୩୦ ରେ ସରିବ ସମୟସୀମା: E-KYC ନ କଲେ ରାସନ କାର୍ଡ କାଟିବ
ଏବେ ସୁଦ୍ଧା ୨କୋଟି ୯୩ଲକ୍ଷ ୮୫ହଜାର ୪୫ ଜଣ E-KYC କରିବାରେ ସଫଳ ହୋଇଛନ୍ତି
ଭୁବନେଶ୍ୱର: E-KYC ନକଲେ ରାସନ କାର୍ଡ କଟିବ। ହିତାଧିକାରୀଙ୍କ ହାତରେ ସମୟ ଆଉ ମାତ୍ର ୧୦ଟି ଦିନ। ସମୟସୀମା ବଢ଼ାଯାଇ ଜାନୁଆରୀ ୩୦ ଚୂଡ଼ାନ୍ତ ହୋଇଛି। ଏପର୍ଯ୍ୟନ୍ତ ରାଜ୍ୟର ୪୧ଲକ୍ଷ ୧୫ ହଜାର ୫୨୫ ଜଣ ରାସନ କାର୍ଡଧାରୀ କୌଣସି କାରଣରୁ E-KYC କରିବାରେ ସକ୍ଷମ ହୋଇପାରିନାହାନ୍ତି।
ଏମାନଙ୍କ ମଧ୍ୟରୁ ଅନେକ ରୁଗ୍ଣ, ଦୃଷ୍ଟିହୀନ, କୁଷ୍ଠ ରୋଗାକ୍ରାନ୍ତ ଓ ବୟସାଧିକ୍ୟର ଶିକାର। କେବେ ବି E-KYC କରିବାରେ ଏମାନେ ସଫଳ ହୋଇପାରିବେ ନାହିଁ ଏବଂ ନିୟମାନୁସାରେ ଜାନୁଆରୀ ୩୦ ପରେ ସେମାନଙ୍କ ପଡ଼ିକାର୍ଡ କଟିବ। ଏହାର ବିକଳ୍ପ କ’ଣ ତାହା ସରକାରୀସ୍ତରରେ ଏଯାବତ୍ କରାଯାଇନାହିଁ ।
ଅନ୍ୟପକ୍ଷରେ ରାସନ କାର୍ଡ କେବଳ କେତେ କିଲୋ ଚାଉଳରେ ସୀମିତ ନୁହେଁ, ଅନ୍ୟ ବହୁ ସରକାରୀ ସୁବିଧା ସୁଯୋଗ ସହ ରାସନ କାର୍ଡ ସଂଯୁକ୍ତ। ଦୃଷ୍ଟାନ୍ତମୂଳକ ଭାବେ ନିର୍ଦିଷ୍ଟ ଯୋଜନା ଅନ୍ତର୍ଗତ ସରକାରୀ ସୁବିଧାରେ କୌଣସି ଗରିବର ଚିକିତ୍ସା ଚାଲୁଥିଲା ବେଳେ ରାସନ କାର୍ଡ କଟିଲେ ତୁରନ୍ତ ସେ ଚିକିତ୍ସା ସୁବିଧାରୁ ସେ ବଞ୍ଚିତ ହେବ।
ରାଜ୍ୟରେ ପ୍ରଚଳିତ ଜାତୀୟ ଖାଦ୍ୟ ସୁରକ୍ଷା ଯୋଜନା ଅନ୍ତର୍ଗତ ୩କୋଟି ୩୫ ଲକ୍ଷ ୫୭୦ଜଣ ରାସନ କାର୍ଡଧାରୀଙ୍କ ମଧ୍ୟରୁ ଏବେ ସୁଦ୍ଧା ୨କୋଟି ୯୩ଲକ୍ଷ ୮୫ହଜାର ୪୫ ଜଣ E-KYC କରିବାରେ ସଫଳ ହୋଇଛନ୍ତି।
ସାଧାରଣ ବଣ୍ଟନରେ ସ୍ବଚ୍ଛତା ଆଣିବା ପାଇଁ ଗଲାବର୍ଷ ଅଗଷ୍ଟ ମାସରେ ଏହି ନିୟମ ଲାଗୁହେଲା। ପ୍ରଥମେ ଡିସେମ୍ବର ୩୧କୁ E-KYC କରାଇବାର ସମୟସୀମା ଭାବେ ଘୋଷଣା ହୋଇଥିଲା। ଏଥିରେ ୨କୋଟି ୮୭ ଲକ୍ଷ ୮୩ହଜାର ୮୪୮ଜଣ E-KYC କରିଥିଲେ।
ଏବେ ଜାନୁଆରୀ ୨୦ ସୁଦ୍ଧା ଏ ସଂଖ୍ୟ ବୃଦ୍ଧି ପାଇ ୨କୋଟି ୯ ୩ଲକ୍ଷ ୮୫ହଜାର ୪୫ରେ ପହଞ୍ଚିଛି। ଏହି ୨୦ଦିନରେ ହାରାହାରି ଦିନକୁ ୩୮ହଜାର ୧୪୩ଜଣ ରାସନ କାର୍ଡଧାରୀ ବିଭିନ୍ନ ଖୁଚୁରା ବିକ୍ରୟ କେନ୍ଦ୍ରରେ E-KYC କରିଛନ୍ତି। ଇତିମଧ୍ଯରେ ସରକାର E-KYC କରାଇବାର ସମୟସୀମା ପ୍ରଥମେ ଜାନୁଆରୀ ୧୫ ଏବଂ ଜାନୁଆରୀ ୩୦ ପର୍ଯ୍ୟନ୍ତ ବଢ଼ାଇଛନ୍ତି।