ବର ପସନ୍ଦ ଆସିଲାନି। ତେଣୁ ବରକୁ ମାରିବାକୁ ଦେଢ ଲକ୍ଷ ଟଙ୍କାର ସୁପାରୀ ଦେଇଦେଲା।

ହଁ କଥାଟି ଆଶ୍ଚର୍ଯ୍ୟ ଲାଗୁଥିଲେ ବି ସମ୍ପୂର୍ଣ୍ଣ ସତ। ବାପା ମା ଝିଅର ବାହାଘର କରିବା ପାଇଁ ବରପାତ୍ର ଠିକ୍ କରିଥିଲେ। ହେଲେ ଝିଅକୁ ବର ପସନ୍ଦ ଆସିନଥିଲା। ତେଣୁ ସେ ବାହାଘର ଭାଙ୍ଗିବା ବଦଳରେ ସିଧା ବରକୁ ଜୀବନରୁ ଶେଷ କରିଦେବା ପାଇଁ ସୁପାରୀ ଦେଇଦେଲା।

କନିଆଁର ସୁପାରୀ: ତେବେ ଏପରି ଏକ ରୋଚକ ଘଟଣା ଦେଖିବାକୁ ମିଳିଛି ମହାରାଷ୍ଟ୍ରର ପୁଣେ ଜିଲ୍ଲାର ଦୌଣ୍ଡ ତାଲୁକାର ଅଞ୍ଚଳରେ। ଅହିଲାନଗର ଜିଲ୍ଲାର ଶ୍ରୀଗୋଣ୍ଡା ତାଲୁକାରେ ରହୁଥିବା ମୟୂରୀ ସୁନୀଲ ଡାଙ୍ଗଡେଙ୍କର କରଜତ ତାଲୁକାରେ ରହୁଥିବା ମାହି ଜାଲଗାଓଁର ସାଗର ଜୟସିଂହ କଦାମଙ୍କ ସହ ବିବାହ ପ୍ରସ୍ତାବ ପଡିଥିଲା।

ଆଉ ଏହି ବାହାଘରଟି ଆରେଞ୍ଜ ମ୍ୟାରେଜ୍ ଥିଲା। ଯେହେତୁ ଝିଅର ବାପା ମା ଏହି ପ୍ରସ୍ତାବ ପକାଇଥିଲେ। ତେଣୁ ବର ପସନ୍ଦ ନ ଆସିଲେ ବି ମୁହଁ ଖୋଲି କିଛି କହିପାରିଲା ନାହିଁ ମୟୁରୀ।

ଦେଢ ଲକ୍ଷର ସୁପାରୀ: ଯେହେତୁ ବର ପସନ୍ଦ ଆସିଲାନି। ଆଉ ଘରେ ମୁହଁ ଖୋଲି କିଛି କହିପାରିଲାନି କନିଆଁ। ତେଣୁ ସବୁଦିନ ପାଇଁ ବରକୁ ରାସ୍ତାରୁ ହଟାଇ ଦେବାକୁ ପ୍ଲାନ କଲା। ଆଉ ସେଥିପାଇଁ ୫ ଜଣ ଗୁଣ୍ଡାଙ୍କୁ ସୁପାରୀ ଦେଲା।

ଆଉ ଏହି ସୁପାରୀ ପାଇଁ ସେହି ଗୁଣ୍ଡାଙ୍କୁ କନିଆଁ ଦେଇଥିଲା ଦେଢ ଲକ୍ଷ ଟଙ୍କା। ସୁପାରୀ ମୁତାବିକ ବର ଉପରେ ରାତି ଅଧିଆ ଆକ୍ରମଣ କଲେ ଗୁଣ୍ଡା। ଆଉ ରାସ୍ତାରେ ନିସ୍ତୁକ ମାଡ଼ ମଧ୍ୟ ମାରିଲେ। ହେଲେ ଏତେ ସବୁ ପରେ ବି କନିଆଁର ପ୍ଲାନ ଫେଲ୍ ହୋଇଗଲା।

ଶେଷରେ ବରଟି ଯାଇ ଥାନାରେ ଅଭିଯୋଗ ଦେଲା। ଆଉ ପୋଲିସ ସୁପାରୀ ନେଇଥିବା ୫ ସୁପାରିକିଲରଙ୍କୁ ଗିରଫ କରିବାରେ ସଫଳ ହୋଇଛି। ହେଲେ ସୁପାରୀ ଦେଇଥିବା କନିଆଁ ଏବେ ମଧ୍ୟ ଫେରାର ଅଛି।