ପୁଣି ଆତଙ୍କ ଖେଳାଉଛି କରୋନା: ଗୋଟିଏ ଦିନରେ ଚିହ୍ନଟ ହେଲା ୩୨ ହଜାର ନୂଆ ମାମଲା

ନୂଆଦିଲ୍ଲୀ: ପୁଣିଥରେ ଚାଇନାରେ କରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ବୁଧବାର ଦିନ ଚାଇନାରେ କୋଭିଡ ମାମଲାରେ ଏକ ରେକର୍ଡ କରାଯାଇଛି । ସ୍ୱାସ୍ଥ୍ୟ ଅଧିକାରୀଙ୍କ ଅନୁଯାୟୀ, ଗତ ଦିନ ମାନଙ୍କରେ ଚାଇନାରେ କରୋନା ପଜିଟିଭର ୩୧୬୫୬ଟି ନୂଆ ମାମଲା ଚିହ୍ନଟ ହୋଇଛି । ଗୋଟିଏ ଦିନରେ ଚାଇନାରେ କୋଭିଡ ମାମଲାରେ ଏହା ହେଉଛି ସବୁଠାରୁ ବଡ ମାମଲା । ଏପ୍ରିଲ୍ ମାସରେ ରେକର୍ଡ ହୋଇଥିବା ୨୯,୩୯୦ ସଂକ୍ରମଣଠାରୁ ଏହି ସଂଖ୍ୟା ଅଧିକ । ଗୋଟିଏ ଦିନ ପୂର୍ବରୁ ଚାଇନାରେ ୨୮୦୦୦ ରୁ ଅଧିକ ନୂତନ ମାମଲା ଚିହ୍ନଟ ହୋଇଥିଲା ।

ଚାଇନାରେ କରୋନା ସଂକ୍ରମଣରେ କ୍ରମାଗତ ବୃଦ୍ଧି ରେକର୍ଡ କରାଯାଉଛି । ଛଅ ମାସ ପରେ ରବିବାର ଦିନ ଜଣେ ବୃଦ୍ଧଙ୍କର କରୋନାରେ ମୃତ୍ୟୁ ହୋଇଥିବା ଜଣା ପଡ଼ିଛି । ଏହାକୁ ଦୃଷ୍ଟିରେ ରଖି ଚୀନ୍ ସରକାର ଅନେକ ସହରରେ ଲକ ଡାଉନ ଘୋଷଣା କରିଛନ୍ତି । ସ୍ୱାସ୍ଥ୍ୟ ବିଭାଗ ଦଳ ସର୍ବାଧିକ କରୋନା ପରୀକ୍ଷା ଏବଂ କ୍ୱାରେଣ୍ଟାଇନ ଉପରେ ଗୁରୁତ୍ୱ ଦେଉଛନ୍ତି ।

ଚାଇନାରେ ବଢୁଥିବା କରୋନା ମାମଲାକୁ ଦୃଷ୍ଟିରେ ରଖି କଡା ନିୟମ ଲାଗୁ କରାଯାଇଛି । ରାଜଧାନୀର ସର୍ବସାଧାରଣ ସ୍ଥାନରେ ପ୍ରବେଶର ୪୮ ଘଣ୍ଟା ପୂର୍ବରୁ କୋଭିଡ୍ ନେଗେଟିଭ ରିପୋର୍ଟ ଦେଖାଇବା ବାଧ୍ୟତାମୂଳକ କରାଯାଇଛି । ଅର୍ଥାତ୍, ସପିଂ ମଲ୍, ହୋଟେଲ, ସରକାରୀ କାର୍ଯ୍ୟାଳୟକୁ ଯିବାକୁ ହେଲେ ଲୋକଙ୍କୁ ବର୍ତ୍ତମାନ କୋଭିଡ୍ ରିପୋର୍ଟ ଦେଖାଇବାକୁ ପଡିବ । ଏହା ସହିତ ଲୋକଙ୍କୁ ଆବଶ୍ୟକ ସମୟରେ ଘରୁ ବାହାରକୁ ଯିବାକୁ ପରାମର୍ଶ ଦିଆଯାଇଛି । ସେହିପରି କରୋନା ସଂକ୍ରମିତ ରୋଗୀଙ୍କ ସଂଖ୍ୟା ବଢୁଥିବାରୁ ଚୀନ ସରକାର କେତେକ ଜିଲ୍ଲାର ସ୍କୁଲକୁ ବନ୍ଦ କରିଛନ୍ତି । ଅନଲାଇନ କ୍ଲାସ କରିବା ପାଇଁ ନିର୍ଦ୍ଦେଶ ଦିଆଯାଇଛି ।