କମେଡ଼ିଆନ୍ ସୁନୀଲ ପାଲ୍ ନିଖୋଜ: ମୁମ୍ବାଇ ବାହାରକୁ ଶୋ’ କରିବାକୁ ଯାଇ ଆଉ ଫେରି ନାହାନ୍ତି, ପତ୍ନୀ ଥାନାରେ

ନୂଆଦିଲ୍ଲୀ: ମନୋରଞ୍ଜନଧର୍ମୀ ଜଗତରୁ ଆସିଛି ଏକ ଚିନ୍ତାଜନକ ଖବର । କପିଲ ଶର୍ମାଙ୍କ ବିଶ୍ୱସ୍ତ ବନ୍ଧୁ ତଥା କମେଡ଼ିଆନ୍ ସୁନୀଲ ପାଲଙ୍କ କୌଣସି ଖୋଜ୍ ଖବର ମିଳୁନାହିଁ । ଗତ କିଛି ଘଣ୍ଟା ଧରି ସେ ନିଖୋଜ ରହିଥିବା ନେଇ ତାଙ୍କର ପତ୍ନୀ ପୋଲିସ ଷ୍ଟେସନରେ ଅଭିଯୋଗ ଦାୟର କରିଛନ୍ତି । ସୁନୀଲ ଅଧିକାଂଶ ସମୟରେ ମୁମ୍ବାଇ ବାହାରକୁ ଶୋ’ କରିବା ପାଇଁ ଯାଇଥାନ୍ତି । ମାତ୍ର ଏଥର କିଛି ଅଲଗା ଘଟିଥିଲା । ଶୋ’ ପାଇଁ ଯାଇଥିବା ସୁନୀଲ ଆଉ ଘରକୁ ଫେରି ନାହାନ୍ତି । ତାଙ୍କର ଫୋନକୁ କଲ୍ କଲେ ମଧ୍ୟ ତାହା କନେକ୍ଟ ହେଉଥିବା ଜଣାପଡ଼ିଛି ।

ସୂଚନାଯୋଗ୍ୟ ଯେ, ସୁନୀଲ ତାଙ୍କର କ୍ୟାରିୟରରେ ଅନେକ କମେଡ଼ି ଶୋ’ କରିଛନ୍ତି । ନିଜର ନିଖୁଳ କହିବା ଶୈଳୀରେ ସୁନୀଲ ଦର୍ଶକଙ୍କୁ ହସାଇବାରେ ବେଶ୍ ଓସ୍ତାଦ ଥିଲେ । ଏଥିସହିତ ସୁନୀଲ ଆକ୍ଟିଂରେ ମଧ୍ୟ ନିଜର ପାଦ ରଖିଥିଲେ । ସେ ‘ଫିର ହେରା ଫେରୀ’, ‘ଅପନା ସପନା ମନୀ ମନୀ’, ‘ବମ୍ବୋ ଟୁ ଗୋଆ’ ଓ ‘କିକ’ ପରି ବହୁ ଫିଲ୍ମରେ କାମ କରିଥିଲେ । ସୁନୀଲ ନିଜର ନିଆରା କମେଡ଼ି ମାଧ୍ୟମରେ ଦର୍ଶକଙ୍କ ହୃଦୟ ଜିତିପାରିଥିଲେ । ୨୦୦୫ରେ ଟିଭିରେ ଆସିଥିବା ‘ଦି ଗ୍ରେଟ ଇଣ୍ଡିଆନ ଲାଫ୍ଟର ଚ୍ୟାଲେଞ୍ଜ’ରେ ସୁନୀଲ କାମ କରିଥିଲେ । ସୁନୀଲ ଷ୍ଟାଣ୍ଡ ଅପ୍ କମେଡ଼ି ପାଇଁ ବେଶ୍ ସୁପରିଚିତ ଥିଲେ । ତେବେ ସୁନୀଲଙ୍କୁ ଯଦି କେହି କିଡନାପ୍ କରିଥାଏ, ତେବେ ତାହା ତାଙ୍କର ଅଗଣିତ ଫ୍ୟାନ୍ସଙ୍କ ପାଇଁ ଏକ ଚିନ୍ତାଜନକ ଖବର । ସୁନୀଲ ସୁରକ୍ଷିତ ଭାବେ ଘରକୁ ଫେରି ଆସନ୍ତୁ ଏହା ତାଙ୍କର ପ୍ରଶଂସକମାନେ ଈଶ୍ୱରଙ୍କ ନିକଟରେ ପ୍ରାର୍ଥନା କରୁଛନ୍ତି ।