ଦୁନିଆରେ ଦ୍ରୁତ ଗତିରେ ବ୍ୟାପିବାରେ ଲାଗିଛି ଏହି ମାରାତ୍ମକ ରୋଗ, ମେଡିସିନ୍ ମାଧ୍ୟମରେ ରୋକିବା ମଧ୍ୟ କଷ୍ଟକର
ଆଜିକାଲି ଅତି ମାରାତ୍ମକ ସଂକ୍ରମଣର ବିପଦ ଦ୍ରୁତ ଗତିରେ ବୃଦ୍ଧି ପାଉଛି । ଏହି ଫଙ୍ଗଲ୍ ଇନଫେକ୍ସନ୍ କରୋନା ଅପେକ୍ଷା ଅଧିକ ମାରାତ୍ମକ ବୋଲି କୁହାଯାଉଛି । ବିଶେଷଜ୍ଞଙ୍କ ଅନୁଯାୟୀ, କ୍ୟାଣ୍ଡିଡା ଆରିସ୍ ନାମକ ଏହି ସଂକ୍ରମଣ ଲୋକଙ୍କ ପାଇଁ ଅତ୍ୟନ୍ତ ମାରାତ୍ମକ ବୋଲି ପ୍ରମାଣିତ ହେଉଛି ।
ଏଥିରେ ପ୍ରଭାବିତ ପ୍ରାୟ ୬୦ ପ୍ରତିଶତ ଲୋକ ମୃତ୍ୟୁବରଣ କରୁଛନ୍ତି । ଚିନ୍ତାର ବିଷୟ ହେଉଛି ଏହି ସଂକ୍ରମଣ ଉପରେ ମେଡିସିନର କୌଣସି ପ୍ରଭାବ ପଡୁନାହିଁ ଏବଂ ଆମେରିକାରେ ଏହି ରୋଗ ବୃଦ୍ଧି ପାଉଛି । ଏହା ସମଗ୍ର ବିଶ୍ୱରେ ଚିନ୍ତାର ବିଷୟ ପାଲଟିଛି, କାରଣ ଯଦି ଏହି ସଂକ୍ରମଣ ଅନ୍ୟ ଦେଶରେ ଶୀଘ୍ର ବ୍ୟାପିଯାଏ, ତେବେ ଏହା ମହାମାରୀର ରୂପ ନେଇପାରେ । କରୋନା ମହାମାରୀ ଆରମ୍ଭରୁ ଲୋକମାନେ ଏପର୍ଯ୍ୟନ୍ତ ସୁସ୍ଥ ହୋଇନାହାଁନ୍ତି ଏବଂ ଏହାରି ମଧ୍ୟରେ ମାରାତ୍ମକ ଫଙ୍ଗଲ୍ ଇନଫେକ୍ସନ ହେତୁ ସମସ୍ତଙ୍କ ଚିନ୍ତା ବଢ଼ିଚାଲିଛି ।
ଆମେରିକୀୟ ୱେବସାଇଟ୍ ଏନବିସି ନ୍ୟୁଜ୍ ରିପୋର୍ଟ ଅନୁଯାୟୀ, କ୍ୟାଣ୍ଡିଡା ଆରିସ୍ ଏକ ବିରଳ ଫଙ୍ଗଲ୍ ଇନଫେକ୍ସନ, କିନ୍ତୁ ୨୦୧୬ ବର୍ଷ ପରେ ଏହାର ମାମଲା ଲଗାତାର ଭାବେ ବୃଦ୍ଧି ପାଉଛି । ଏହି ବର୍ଷ ଆମେରିକାର ଅନେକ ରାଜ୍ୟରେ ଏହି ସଂକ୍ରମଣ ଦେଖାଦେଉଛି । ଏହି ମାସରେ ୱାଶିଂଟନ୍ ରାଜ୍ୟର ୪ ଜଣ ଲୋକ ଏହି ମାରାତ୍ମକ ସଂକ୍ରମଣର ଶିକାର ହୋଇଥିଲେ । ଏହି ସଂକ୍ରମଣ ହେବା ସମୟରେ ଆଣ୍ଟିଫଙ୍ଗାଲ୍ ମେଡିସିନ୍ କାମ କରେ ନାହିଁ ଏବଂ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ଲୋକମାନେ ଅଧିକ ବିପଦରେ ପଡନ୍ତି । ଚିନ୍ତାର ବିଷୟ, ଏହା ପ୍ରାୟତଃ ଡାକ୍ତରଖାନାରେ ଭର୍ତ୍ତି ହୋଇଥିବା ସେହି ରୋଗୀମାନଙ୍କଠାରେ ଦେଖାଯାଏ ଯେଉଁମାନେ କ୍ୟାଥେଟର, ନିଶ୍ୱାସ ପ୍ରଶ୍ୱାସ କିମ୍ବା ଫିଡ୍ ଟ୍ୟୁବ୍ ବ୍ୟବହାର କରନ୍ତି । ଡାକ୍ତରଖାନାରେ ଭର୍ତ୍ତି ହୋଇଥିବା ରୋଗୀମାନଙ୍କଠାରେ ଏହାର ବିପଦ ଅଧିକ ରହିଛି ।
୨୦୦୯ ରେ ଜାପାନରେ କ୍ୟାଣ୍ଡିଡା ଆରିସ୍ ପ୍ରଥମେ ଚିହ୍ନଟ ହୋଇଥିଲା । ଏହା ପରେ ଏହା ଆମେରିକାରେ ପହଞ୍ଚିଲା ଏବଂ ୨୦୨୬ ମସିହାରୁ ଏହି ସଂକ୍ରମଣର ଅନେକ ମାମଲା ରିପୋର୍ଟ କରାଯାଇଥିଲା । ୨୦୨୦ ରୁ ୨୦୨୧ ପର୍ଯ୍ୟନ୍ତ କ୍ୟାଣ୍ଡିଡା ଆରିସ୍ ରୋଗ ଦ୍ରୁତ ଗତିରେ ବୃଦ୍ଧି ପାଇଲା ଏବଂ ସଂକ୍ରମଣ ମାମଲା ୯୪% ବୃଦ୍ଧି ପାଇଲା । ୨୦୨୨ ମସିହାରେ ୨୩୦୦ ରୁ ଅଧିକ ମାମଲା ରିପୋର୍ଟ ହୋଇଥିଲା । ପ୍ରତିବର୍ଷ ଏହି ସଂକ୍ରମଣର ହଜାର ହଜାର ମାମଲା ରିପୋର୍ଟ କରାଯାଉଛି । ଆଶ୍ଚର୍ଯ୍ୟର କଥା, ୪୦ ଟି ଦେଶରେ ଏପର୍ଯ୍ୟନ୍ତ କ୍ୟାଣ୍ଡିଡା ଆରିସ୍ ସଂକ୍ରମଣ ମାମଲା ରିପୋର୍ଟ ହୋଇଛି । ଏହି ସଂକ୍ରମଣ ଖୋଲା କ୍ଷତ ଏବଂ ଫୁସଫୁସକୁ ସଂକ୍ରମିତ କରିପାରେ । ଏହା ରକ୍ତ ସ୍ରୋତରେ ପ୍ରବେଶ କରି ମୃତ୍ୟୁର କାରଣ ସାଜିପାରେ ।
