(Video) କ୍ୟାମେରା ସବୁ ଦେଖୁଛି… ଟ୍ରାଫିକ ବାବୁଙ୍କ ‘ଲାଞ୍ଚ ଭାଗବଣ୍ଟା’ ଭିଡିଓ ଲିକ୍: ଚାଲିଗଲା ଚାକିରି
ନୂଆଦିଲ୍ଲୀ: ଆଜି ଦେଶର ରକ୍ଷକ ସାଜିଛି ଭକ୍ଷକ । ୟୁନିଫର୍ମ ଡର ଦେଖାଇ ନିରୀହ ଜନସାଧାରଣଙ୍କୁ ଲୁଟିବାରେ ଲାଗିଛନ୍ତି ସରକାରୀ ଲୁଟେରା । ସଡ଼କ ସୁରକ୍ଷା ଦାୟିତ୍ୱରେ ଥିବା ଟ୍ରାଫିକ ପୋଲିସ ଜୀବନ ରକ୍ଷା କରିବା ବଦଳରେ ନିଜ ପକେଟ ଗରମ କରୁଥିବାର ଦେଖାଯାଇଛି । ଟ୍ରାଫିକ ନିୟମ ଆଳରେ ଛୋଟ ଛୋଟ ଭୁଲରେ ଚାଲାଣ କାଟି ସାଧାରଣ ଜନତାଙ୍କ ଝାଳବୁହା ଧନକୁ ହଡ଼ପ କରୁଛନ୍ତି ୟୁନିଫର୍ମ ପିନ୍ଧା ସଚ୍ଚୋଟ ଚୋର । ଯାହାର ଏକ ଜ୍ୱଳନ୍ତ ଉଦାହରଣ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଜଣେ ଟ୍ରାଫିକ ବାବୁ ଯାତ୍ରୀଙ୍କ ପାଖରୁ ଲାଞ୍ଚ ନେବା ପରେ ଏହାକୁ ଭାଗବାଣ୍ଟ କରୁଥିବାର ଏକ ଭିଡିଓ ଏବେ ଜନତାଙ୍କୁ ଆହୁରି ସତର୍କ କରାଇଛି ।
ଭାଇରାଲ ହେଉଥିବା ଏହି ଭିଡିଓରେ ଦେଖାଯାଇଛି ଯେ, ଜଣେ ଟ୍ରାଫିକ ପୋଲିସ ଗୋଟିଏ ଛୋଟ ବଖରା ଭିତରେ ଖୁବ ଚାଲାକରେ ଲାଞ୍ଚ ନେଇଛନ୍ତି । ବ୍ୟକ୍ତି ଜଣଙ୍କ କିଛି ଟଙ୍କା ଲାଞ୍ଚ ଦେବା ବେଳେ ଟ୍ରାଫିକ ବାବୁ ଏହାକୁ ହାତରେ ଧରିନାହାନ୍ତି, ବରଂ ପାଖ ଟେବୁଲରେ ରଖି ଦେଇଯିବା ପାଇଁ କହିଛନ୍ତି । ପରେ ସେ ଏହାକୁ ଖୁବ ଚାଲାକ କରି ପର୍ସରେ ପୂରାଇ ଦେଇଛନ୍ତି । ଏହିଭଳି ବିଭିନ୍ନ ଯାତ୍ରୀଙ୍କ ପାଖରୁ ଲୁଟ୍ ହୋଇଥିବା ବା ଆଦାୟ ହୋଇଥିବା ଏହି ଟଙ୍କା ୩ ଜଣ ଟ୍ରାଫିକ ପୋଲିସ କର୍ମୀଙ୍କ ମଧ୍ୟରେ ପରେ ବାଣ୍ଟ ହୋଇଛି ।
ଆଉ ଏକ ଭିଡିଓରେ ଦେଖାଯାଇଛି ଯେ, ଲାଞ୍ଚ ନେଇଥିବା ଟ୍ରାଫିକ ବାବୁଙ୍କ ସହ ଆଉ ୨ ଜଣ କର୍ମଚାରୀ ସେଠାରେ ପହଞ୍ଚିଛନ୍ତି । ଏବଂ ତିନି ଜଣଙ୍କ ମଧ୍ୟରେ ଏହିସବୁ ଟଙ୍କା ଭାଗବାଣ୍ଟ ହୋଇଛି । ଲାଞ୍ଚ ନେଇଥିବା ବାବୁ ଅନ୍ୟ ୨ ଟ୍ରାଫିକ କର୍ମୀଙ୍କ ସହ ବସି ଟଙ୍କା ଗଣୁଥିବାର ଭିଡିଓରେ ଦେଖାଯାଇଛି । ଏହାପରେ ସେ ଉଭୟଙ୍କୁ କିଛି କିଛି ଟଙ୍କା ବଢାଇ ଦେଇଛନ୍ତି । ସମସ୍ତେ ଏହି ଟଙ୍କାକୁ ନିଜ ନିଜ ପକେଟରେ ନେଇ ଖୁବ ଖୁସି ଥିବା ଦେଖାଯାଇଛି । ହେଲେ ଲାଞ୍ଚ ପାଇବା ପରେ ଏହି ୩ ଟ୍ରାଫିକ ପୋଲିସ କର୍ମୀଙ୍କ ପାଇଁ କାଳ ସାଜିଛି ସିସିଟିଭି କ୍ୟାମେରା ଏବଂ ସୋସିଆଲ ମିଡିଆ ।
#Delhi #WATCH गाजीपुर थाने के सामने ट्रैफिक पुलिस वालों ने झौपड़ी को बनाया हुआ था उगाही का अड्डा। देखें कैसे लोगों को वहां लाकर लेते थे रिश्वत, फिर कमाई को आपस में बांट लेते थे। आरोपी ट्रैफिक पुलिसकर्मी कल्याणपुरी सर्कल के हैं।@SandhyaTimes4u @NBTDilli @CPDelhi #DelhiPolice pic.twitter.com/7i7yYR2JlB
— Kunal Kashyap (@kunalkashyap_st) August 17, 2024
ଏହି ଘଟରାର ୨ଟି ଭିଡିଓ ସୋସିଆଲ ମିଡିଆରେ ଅପଲୋଡ ହେବା ପରେ ସମସ୍ତ ଟ୍ରାଫିକ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଘଟରାରେ ସମ୍ପୃକ୍ତ ୩ ଜଣ ଟ୍ରାଫିକ ପୋଲିସ କର୍ମଚାରୀଙ୍କୁ ଚାକିରିରୁ ନିଲମ୍ବନ କରାଯାଇଥିବା ନେଇ ରାଜଧାନୀ ଦିଲ୍ଲୀର ଉପ-ରାଜ୍ୟପାଳ ସୂଚନା ଦେଇଛନ୍ତି । ଏହାସହିତ ସେମାନଙ୍କ ବିରୋଧରେ ବିଭାଗୀୟ ତଦନ୍ତ ମଧ୍ୟ ଜାରି ରହିଛି ।